ដំណើរការជួសជុលខ្លោងទ្វារតាកាវនៅភាគខាងលិចរបស់ក្រុងអង្គរធំ បានសម្រេចលទ្ធផលប្រមាណ ៧០ ភាគរយហើយរហូតមកដល់ពេលនេះ។ នេះបើតាមការលើកឡើងរបស់មន្ត្រីជំនាញរបស់នាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជ្ញាធរជាតិអប្សរា។
តាមរយៈអាជ្ញាធរជាតិអប្សរា កញ្ញា ម៉េង សុវណ្ណលីលីន ស្ថាបត្យករ និងជាក្រុមការងារបច្ចេកទេសជួសជុលខ្លោងទ្វារតាកាវ បានឱ្យដឹងថា គិតមកដល់ត្រឹមថ្ងៃទី ០៨ ខែមេសា នេះ ក្រុមការងារជួសជុលបានជួយសង្គ្រោះការខូចខាតរបស់ខ្លោងទ្វារតាកាវឱ្យប្រសើរឡើងវិញជាច្រើនចំណុច។ ចំណុចទាំងនោះមានដូចជា រូបដំរីទាំង ៤ ដែលខូចខាតធ្ងន់ធ្ងរ តែបានជួសជុលជិតរួចរាល់ មុខព្រហ្មខាងលិច និងខាងជើងដែលត្រូវជួសជុលត្រឹមម្កុដ ក៏ជិតរួចរាល់ដែរ។ ចំណែក មុខព្រហ្មខាងកើត និងខាងត្បូងកំពុងជួសជុលបន្ត។
កញ្ញា ម៉េង សុវណ្ណលីលីន បានបន្តទៀតថា៖ «រហូតមកដល់ត្រឹមថ្ងៃទី ០៨ ខែមេសានេះ ក្រុមការងារជួសជុលខ្លោងទ្វារតាកាវបានសម្រេចលទ្ធផលប្រមាណ ៧០ ភាគរយហើយ។ បច្ចុប្បន្នក្រុមអ្នកជំនាញកំពុងសម្រុកការងារជួសជុលមុខព្រហ្មឱ្យហើយរួចរាល់ ដើម្បីឈានទៅដល់ការជួសជុលកំពូលទាំង ៤ របស់ខ្លោងទ្វារតាកាវដែលជាជំហានជួសជុលចុងក្រោយ»។
អាជ្ញាធរជាតិអប្សរាបានបញ្ជាក់ថា ដោយសារអាយុកាល អាកាសធាតុ ធម្មជាតិ និងកត្តាមនុស្សបណ្តាលឱ្យបង្កាន់ដៃរបស់ខ្លោងទ្វារដែលមានរូបយក្ស និងទេវតាជាច្រើនដួលរលំហើយរចនាសម្ព័ន្ធរបស់ខ្លោងទ្វារមួយភាគធំ ដូចជា រូបដំរីទាំង ៤ និងមុខព្រហ្មជាដើមបានរងការខូចខាតខ្លាំង ដែលតម្រូវឱ្យធ្វើការជួសជុល និងសង្គ្រោះជាចាំបាច់។
ក្រុមអ្នកជំនាញនៃអាជ្ញាធរជាតិអប្សរាបានធ្វើការងារជួយសង្គ្រោះខ្លោងទ្វារតាកាវចាប់តាំងពីអំឡុងខែធ្នូ ឆ្នាំ ២០១៩ ហើយគម្រោងនេះមានរយៈពេលប្រមាណ ២ ឆ្នាំដើម្បីអនុវត្ត ហើយកាលពីថ្ងៃទី ២១ ខែកុម្ភៈ ឆ្នាំ ២០២១ ទើបគម្រោងជួសជុលខ្លោងទ្វារនេះជាផ្លូវការបានចាប់ផ្ដើមឡើង៕