ភ្នំពេញៈ អគ្គស្នងការរង និងជាស្នងការនគរបាលរាជធានី-ភ្នំពេញ លោក ស ថេត បានធ្វើការប្រជុំរៀបចំផែនការ និងបានត្រៀមកម្លាំងចម្រុះជាង ២ ២០០ នាក់ ក្នុងការការពារសន្តិសុខ និងរបៀបរៀបរយដល់ប្រជាពលរដ្ឋក្នុងពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងប្រព្រឹត្តទៅនាសប្តាហ៍ក្រោយ។
នាកិច្ចប្រជុំនៅថ្ងៃទី ៧ មេសា លោក ស ថេត បានណែនាំដល់ស្នងការរងទាំងអស់ ត្រូវយកចិត្តទុកដាក់ខ្ពស់ក្នុងការដឹកនាំកម្លាំង ដើម្បីអនុវត្តការងារឱ្យបានល្អធានាឱ្យបាននូវសន្តិសុខ សណ្តាប់ធ្នាប់ល្អ ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ ជាពិសេសកម្លាំងចរាចរណ៍ទាំងអស់ត្រូវតែចេញ ជួយសម្រួលចរាចរណ៍ ទាំងក្នុងរាជធានីភ្នំពេញ ក៏ដូចជាច្រកចេញ ចូល រាជធានី-ភ្នំពេញ ដើម្បីកាត់បន្ថយការកកស្ទះ។
លោកបញ្ជាក់ថា ការត្រៀមវិធានការការពារទុកជាមុននេះ ដើម្បីបង្កើនប្រសិទ្ធភាពទប់ស្កាត់សកម្មភាពបង្កការរំខាននានា ដែលអាចបង្កការគំរាមកំហែងនៅតាមទីវត្តអារាមកន្លែងសប្បាយនៅតាមរមណីយដ្ឋាន កន្លែងប្រមូលផ្តុំ តាមដងផ្លូវសំខាន់ៗក្នុងរាជធានីភ្នំពេញ។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ ប្រាប់ភ្នំពេញ-ប៉ុស្តិ៍ នៅថ្ងៃទី ៧ ខែមេសា ថា ស្នងការរាជធានីភ្នំពេញបានប្រជុំត្រៀមកម្លាំង ដើម្បីរៀបចំសន្តិសុខ សណ្តាប់ធ្នាប់សាធារណៈ ក៏ដូចជាចរាចរណ៍ដើម្បីកុំឱ្យមានការកកស្ទះដល់ប្រជាពលរដ្ឋទាំងមុនចូលឆ្នាំ ពេលចូលឆ្នាំ និងក្រោយពិធីចូលឆ្នាំ។
លោកមានប្រសាសន៍ថា៖ «យើងត្រៀមកម្លាំងចម្រុះប្រហែលជាង ២ ២០០ នាក់ ដែលមានទាំងកម្លាំងការិយាល័យជំនាញ កម្លាំងអធិការខណ្ឌ កម្លាំងប៉ុស្តិ៍ កម្លាំងចរាចរណ៍ កម្លាំងខាងអគ្គិភ័យ និងកម្លាំងអន្តរាគមន៍ពិសេស។ កម្លាំងគ្រប់ផ្នែកទាំងអស់នឹងធ្វើការសហការគ្នាដើម្បីធ្វើកិច្ចការងារការពារពលរដ្ឋ»។
លោក សាន សុខសីហា បន្ថែមថា កម្លាំងចរាចរណ៍ជាច្រើនរយនាក់បានធ្វើការពង្រាយនៅគ្រប់គោលដៅក្នុងក្រុង ជាពិសេសគឺគោលដៅច្រកចេញ-ចូលក្រុងធ្វើយ៉ាងណាដើម្បីជួយសម្រួលដល់ការធ្វើដំណើររបស់ប្រជាពលរដ្ឋកុំឱ្យមានការកកស្ទះ ដោយសារក្នុងពិធីបុណ្យចូលឆ្នាំពួកគាត់នឹងធ្វើដំណើរចេញទៅស្រុកកំណើត និងវិលមកវិញបន្ទាប់ពីចប់ចូលឆ្នាំ។
លោកថា៖ «វិធានការរបស់មន្ត្រីយើង គឺធ្វើយ៉ាងម៉េចត្រូវអនុវត្តឱ្យបានល្អ ដើម្បីជួយសម្រួលក្នុងកិច្ចការងារនេះហើយចំពោះមន្ត្រីអគ្គិភ័យគឺមានអ្នកប្រចាំការ ២៤ ម៉ោង ដើម្បីជួយសង្គ្រោះនៅពេលដែលមានបាតុភាពអ្វីមួយកើតឡើង។ យើងក៏មានកម្លាំងអន្តរាគមន៍ពិសេសត្រៀមជាប្រចាំក្នុងករណីមានបញ្ហាអ្វីកើតឡើង»។ កម្លាំងដែលបានត្រៀមនេះនឹងការពារនៅតាមទីវត្តអារាម កន្លែងកម្សាន្ត និងទីកន្លែងសំខាន់ៗជាច្រើនទៀតដែលប្រជាពលរដ្ឋទៅកម្សាន្ត។
ទន្ទឹមនឹងនេះដែរអភិបាលរាជធានីភ្នំពេញ លោក ឃួង ស្រេងក៏បានធ្វើការណែនាំទៅដល់អាជ្ញាធរអភិបាលខណ្ឌទាំង ១៤ ឱ្យយកចិត្តទុកការពារសន្តិសុខសណ្តាប់ធ្នាប់នៅគ្រប់ទីកន្លែងកម្សាន្តសប្បាយ ដើម្បីបង្កើនភាពកក់ក្តៅដល់ប្រជាពលរដ្ឋ និងត្រូវទប់ស្កាត់ឱ្យខាងតែបាននូវការលេងល្បែងមួយចំនួនដែលមិនត្រូវបានអនុញ្ញាត។
លោក ឃួង ស្រេង បានលើកឡើងថា អភិបាលខណ្ឌទាំង ១៤ ត្រូវយកចិត្តទុកដាក់ណែនាំដោយហាមដាច់ខាតមិនអនុញ្ញាតឱ្យប្រជាពលរដ្ឋលេងល្បែងជះទឹក ឬបាញ់ទឹកដាក់គ្នានៅតាមផ្លូវសាធារណៈ តំបន់រមណីយដ្ឋាន កន្លែងកម្សាន្តសប្បាយៗ ទីវត្តអារាម និងកន្លែងរៀបចំសង្ក្រាន្តវត្តភ្នំឡើយក្នុងឱកាសបុណ្យចូលឆ្នាំថ្មីនាពេលខាងមុខ។
លោកថ្លែងថា៖ «កងកម្លាំងចម្រុះត្រូវទប់ស្កាត់ឱ្យខាងតែបានករណីលេងល្បែងបាញ់ទឹក ដោយសារវាក៏ជាបញ្ហាប្រឈមមួយនាំឱ្យឆ្លងរីករាលដាលនៃជំងឺកូវីដ ១៩ ផងដែរ ខណៈដែលជំងឺនេះមិនទាន់មានស្ថានភាពថមថយនៅឡើយទេ»។
លោក ឃួង ស្រេង ក៏បញ្ជាក់ផងដែរថា រដ្ឋបាលរាជធានីភ្នំពេញបានត្រៀមលក្ខណៈរួចរាល់ក្នុងការរៀបចំកម្មវិធីសង្ក្រាន្តឆ្នាំថ្មីនៅទីតាំងតំបន់ប្រវត្តិសាស្ត្រវត្តភ្នំហើយនៅតាមវត្តទាំង ១៥០ នៅទូទាំងរាជធានីភ្នំពេញក៏ត្រូវរៀបចំកម្មវិធីទទួលទេវតាឆ្នាំថ្មី និងការរៀបចំកម្មវិធីកម្សាន្តសប្បាយមានរាំច្រៀង លេងល្បែងប្រជាប្រិយខ្មែរ ដើម្បីទទួលអំណរទេវតាឆ្នាំថ្មី។
ជាមួយគ្នានោះដែរ ក៏បានណែនាំឱ្យមន្ទីរសាធារណការ និងដឹកជញ្ជូនរាជធានីភ្នំពេញ រៀបចំសោភណភាព តុបតែងលម្អភ្លើងចម្រុះពណ៌នៅតាមដងផ្លូវ ទីវត្តអារាម និងនៅតំបន់រមណីយដ្ឋានវត្តភ្នំ ដើម្បីធ្វើយ៉ាងណាឱ្យទីតាំងទាំងនោះកាន់តែមានសម្រស់ស្រស់ស្អាតនាពេលរាត្រី ជាទីក្រុងស៊ីវិល័យ ដែលទទួលស្វាគមន៍ភ្ញៀវទេសចរ និងពលរដ្ឋដែលមកលេងកម្សាន្តនាឱកាសបុណ្យចូលឆ្នាំថ្មី។
គួរបញ្ជាក់ថា ប្រមុខរាជរដ្ឋាភិបាលបានប្រកាសឱ្យប្រជាពលរដ្ឋចូលរួមប្រារព្ធពិធីបុណ្យចូលឆ្នាំថ្មីប្រពៃណីជាតិដែលនឹងប្រព្រឹត្តទៅនាថ្ងៃទី ១៤-១៥ និងទី ១៦ ខែមេសាខាងមុខ បន្ទាប់ពីប្រទេសកម្ពុជាបានខកខានប្រារព្ធពិធីបុណ្យនេះ រយៈពេល ២ ឆ្នាំមកហើយ ដោយសារការឆ្លងរាលដាលកូវីដ ១៩៕