ក្រសួងអប់រំ យុវជន និងកីឡា បានកំណត់យកសម័យប្រឡងសញ្ញាបត្រមធ្យមសិក្សាទុតិយភូមិនៅថ្ងៃទី ១៤ ខែ វិច្ឆិកា ឆ្នាំ ២០២២ ដោយក្រសួងបានចេញនូវសេចក្តីណែនាំពីដំណើរការនៃការប្រឡងនេះ ដែលការទទួលពាក្យសុំចុះឈ្មោះប្រឡងនេះធ្វើឡើងនៅតាមវិទ្យាល័យចាប់ពីថ្ងៃទី ០១ ដល់ទី ៣១ ខែ ឧសភា ឆ្នាំ ២០២២។
យោងតាមសេចក្តីណែនាំដែលចុះហត្ថលេខាដោយ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នៅថ្ងៃទី៣១ ខែមីនា ដែលភ្នំពេញប៉ុស្តិ៍ទទួលបាននៅថ្ងៃទី០៨ ខែមេសា នេះបានឱ្យដឹងថា ការរៀបចំការណែនាំនេះ ដើម្បីធានាគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបានក្នុងការប្រឡងសញ្ញាបត្រមធ្យមសិក្សាទុតិយភូមិឱ្យមានប្រសិទ្ធភាព។
ទាក់ទងនឹងការកំណត់មណ្ឌលប្រឡង ប្រធានមន្ទីរអប់រំ យុវជន និងកីឡារាជធានីខេត្តត្រូងធ្វើសំណើមណ្ឌលប្រឡងជូនរដ្ឋមន្ត្រីក្រសួង ដោយផ្អែកលើគោលការណ៍និងលក្ខខណ្ឌមួយចំនួនផងដែរ ដូចជា ប្រមូលផ្តុំគ្រឹះស្ថានសិក្សាចាប់ពីបឋមសិក្សឡើងទៅទាំងសាធារណៈ និងឯកជននៅក្នុងរាជធានីនិងទីរួមខេត្ត។ ក្នុងករណី ខេត្តណាមិនអាចអនុវត្តបាន ត្រូវប្រមូលផ្តុំនៅទីរួមស្រុក ដែលនៅជិតទីរួមខេត្តជាងគេ។
សម្រាប់កាលបរិច្ឆេទដំណើរការកំណែប្រព្រឹត្តទៅចាប់ពីថ្ងៃទី១៩-២៣ ខែវិច្ឆិកា ឆ្នាំ២០២២ នៅតាមមណ្ឌលកំណែប្រមូលផ្តុំរាជធានីភ្នំពេញ។
លោក ហង់ជួន ណារ៉ុន បានលើកឡើងឱ្យដឹងថា ប្រធានមន្ទីរអប់រំ យុវជន និងកីឡា រាជធានីខេត្តត្រូវចាត់តាំងតំណាងឱ្យមកទទួលយកបញ្ជីប្រកាសលទ្ធផលប្រឡងនៅនាយកដ្ឋានកិច្ចការប្រឡង នៅថ្ងៃទី៦ ខែធ្នូ ឆ្នាំ២០២២ ដើម្បីយកទៅបិទផ្សាយនៅតាមមណ្ឌលសំណេរនីមួយៗនារសៀលថ្ងៃទី០៦ ខែធ្នូ សម្រាប់រាជធានីភ្នំពេញ និងខេត្តកណ្តាល។
លោកបានបន្តថា សម្រាប់ខេត្តផ្សេងនៅទូទាំងប្រទេសនឹងបិទផ្សាយលទ្ធផលប្រឡងនេះនៅថ្ងៃទី០៧ ខែធ្នូ ឆ្នាំ២០២២ ហើយការបើកស្រោមបញ្ជីប្រកាសលទ្ធផលត្រូវធ្វើនៅតាមមណ្ឌលសំណេររៀងៗខ្លួន ដោយមានការចូលរួមពីអាជ្ញាធរដែនដី និងត្រូវមានរបាយការណ៍ប្រគល់មកនាយកដ្ឋានកិច្ចការប្រឡងផងដែរ៕