ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បានលើកឡើងថា គណបក្សប្រជាជន បម្រើប្រជាជនដោយស្មោះស្ម័គ្រ និងបានប្រឹងប្រែងណាស់ដើម្បីការពារអាយុជីវិតប្រជាជន ជាពិសេសពេលកំពុងឆ្លងកាត់ការលំបាកនៃការរីករាលដាលជំងឺកូវីដ ១៩។
លោកបានសរសេរលើបណ្តាញសង្គមហ្វេសប៊ុករបស់លោកកាលពីថ្ងៃទី ០៦ ខែមេសាថា៖ «ប្រសិនបើយើងគិតពីការចាក់វ៉ាក់សាំងកូវីដ ១៩ មិនថាវ៉ាក់សាំងណានោះទេ សំខាន់យើងមានវ៉ាក់សាំងចាក់ជូនប្រជាជន។ ទោះបីជាកម្ពុជាសម្រេចបានការចាក់វ៉ាក់សាំងជាង ៩២ ភាគរយហើយក៏ដោយ ក៏រាជរដ្ឋាភិបាលនៅតែបន្តបញ្ជាទិញវ៉ាក់សាំងបន្ថែម ដើម្បីចាក់ជូនប្រជាពលរដ្ឋជាបន្តបន្ទាប់»។
លោក ហ៊ុន ម៉ានី បានបន្តថា បន្ថែមលើសពីនេះទៅទៀតនោះ ប្រសិនបើគ្រប់គ្នាត្រឡប់ទៅមើលវិធានការនានារបស់រាជរដ្ឋាភិបាលរួមទាំងការបិទខ្ទប់នានា ប្រាកដជាយល់អំពីចេតនារបស់ថ្នាក់ដឹកនាំ ដែលចង់ឱ្យប្រជាជនបានសុខ ឬបានចាកផុតពីការឆ្លងមេរោគទាំងអស់នោះ ព្រមទាំងធ្វើយ៉ាងណារក្សាលំនឹងសេដ្ឋកិច្ច និងស្ថិរភាពសង្គម។
ទន្ទឹមនឹងពេលដែលប្រជាជនបាននៅក្នុងផ្ទះ ដើម្បីឱ្យបានចៀសពីមេរោគ តែមន្ត្រី កងកម្លាំង និងអាជ្ញាធរមិនត្រឹមតែមិនបានសម្រាកនៅផ្ទះនោះទេ តែពួកគាត់ខំប្រឹងប្រែងទាំងថ្ងៃទាំងយប់ដើម្បីអនុវត្តការងារ ថែមទាំងត្រូវប្រឈមមុខខ្ពស់នៃការឆ្លងជំងឺកូវីដ ១៩ទៀតផង។
លោកបានបន្ថែមថា៖ «ចេញពីវិធានការណ៍ទាំងអស់នោះហើយ ទើបយើងមានលទ្ធភាពបើកប្រទេសមកស្ថានភាពធម្មតាវិញ ជាពិសេសបងប្អូនបានសប្បាយរីករាយក្នុងការប្រារព្ធពិធីបុណ្យចូលឆ្នាំថ្មី និងការជួបជុំនានា ក្នុងពេលដែលប្រទេសមួយចំនួនកំពុងតែជួបប្រទះអត្រាឆ្លងខ្ពស់នៃការរាតត្បាតនៅឡើយ»៕