មន្ត្រីជាន់ខ្ពស់នៃក្រសួងសាធារណការ និងដឹកជញ្ជូន បានបង្ហាញពីការសោកស្តាយដែលក្នុងចំណោមអ្នកស្លាប់ដោយគ្រោះថ្នាក់ចរាចរណ៍ក្នុងរយៈពេលប៉ុន្មានឆ្នាំចុងក្រោយនេះគឺ មានប្រមាណជាង ៩០% ជាអ្នកប្រើម៉ូតូ ក្នុងនោះមានជាង ៧០% មិនបានពាក់មួកសុវត្ថិភាពជាក់ស្តែង។
នេះជាការថ្លែងឡើងរបស់លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក នាថ្ងៃទី០៨ ខែមេសានេះ ក្នុងកិច្ចប្រជុំស្តីពីលទ្ធភាពក្នុងការផ្តល់មួកសុវត្ថិភាពដែលមានគុណភាពដល់កម្មករ និយោជិត និងកុមារកម្ពុជា។
លោកស្រីបានឱ្យដឹងថា កម្ពុជាជាប្រទេសដែលមានប្រជាពលរដ្ឋជាច្រើនពេញនិយមក្នុងការប្រើប្រាស់ម៉ូតូ ដែលចាំបាច់តម្រូវឱ្យមានការពាក់មួកសុវត្ថិភាពដែលមានគុណភាពល្អ ដើម្បីការពារអាយុជីវិតដោយការប៉ះទង្គិចក្បាលពេលមានគ្រោះថ្នាក់ចរាចរណ៍ជាយថាហេតុ។
លោកស្រី មឹន មាណវី បានមានប្រសាសន៍ថា ៖ «បច្ចុប្បន្នទន្ទឹមនឹងការធ្វើដំណើររួមតាមរថយន្ត ដែលខ្លះមានស្តង់ដាសុវត្ថិភាព និងខ្លះមិនទាន់មានសុវត្ថិភាព កម្មករនិយោជិតមួយចំនួនបានងាកមកប្រើម៉ូតូក្នុងការទៅមកបំពេញភារកិច្ចប្រចាំថ្ងៃ ហើយទោះបីមានការរឹតបន្ដឹងច្បាប់លើការពាក់មួកសុវត្ថិភាពនេះក៏ដោយ ប៉ុន្តែប្អូនៗ ក្មួយៗមួយចំនួនមិនទាន់យកចិត្តទុកដាក់ពាក់មួកសុវត្ថិភាពឱ្យបានត្រឹមត្រូវនៅឡើយ»។
លោកស្រីថា កុមារដែលត្រូវបានអាណាព្យាបាលដឹកទៅសាលារៀន ឬធ្វើដំណើរទៅតាមធុរកិច្ចរបស់គាត់ ក៏មិនទាន់អនុវត្តការពាក់មួកសុវត្ថិភាពបានគ្រប់ៗគ្នាដែរ។
យោងតាមរបាយការណ៍ដែលទទួលបានពីអគ្គស្នងការនគរបាលជាតិ ក្នុងត្រីមាសទី១ឆ្នាំ២០២២នេះ មានអ្នកស្លាប់ដោយគ្រោះថ្នាក់ចរាចរណ៍ចំនួន៤៩៣នាក់ ក្នុងនោះអ្នកប្រើម៉ូតូ៤០៣នាក់ហើយមិនពាក់មួកសុវត្ថិភាព២៩៧នាក់ របួសធ្ងន់៧៨៤នាក់ របួសស្រាល ៤៧៨នាក់។
ក្នុងឆ្នាំ២០២០ គ្រោះថ្នាក់ ចរាចរណ៍បណ្តាលឲឱ្យកម្មករស្លាប់ចំនួន៥២១នាក់ ស្មើ២៩%នៃចំនួនអ្នកស្លាប់ ១ ៧៩៨ នាក់ កុមារអាយុ ក្រោម១៥ឆ្នាំ ចំនួន ១១៣នាក់ ស្មើ៦% កុមារតូចចំនួន ៤២ នាក់ ស្មើ ២% ។
របាយការណ៍ដដែលថា មូលហេតុបង្កគឺនៅតែល្បឿន នាំមុខ បន្ទាប់មកការមិនគោរពសិទ្ធិអាទិភាព ការបត់ និងជែងក្នុងស្ថានភាពគ្រោះថ្នាក់ ការមិនប្រកាន់ស្តាំ ការបើកបរក្រោមឥទ្ធិពលនៃគ្រឿងស្រវឹង កត្តាយានយន្ត ការប្រើទូរស័ព្ទនិងងងុយ។
លោកស្រី មឹន មាណវី បានបញ្ជាក់ថា ៖ «ដូចនេះការបង្កើតកម្មវិធីនេះ គឺពិតជាមានសារៈសំខាន់ ដែលទន្ទឹមនឹងការស្វែងរកមួកសុវត្ថិភាព ខ្ញុំសំណូមពរថាមុននឹងប្រគល់ជូនគាត់ចាំបាច់ត្រូវមានការអប់រំផ្សព្វផ្សាយឱ្យគាត់យល់ដឹងពីច្បាប់និងវិធានសុវត្ថិភាពចរាចរណ៍សម្រាប់ការប្រើប្រាស់ម៉ូតូដែរ»។
លោកស្រីថា ការគិតគូរដល់សុខទុក្ខលើធនធានមនុស្សទាំងនេះ គឺពិតជាស្របតាមឆន្ទៈដ៏មោះមុតច្បាស់លាស់របស់រាជរដ្ឋាភិបាលកម្ពុជាក្នុងការខិតខំថែរក្សាសុខសន្តិភាពនិងអាយុជីវិតនិងលើកកម្ពស់ជីវភាពរបស់ប្រជាពលរដ្ឋស្របជាមួយនឹងគោលដៅអភិវឌ្ឍប្រកបដោយចីរភាព របស់អង្គការសហប្រជាជាតិផងដែរ។
ជាមួយគ្នានេះដែរ លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំនៅកម្ពុជា បានលើកឡើងឱ្យដឹងដែរថា ស្របពេលដែលមានការវិវឌ្ឍជាវិជ្ជមានគួរឱ្យកត់សម្គាល់មួយចំនួនក្នុងកិច្ចខិតខំលើកកម្ពស់សុវត្ថិភាពចរាចរណ៍នៅកម្ពុជា គ្រោះថ្នាក់ចរាចរណ៍នៅតែជាបញ្ហាប្រឈមដ៏ធ្ងន់ធ្ងរបំផុតមួយសម្រាប់ប្រទេសកម្ពុជា ដោយក្នុងមួយថ្ងៃៗគ្រោះថ្នាក់នេះបានសម្លាប់ជីវិតមនុស្ស និងបង្កឱ្យមានការរងរបួសធ្ងន់ស្រាលជាច្រើននាក់ ព្រមទាំងបន្សល់ទុកនូវផលលំបាកជាច្រើនដល់ក្រុមគ្រួសារជនរងគ្រោះ និង សង្គមជាតិ។
លោកបានបន្តថា ក្នុងករណីជាច្រើនជនរងគ្រោះត្រូវសម្រាកថែទាំនៅមន្ទីរពេទ្យ និងផ្ទះរបស់ខ្លួនជាច្រើនថ្ងៃ-ខែ ឯខ្លះទៀតត្រូវធ្លាក់ខ្លួនពិការ បាត់បង់ការសិក្សា ឬសមត្ថភាពបំពេញការងារសម្រាប់ទ្រទ្រង់ជីវភាពគ្រួសារ តម្រូវឱ្យឪពុកម្តាយ ឬបងប្អូនសាច់ញាតិត្រូវទទួលបន្ទុកនៅមើលថែទាំជាប្រចាំ។
លោក គឹម បញ្ញា បានបញ្ជាក់ថា ៖ «ទន្ទឹមនឹងនេះ គ្រោះថ្នាក់ចរាចរណ៍ក៏ជាបញ្ហាប្រឈមដ៏ចម្បងគួរឱ្យព្រួយបារម្ភយ៉ាងខ្លាំងមួយដែរសម្រាប់កុមារកម្ពុជា និងកម្មករនិយោជិត ជាពិសេសអ្នកដែលកំពុងបម្រើការងារក្នុងវិស័យកាត់ដេរសម្លៀកបំពាក់ និងផលិតស្បែកជើងដែលមានប្រមាណជាង ៨០០ ០០០នាក់តែម្តង»។
លោកបានបន្តថា ក្នុងចំណោមជនរងគ្រោះចំនួន២១៥២នាក់ ដែលបានស្លាប់ដោយសារគ្រោះថ្នាក់ចរាចរណ៍កាលពីឆ្នាំ២០១៩ ប្រមាណជិត ៤០%គឺជាកុមារ និងកម្មករនិយោជិត។ ភាគច្រើននៃជនរងគ្រោះ គឺជាអ្នកជិះម៉ូតូ ហើយប្រមាណជាង ៧០% មិនបានពាក់មួកសុវត្ថិភាពនៅពេលទទួលរងគ្រោះថ្នាក់ចរាចរណ៍។
លោក គឹម បញ្ញា បានថ្លែងថា ៖«ការការពារខួរក្បាល ឬផ្នែកក្បាលរបស់មនុស្សគ្រប់រូប ជាពិសេសសម្រាប់កុមារ វាពិតជាចាំបាច់ និងមានសារៈសំខាន់ណាស់។ ក្នុងពិភពលោកយើងអាចនិយាយបានថា ពុំទាន់មានថ្នាំដ៏មានប្រសិទ្ធភាពសម្រាប់ព្យាបាលខួរក្បាល/របួសក្បាលនោះទេ ពិសេសពីករណីគ្រោះថ្នាក់ចរាចរណ៍នៅពេលដែលធ្វើដោយទោចក្រយាន (កង់) ឬទោចក្រយានយន្ត (ម៉ូតូ)»។
លោកបានបន្ថែមថា ៖ «ប៉ុន្តែយើងអាចការពារខួរក្បាល និងផ្នែកក្បាលដ៏មានសារៈសំខាន់បំផុតរបស់យើងយ៉ាងមានប្រសិទ្ធភាពខ្ពស់ពីគ្រោះថ្នាក់ចរាចរណ៍ តាមរយៈទង្វើដ៏សាមញ្ញគឺដោយការពាក់មួកសុវត្ថិភាពដែលមាន គុណភាពល្អ និងបានត្រឹមត្រូវ»។
មួកសុវត្ថិភាពគឺជាវត្ថុសាមញ្ញ មានតម្លៃសមរម្យ ប៉ុន្តែវាមានប្រសិទ្ធភាពខ្ពស់អាចការពារការរងរបួសក្បាលធ្ងន់ធ្ងរ ឬខួរក្បាលពីគ្រោះថ្នាក់ចរាចរណ៍។
យោងតាមការសិក្សាជាអន្តរជាតិមួយបានឱ្យដឹងថា ការពាក់មួកសុវត្ថិភាព ពិតជាបានជួយកាត់បន្ថយហានិភ័យនៃការរងរបួសក្បាលធ្ងន់ធ្ងរបានរហូត ដល់ប្រមាណ ៦៩ភាគរយ និងការស្លាប់បានប្រមាណជា៤២ភាគរយ។ ដូច្នេះកិច្ចខិតខំជំរុញការពាក់មួកសុវត្ថិភាពឱ្យបានគ្រប់ៗគ្នា ដែលជាទង្វើសាមញ្ញ ប៉ុន្តែអាចការពារអាយុជីវិតបាន និងជាញឹកញាប់តែងតែត្រូវបានកំណត់ ដោយច្បាប់ ពិតជាចាំបាច់ខ្លាំងណាស់សម្រាប់បណ្តាប្រទេសនានាក៏ដូចជាសម្រាប់ប្រទេសកម្ពុជាដែលមានអ្នកប្រើប្រាស់ផ្លូវភាគច្រើនជាអ្នកជិះម៉ូតូ (អ្នកបើកបរ និងអ្នករួមដំណើរ) ហើយជនរងគ្រោះថ្នាក់ចរាចរណ៍ភាគច្រើនលើសលប់គឺជាអ្នកជិះម៉ូតូ ហើយទទួលរងការប៉ះទង្គិចក្បាលតែម្តង៕
វីដេអូ៖