ភ្នំពេញៈ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា បានចេញលិខិតហាមឃាត់ស្ថាបត្យករនិងវិស្វករមិនឱ្យទទួលអនុវត្តការងារសាងសង់ឬរុះរើសំណង់ដែលមិនទាន់មានលិខិតអនុញ្ញាតពីអាជ្ញាធរមានសមត្ថកិច្ចឡើយ។
លោកជា សុផារ៉ា បានលើកឡើងដូចនេះ តាមរយៈលិខិតដែលលោកបានដាក់ជូនអគ្គលេខាធិការនៃគណៈវិស្វករកម្ពុជានិងអគ្គលេខាធិការនៃគណៈស្ថាបត្យករកម្ពុជាកាលពីថ្ងៃទី៨ ខែមេសា ដោយលោកបានបញ្ជាក់ថា ការអនុវត្តការងារសាងសង់ដែលមិនទាន់ទទួលបានលិខិតអនុញ្ញាតសាងសង់ លិខិតអនុញ្ញាតជួសជុល លិខិតអនុញ្ញាតរុះរើ និងលិខិតអនុញ្ញាត បើកការដ្ឋានសំណង់ពីអាជ្ញាធរ ឬមន្ត្រីមានសមត្ថកិច្ចជាអំពើខុសច្បាប់។
លោកបានបញ្ជាក់ថា៖«វាជាអំពើខុសច្បាប់ ព្រោះថា ការសាងសង់ដែលមិនមានប្លង់ស្ថាបត្យកម្មនិងប្លង់គ្រឿងផ្គុំសំណង់ដែលទទួលបានការយល់ព្រមពីអាជ្ញាធរឬមន្ត្រីមានសមត្ថកិច្ចអាចល្មើសនឹងបទប្បញ្ញត្តិស្តីពីធ្លាគម្លាតនគរូបនីយកម្ម និងអាចប៉ះពាល់ដល់សន្តិសុខសណ្តាប់ធ្នាប់សាធារណៈ គុណភាព សុវត្ថិភាពសំណង់ សោភណភាព ទ្រព្យសម្បត្តិ និងសុខុមាលភាពរបស់ម្ចាស់សំណង់ អ្នកប្រើប្រាស់សំណង់ និងសាធារណជន»។
លោក ជា សុផារ៉ា បានបន្ថែមថា ក្រសួងរៀបចំដែនដី នគរូបនីយកម្ម និងសំណង់ស្នើឱ្យអគ្គលេខាធិការនៃគណៈវិស្វករកម្ពុជា ធ្វើការណែនាំវិស្វករដែលចុះបញ្ជីនៅគណៈវិស្វករកម្ពុជាទាំងអស់ មិនឱ្យទទួលអនុវត្តការងារសាងសង់ដែលមិនទាន់ទទួលបានលិខិតអនុញ្ញាតសាងសង់ លិខិតអនុញ្ញាតជួសជុល លិខិតអនុញ្ញាតរុះរើ និងលិខិតអនុញ្ញាតបើកការដ្ឋានសំណង់។
លោកបានបញ្ជាក់ថា៖«ក្រសួងនឹងចាត់មន្ត្រីអធិការកិច្ចសំណង់ចុះធ្វើការត្រួតពិនិត្យបទល្មើសតាមការដ្ឋានសំណង់ដើម្បីចាត់វិធានការចំពោះជនល្មើសតាមផ្លូវច្បាប់ជាធរមាន»។
លោក សុខ គីន ប្រធានសហព័ន្ធសហជីព កម្មករសំណង់ និងព្រៃឈើ បានប្រាប់ភ្នំពេញប៉ុស្តិ៍នៅថ្ងៃទី១០ ខែមេសាថា លោកគាំទ្រចំពោះក្រសួងក្នុងការហាមឃាត់ការអនុវត្តសំណង់ឬរុះរើសំណង់ណាមួយដោយមិនមានការអនុញ្ញាតពីអាជ្ញាធរមានសមត្ថកិច្ចនេះ។
លោកថា៖ «ខ្ញុំគិតថាវាជាចំណុចដែលល្អដែលគួរតែកែតម្រូវហើយ ព្រោះជាទូទៅវាមានបញ្ហាច្រើនកន្លងមកតាំងពីគ្រោះថ្នាក់បាក់ប្លង់សេ បាក់អគារ ឬក៏មេការឬវិស្វករមួយចំនួនធំពេលខ្លះម៉ៅការយកមកធ្វើដោយមិនមានជំនាញពិតប្រាកដ តែបែរជាធ្វើយកតែលុយជាដើម ប៉ុន្តែមិនមែនទាំងអស់នោះទេ គឺមានវិស្វករខ្លះគេមានជំនាញច្បាស់លាស់ត្រឹមត្រូវ»។
លោក សុខ គីន បានបន្ថែមដោយលោកលើកទឹកចិត្តឱ្យក្រុមហ៊ុនឬភាគីដែលជាអ្នកវិនិយោគធ្វើយ៉ាងណាត្រូវតែចុះបញ្ជីនៅក្រសួងរៀបចំដែនដី នគរូបនីយកម្ម និងសំណង់ ដើម្បីទទួលបាននូវការបញ្ជាក់ពីការសាងសង់ ដែលវាមិនមែនល្អសម្រាប់តែការសាងសង់ទេតែវាក៏នឹងទទួលបានអត្ថប្រយោជន៍ទាំងអស់គ្នា ក្នុងនោះមានរដ្ឋាភិបាល និងកម្មករផងដែរ។
លោកបានបញ្ជាក់ថា៖«ក្រុមហ៊ុនត្រូវតែបង់ពន្ធជូនរដ្ឋាភិបាលហើយកម្មករក៏ទទួលបាននូវបេឡាជាតិរបបសន្តិសុខសង្គមនៅពេលក្រុមហ៊ុនដែលពួកគាត់ធ្វើការបានចុះបញ្ជីត្រឹមត្រូវហើយមិនតែប៉ុណ្ណោះ(បសស)ក៏នឹងទទួលបានវិភាគទានពីនិយោជកផងដែរ។ដូចនេះហើយវាជាអត្ថប្រយោជន៍វិលជុំទាំងអស់គ្នាក្នុងវិស័យសំណង់នេះ»៕