.jpg)
លោក ស ខេង រដ្ឋមន្ត្រីក្រសួងមហាផ្ទៃបានធ្វើការកោតសរសើរដល់កងកម្លាំងនគរបាលជាតិ មន្ត្រីរាជការស៊ីវិល និងមន្ត្រីពន្ធនាគារ ទូទាំងប្រទេសចំពោះកិច្ចខិតខំប្រឹងប្រែង និងការលះបង់ដ៏ធំធេងអស់ពីកម្លាំងកាយ និងប្រាជ្ញាស្មារតី ក្នុងបេសកកម្មបម្រើជាតិ និងប្រជាជនដោយស្មោះស្ម័គ្រ និងការទទួលខុសត្រូវខ្ពស់ក្នុងវិជ្ជាជីវៈ។
លោកបានលើកឡើងតាមរយៈសារជូនពរដល់កងកម្លាំងនគរបាលជាតិ មន្ត្រីរាជការស៊ីវិល និងមន្ត្រីពន្ធនាគារ គ្រប់លំដាប់ថ្នាក់ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានចូលមកដល់នាពេលឆាប់ៗខាងមុខនេះ។
លោក ស ខេង បានឱ្យដឹងថា៖ «ជាមួយនឹងការកោតសរសើរចំពោះស្នាដៃ និងសមិទ្ធផលដែលសម្រេចបាននាពេលកន្លងមក ខ្ញុំក៏សូមយកឱកាសនេះ អំពាវនាវដល់កងកម្លាំងនគរបាលជាតិ មន្ត្រីរាជការស៊ីវិល និងមន្ត្រីពន្ធនាគារគ្រប់លំដាប់ថ្នាក់បន្តយកចិត្តទុកដាក់បំពេញភារកិច្ចយ៉ាងម៉ឺងម៉ាត់តាមបទបញ្ជា និងវិធានការនានារបស់ក្រសួងមហាផ្ទៃ និងរាជរដ្ឋាភិបាល»។
លោកបានបញ្ជាក់ទៀតថា ជាពិសេសចលនាប្រជាពលរដ្ឋគ្រប់មជ្ឈដ្ឋានឱ្យចូលរួមអនុវត្តបានផុលផុសនូវគោលនយោបាយ ភូមិ-ឃុំ មានសុវត្ថិភាពក្នុងគោលដៅថែរក្សាបរិយាកាសសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមបានល្អប្រសើរ ដើម្បីបង្កលក្ខខណ្ឌអំណោយផលដល់ដំណើរការនៃព្រឹត្តិការណ៍បុណ្យចូលឆ្នាំថ្មី ប្រពៃណីជាតិ ឱ្យប្រព្រឹត្តទៅក្នុងបរិយាកាស សប្បាយរីករាយនៅទូទាំងប្រទេសកម្ពុជា។
លោក ស ខេង បានបន្តថា៖ «ទោះបីជាការគ្រប់គ្រង និងស្ថានភាពនៃជំងឺកូវីដ ១៩ មានភាពប្រសើរឡើងយ៉ាងណាក្តី ខ្ញុំសូមស្នើដល់កងកម្លាំងនគរបាលជាតិ មន្ត្រីរាជការស៊ីវិល និងមន្ត្រីពន្ធនាគារទាំងអស់បន្តផ្សព្វផ្សាយបំផុសស្មារតី ម្ចាស់ការប្រុងប្រយ័ត្នខ្ពស់ និងចូលរួមអនុវត្តឱ្យបានខ្ជាប់ខ្ជួននូវវិធានការសុខាភិបាល «៣ កុំ ៣ ការពារ» ដើម្បីចូលរួមបង្ការទប់ស្កាត់ផលប៉ះពាល់អវិជ្ជមានមកលើសុខភាពសាធារណៈ និងជីវភាពរស់នៅរបស់ប្រជាពលរដ្ឋ»៕
