.jpg)
ក្រុមប្រជាការពារ នាពេលកន្លងទៅ។ រូបថត ហ្វេសប៊ុក
ភ្នំពេញៈ ក្រៅពីកម្លាំងនគរបាល និងទាហាន អគ្គស្នងការនគរបាលជាតិ បន្ថែមកម្លាំងប្រជាការពារប្រមាណជិត ១០ ០០០ នាក់ សម្រាប់ចូលរួមធានាថែរក្សាសន្តិសុខសណ្តាប់ធ្នាប់សាធារណៈ និងសុវត្ថិភាពក្នុងដំណើរការបោះឆ្នោតក្រុមប្រឹក្សាឃុំសង្កាត់ អាណត្តិទី ៥ ដែលនឹងប្រព្រឹត្តទៅនៅថ្ងៃទី ៥ ខែមិថុនា ឆ្នាំ ២០២២ នៅតាមគោលដៅនៃការបោះឆ្នោត។
លោក នេត សាវឿន អគ្គស្នងការនគរបាលជាតិថ្លែងក្នុងកិច្ចប្រជុំ ដើម្បីធានានូវសន្តិសុខសណ្តាប់ធ្នាប់សាធារណៈ និងសុវត្ថិភាពគ្រប់ដំណាក់កាលនៃដំណើរការបោះឆ្នោតក្រុមប្រឹក្សាឃុំកាលពីថ្ងៃទី ៦ ខែមេសា ឆ្នាំ ២០២២ ថា ការបន្ថែមកម្លាំងប្រជាការពារដើម្បីជួយថែរក្សាសណ្តាប់ធ្នាប់សាធារណៈ និងសុវត្ថិភាពក្នុងដំណើរការបោះឆ្នោតក្រុមប្រឹក្សាឃុំសង្កាត់ជិត១ម៉ឺននាក់ ព្រោះនៅក្នុងខេត្តមួយចំនួន មានកម្លាំងតិចជាង ចំនួនការិយាល័យបោះឆ្នោត។
លោកបានលើកឧទាហរណ៍ថា ក្នុងខេត្តកំពង់ស្ពឺចំនួនកម្លាំងនគរបាលតិចជាងចំនួនការិយាល័យបោះឆ្នោតដែលត្រូវកៀរគរកម្លាំងពីខេត្តទៅជួយស្រុក និងសង្កាត់ឃុំ ដូច្នេះត្រូវប្រើកម្លាំងប្រជាការពារជំនួស រីឯកម្លាំងមានសមត្ថកិច្ចទុកជួយអន្តរាគមន៍នៅពេលមានហេតុការណ៍កើតឡើង។
ជាមួយគ្នានេះ លោក នេត សាវឿន បានស្នើឱ្យបណ្តារាជធានីខេត្តរៀបចំផែនការហ្វឹកហាត់បំប៉នកម្លាំងទាំងអស់ដែលត្រូវពង្រាយការពារសន្តិសុខបោះឆ្នោតតែអាទិភាពមុនគេគឺប្រជាការពារដែលគាត់ស្ម័គ្រចិត្តបម្រើប្រជាពលរដ្ឋ អាជ្ញាធរ និងមូលដ្ឋានផ្ទាល់ខ្លួន។
លោកថ្លែងថា៖ «សូមឱ្យខេត្តរៀបចំកម្លាំងអធិការស្រុកដើម្បីមកបណ្តុះបណ្តាលនៅខេត្ត និងសូមឱ្យស្នងការក៏ដូចជាគណៈបញ្ជាការឯកភាពខេត្តត្រូវសហការជាមួយគណៈកម្មការរៀបចំការបោះឆ្នោតរាជធានីខេត្ត ដើម្បីស្នើសុំគ្រូបង្គោលដើម្បីធ្វើការបណ្តុះបណ្តាលនៅខេត្ត និងប្រគល់ឱ្យស្រុកបន្តបណ្តុះបណ្តាលតាមឃុំ»។
បើតាមលោក នេត សាវឿន គោលដៅអាទិភាពដែលត្រូវការពារមានដូចជាស្នាក់ការគណៈកម្មាធិការជាតិរៀបចំការបោះឆ្នោត ការិយាល័យពិនិត្យបញ្ជីឈ្មោះ និងចុះឈ្មោះបោះឆ្នោត ការិយាល័យបោះឆ្នោត និងរាប់សន្លឹកឆ្នោត ការដឹកជញ្ជូនឧបករណ៍ សម្ភារ ឯកសារបោះឆ្នោត សន្លឹកឆ្នោត និងកន្លែងទុកសន្លឹកឆ្នោត។
លោក កង សាវាង្ស មន្ត្រីសម្របសម្រួលអង្គការឃ្លាំមើលការបោះឆ្នោតមួយហៅកាត់ថា ខុម ហ្វ្រែល បានថ្លែងនៅថ្ងៃទី ៧ ខែមេសាថា ការជ្រើសរើសប្រជាការពារឱ្យជួយថែរក្សាការពារសន្តិសុខ សណ្តាប់ធ្នាប់សាធារណៈ និងសុវត្ថិភាពនៅក្នុងដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី ៥ នេះ គឺជាបរិបទថ្មីប្លែកពីការបោះឆ្នោតមុនៗដែលមានតែការប្រើប្រាស់កម្លាំងនគរបាល និងទាហានដែលទទួលបានការបណ្ដុះបណ្ដាលត្រឹមត្រូវ។
លោកបន្តថា ប្រជាការពារមិនដែលទទួលបានការបណ្តុះបណ្តាល និងជាអ្នកស្ម័គ្រចិត្តដែលពួកគាត់ខ្លះធ្លាប់ធ្វើកិច្ចការហួសតួនាទីរហូតមានការប្រើហិង្សាលើប្រជាពលរដ្ឋនៅពេលតវ៉ាផ្សេងៗ ដោយសារមិនបានឆ្លងកាត់ការបណ្តុះបណ្តាល។
លោកថ្លែងថា៖ «អ៊ីចឹង!សម្រាប់ខ្ញុំ យល់ឃើញថា ការរើសអ្នកណាមួយ ជាការចាត់ចែងរបស់រាជរដ្ឋាភិបាល និងគណៈកម្មការរៀបចំការបោះឆ្នោត ប៉ុន្តែអ្វីដែលសំខាន់ត្រូវពង្រឹងតួនាទី និងភារកិច្ចរបស់ពួកគេគឺត្រូវបណ្តុះបណ្តាលពួកគេឱ្យស្គាល់ពីតួនាទី និងការអនុវត្តរបស់ខ្លួន។
មិនត្រឹមតែប៉ុណ្ណោះត្រូវតែឱ្យមានវិន័យ និងគោលការណ៍ទោសបញ្ញត្តិសម្រាប់អ្នកដែលប្រព្រឹត្តខុស»។
ភ្នំពេញប៉ុស្តិ៍មិនអាចទាក់ទង លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ ដើម្បីសុំធ្វើអត្ថាធិប្បាយពីករណីនេះបានទេ នៅថ្ងៃទី ៧ ខែមេសា ប៉ុន្តែលោកធ្លាប់ប្រាប់ភ្នំពេញប៉ុស្តិ៍កាលពីថ្ងៃ ២៩ មីនាថា «យើងនឹងបណ្តុះបណ្តាលប្រជាការពារទាំងនោះសម្រាប់ប្រើប្រាស់ និងធ្វើជាកម្លាំងជំនួយរក្សាសណ្តាប់ធ្នាប់នៅក្នុងអំឡុងពេលបោះឆ្នោត ប៉ុន្តែពួកគាត់ក៏មិនមែនកម្លាំងស្នូលសម្រាប់ការពារសន្តិសុខ និងសណ្តាប់ធ្នាប់សាធារណៈទេ ពួកគាត់ជាអ្នកស្ម័គ្រចិត្ត និងកម្លាំងជំនួយដែលអាចការពារនៅក្នុងភូមិសាស្ត្រដែលស្រាល»។
លោក សោម សូរីដា អ្នកនាំពាក្យ គ.ជ.ប ប្រាប់ភ្នំពេញប៉ុស្តិ៍នៅថ្ងៃទី ៧ ខែមេសាថា ការជ្រើសរើសប្រជាការពាររបស់អគ្គស្នងការនគរបាលជាតិបន្ថែមនេះ ដោយសារតែមានការកើនឡើងនៃការិយាល័យបោះឆ្នោតដែលពីមុនមានតែជាង ២២ ០០០ ការិយាល័យទេ ប៉ុន្តែបច្ចុប្បន្នបានឡើងដល់ជាង ២៣ ៦០០ ការិយាល័យ។
លោកបន្តថា ចំនួន ២៣ ៦០០ ការិយាល័យ គឺជាចំនួនដ៏ច្រើន ដែលនៅក្នុងបទបញ្ជា និងនីតិវិធីរបស់ គ.ជ.ប គឺក្នុង ១ ការិយាល័យមានភា្នក់ងារសន្តិសុខបោះឆ្នោតចំនួន ៣ រូបដែលម្នាក់ប្រចាំការនៅបរិវេណជុំវិញការិយាល័យ និង ២ នាក់ទៀតនៅខាងក្រៅការិយាល័យបោះឆ្នោត។
លោកថ្លែងថា៖ «យើងមានការចាប់អារម្មណ៍ដែរនៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិ ៥ ដែលនឹងប្រព្រឹត្តទៅនៅថ្ងៃទី ៥ ខែមិថុនា ឆ្នាំ ២០២២ ខាងមុខនេះ កម្លាំងសន្តិសុខបោះឆ្នោត មិនមែនប្រចាំការនៅតាមតែការិយាល័យបោះឆ្នោតទេ ។ អ៊ីចឹងគោលដៅនៃការការពារគឺមានទីស្តីការ គ.ជ.ប គណៈកម្មការរៀបចំបោះឆ្នោតរបស់ គ.ជ.ប ទាំង ២៥ រាជធានីខេត្ត និង ២០៤ ក្រុងស្រុកខណ្ឌ ក៏ត្រៀមកម្លាំងដើម្បីការពារក្នុងករណី ឬមានបញ្ហាណាមួយកើតឡើងក្នុងនោះគោលដៅឃុំសង្កាត់ចំនួន ១ ៦៥២ ក៏ត្រូវការពារដែរ»៕
