The Phnom Penh Post Search

Search form




Logo of Phnom Penh Post newspaper Phnom Penh Post - ខេត្ត​ចំនួន ​៦ ​ប្តេជ្ញា​សម្រេច​ឱ្យបាន​ការបញ្ឈប់​ការ​បន្ទោបង់​ពាសវាល​ពាសកាល​ត្រឹម​ឆ្នាំ​ ២០២៣

ខេត្ត​ចំនួន ​៦ ​ប្តេជ្ញា​សម្រេច​ឱ្យបាន​ការបញ្ឈប់​ការ​បន្ទោបង់​ពាសវាល​ពាសកាល​ត្រឹម​ឆ្នាំ​ ២០២៣

Content image - Phnom Penh Post
បន្ទប់ទឹក​សាធារណៈ​នៅ​ក្រុងព្រះសីហនុ​។ រូបថត រដ្ឋបាលខេត្ត​ព្រះសីហនុ

ខេត្ត​ចំនួន ​៦ ​ប្តេជ្ញា​សម្រេច​ឱ្យបាន​ការបញ្ឈប់​ការ​បន្ទោបង់​ពាសវាល​ពាសកាល​ត្រឹម​ឆ្នាំ​ ២០២៣

ភ្នំពេញៈ រដ្ឋាភិបាល​តាមរយៈ​ក្រសួង​អភិវឌ្ឍន៍ជនបទ​បានដាក់​ចេញ​នូវ​ផែនការ​ជំហាន​ទី ​២ រយៈពេល​ខ្លី ដើម្បី​ធ្វើយ៉ាងណា​សម្រេច​ឱ្យបាន​នូវ​ការបញ្ឈប់​ការ​បន្ទោបង់​ពាសវាល​ពាសកាល នៅក្នុង​ខេត្ត​ចំនួន​ ៦ នៅត្រឹម​ឆ្នាំ ២០២៣ និង​សម្រេច​ឱ្យបាន​ទាំងអស់​ ២៥ ​រាជធានី ខេត្ត​នៅត្រឹម​ឆ្នាំ​ ២០២៥​។

លោក ជ្រាយ ប៉ុម អគ្គនាយក​បច្ចេកទេស​នៃ​ក្រសួង​អភិវឌ្ឍន៍​ជនបទ​ប្រាប់​ភ្នំពេញ​ប៉ុស្តិ៍​នៅ​ថ្ងៃទី ​៦ ខែមេសា​ថា ​បច្ចុប្បន្ន​ក្រសួង​បាននិងកំពុង​អនុវត្ត​ផែនការ​សកម្មភាព​ជាតិ​ជំហាន​ទី​ ២ (២០១៩-២០២៣) ក្នុង​គោលដៅ​សម្រេច​ឱ្យបាន ៩០ % នៅ​ឆ្នាំ​ ២០២៣ ខណៈ​មកដល់​ពេលនេះ សម្រេច​បាន​ជិត ៨០% ហើយ​។ លោក​បន្តថា តាម​ការណែនាំ​របស់​លោក អ៊ុក រ៉ាប៊ុន រដ្ឋមន្ត្រី​ក្រសួង​អភិវឌ្ឍន៍ជនបទ គឺ​ធ្វើយ៉ាងណា​ឱ្យ​ខេត្ត​ចំនួន ៥ ជា​ខេត្ត​ឈានទៅ​សម្រេច​ឱ្យបាន​នូវ​ការបញ្ឈប់​ការបន្ទោបង់​ពាសវាល​ពាសកាល នៅ​ឆ្នាំ ​២០២៣ រួមមាន​ខេត្ត​កែប ខេត្ត​កំពង់ឆ្នាំង កំពង់ស្ពឺ ស្វាយរៀង និង​ព្រៃវែង​។

ទោះជា​យ៉ាងណា លោក ថា កាលពីពេល​ថ្មីៗ​នេះ ខេត្ត​កណ្តាល​ក៏បាន​ប្តេជ្ញា​នឹង​សម្រេច​ឱ្យបាន​នូវ​ការបញ្ឈប់​ការបន្ទោបង់​ពាសវាល​ពាសកាល នៅមុន​ឆ្នាំ​ ២០២៣ ផងដែរ​។ ដូច្នេះ​មាន​ខេត្ត​ចំនួន ​៦ ដែល​នឹង​ជោគជ័យ​លើ​ផែនការ​នេះ ហើយនឹង​ឈានទៅ​សម្រេច​ឱ្យបាន ​១០០% នៅ​ឆ្នាំ​ ២០២៥​។ «​យើង​មាន​ផែនការ​ច្បាស់លាស់​របស់​យើង​ដើម្បី​សម្រេច​ឱ្យបាន​គោលដៅ​នេះ​»​។

បើតាម​លោក ជ្រាយ ប៉ុម ការបញ្ឈប់​ការ​បន្ទោបង់​ពាសវាល​ពាសកាល​តាម​ផែនការ​កំណត់​នេះ​នឹង​កាត់បន្ថយ​ផលប៉ះពាល់​ដល់​សុខភាព អប់រំ និង​ទេសចរណ៍ ខណៈ​តាម​ការសិក្សា បង្ហាញថា ក្នុង​ ១​ ឆ្នាំៗ កម្ពុជា​ខាតបង់​ថវិកា​ ៤៧៧​ លាន​ដុល្លារ​អាមេរិក​លើ​បញ្ហា​សុខភាព​សាធារណៈ​ដែល​បង្កឡើង​ពី​ការ​បន្ទោបង់​ពាសវាល​ពាសកាល​នេះ​។

លោក យី គឹមថាន នាយករង​ប្រចាំ​ប្រទេស​ទទួល​បន្ទុក​កម្មវិធី​នៃ​អង្គការ​ភ្លែន​អន្តរជាតិ​កម្ពុជា ប្រាប់​ភ្នំពេញ​ប៉ុស្តិ៍​នៅ​ថ្ងៃទី​ ៦ ខែមេសា​ថា អង្គការ​ភ្លែន-​អន្តរជាតិ​កម្ពុជា​បាន​គាំទ្រ និង​ចូលរួម​យ៉ាងសកម្ម​ដើម្បី​ពន្លឿន​ការបញ្ឈប់​ការបន្ទោបង់​ពាសវាល​ពាលកាល ព្រោះ​ការបន្ទោបង់​ពាសវាល​ពាសកាល​នេះ​ធ្វើឱ្យប៉ះពាល់​យ៉ាងធ្ងន់ធ្ងរ​ទៅលើ​សុខភាព​កុមារ ដែល​ធ្វើឱ្យ​កុមារ​ងាយ​ទទួលរង​នូវ​ជំងឺ​រាករូស និង​ជំងឺ​ផ្សេងៗ​។

លោក​បន្តថា ជាពិសេស​នៅពេល​បន្ទោបង់​ពាសវាល​ពាសកាល លាមក​នឹង​ហូរ​ចូលទៅក្នុង​ទឹក នៅពេលដែល​យក​ទឹក​នោះមក​ប្រើប្រាស់ វា​នឹង​កើត​ជំងឺ​រាករូស និង​កើត​ព្រូន​ជាដើម និង​ធ្វើឱ្យ​កុមារ​ក្រិន​ប៉ះពាល់​ដល់​ការលូតលាស់ និង​ប៉ះពាល់​ដល់​ខួរក្បាល​កុមារ​ទៅ​ថ្ងៃ​អនាគត​។ ទោះជា​យ៉ាងណា មកដល់​បច្ចុប្បន្ននេះ កម្ពុជា​សម្រេចបាន​ជាង ៧០% លើ​ផែនការ​បញ្ឈប់​ការបន្ទោបង់​ពាសវាល​ពាសកាល​នេះ​។

លោក​ថ្លែងថា​៖ «​យើង​គាំទ្រ ព្រោះ​វា​ស្ថិតនៅ​ក្នុងទិសដៅ និង​យុទ្ធសាស្ត្រ​របស់​អង្គការ​ភ្លែន រយៈពេល ​៥ ​ឆ្នាំ​ទៅមុខទៀត ដែល​ផ្តោតទៅលើ​កម្មវិធី​ចាប់ផ្តើម​សុខភាព​ល្អ​។ អ៊ីចឹង​ការងារ​ហ្នឹង ជា​ការងារ​អាទិភាព​»​។

ក្នុង​កិច្ចប្រជុំ​កំពូល​ថ្នាក់ក្រោម​ជាតិ ស្តីអំពី​ការពន្លឿន​ការបញ្ឈប់​ការ​បន្ទោបង់​ពាសវាល​ពាសកាល​នៅ​ខេត្ត​ព្រះសីហនុ ពីថ្ងៃ​ទី ​៦ ខែមេសា ឆ្នាំ​ ២០២២ លោក ជ្រុន ថេរ៉ាវ៉ាត រដ្ឋលេខាធិការ​ក្រសួង​អភិវឌ្ឍន៍ជនបទ​បាន​បញ្ជាក់ថា គិត​ត្រឹម​ត្រីមាស​ទី​ ៣ ឆ្នាំ​ ២០២១ ប្រជាជន​នៅតាម​តំបន់​ជនបទ ទូទាំង​រាជធានី-​ខេត្ត ចំនួន ៧៧,២% មាន​បង្គន់​អនាម័យ​ប្រើប្រាស់ ខណៈ​ប្រជាជន​ជនបទ​ប្រមាណ ៧៣,៤ % មាន​ទឹកស្អាត​ប្រើប្រាស់​គ្រប់គ្រាន់​។ លោក​បន្តថា​៖ «​យោងតាម​ការអង្កេត​សេដ្ឋកិច្ច​សង្គមកិច្ច​កម្ពុជា តាម​ការវាយតម្លៃ​គិតដល់​ដំណាច់ត្រីមាស​ទី​ ៣ ឆ្នាំ​ ២០២១ ប្រជាជន​ជនបទ​ប្រមាណ ៧៣,៤% មាន​ទឹកស្អាត​ប្រើប្រាស់​។ អត្រា​នៃ​ការទទួលបាន​អនាម័យ​បាន​កើន​ពី​ ៧០,៩% នៅ​ឆ្នាំ​ ២០១៧ ដល់​៧៤,២% នៅ​ឆ្នាំ ​២០១៩​។ នៅ​ឆ្នាំ​ ២០២១ ប្រជាជន​ជនបទ​ប្រមាណ​ ៧៧,២% មាន​បង្គន់​អនាម័យ​ប្រើប្រាស់​»៕

វីដេអូ៖

អត្ថបទគួរចាប់អារម្មណ៍