.jpg)
បុរសសង្ស័យវាយសម្លាប់បងប្រុសបង្កើត ដែលត្រូវបានបញ្ជូនទៅស្នងការដ្ឋាននគរបាលខេត្តបាត់ដំបង នាថ្ងៃទី១០ មេសា។ រូបថត FB
បាត់ដំបងៈ នគរបាលស្រុករតនមណ្ឌលនៅថ្ងៃ ទី ១០ មេសា បានបញ្ជូនបុរសម្នាក់ទៅស្នងការដ្ឋាននគរបាលខេត្តបាត់ដំបង បន្ទាប់ពីចាប់ខ្លួន២ថ្ងៃ ករណីយកចបកាប់វាយសម្លាប់បងប្រុសបង្កើតខ្លួនឯងម្នាក់ ដែលសមត្ថកិច្ចសង្ស័យថា បណ្តាលមកពីបែកថ្នាំដោយសារប្រើគ្រឿងញៀនខ្លាំង ប្រព្រឹត្តនៅភូមិស្វាយស ឃុំត្រែង ស្រុករតនមណ្ឌល ខេត្តបាត់ដំបង។
លោក សន និល អធិការនគរបាលស្រុករតនមណ្ឌល ឱ្យដឹងនៅថ្ងៃទី១០ មេសាថា បុរសសង្ស័យឈ្មោះ សេង គន្ធា អាយុ ២៩ឆ្នាំ រីឯជនរងគ្រោះឈ្មោះសេង ភ័ក្ត្រា ភេទប្រុស អាយុ៣២ឆ្នាំ។ ពួកគេរស់នៅភូមិស្វាយស ឃុំត្រែង ស្រុករតនមណ្ឌល ខេត្តបាត់ដំបង។
លោកប្រាប់ថា៖ «រឿងនេះ សមត្ថកិច្ចជំនាញរបស់ខ្ញុំបានដឹកជនសង្ស័យទៅស្នងការដ្ឋាននគរបាលខេត្តបាត់ដំបងនៅថ្ងៃនេះហើយ(ថ្ងៃទី១០ មេសា)។ គាត់ប្រាប់យើងថា គាត់ឈ្លោះគ្នាជាមួយជនរងគ្រោះ»។
លោក ហិត ណាត នាយនគរបាលប៉ុស្តិ៍ឃុំត្រែងនិយាយតាមសម្តីរបស់ឪពុកជនល្មើសថា កាលពីថ្ងៃទី៨ មេសា ក្រុមគ្រួសាររបស់គាត់បានទៅធ្វើចម្ការ ហើយកូនរបស់គាត់ឈ្មោះសេង ភ័ក្ត្រា ត្រូវបានគេវាយឱ្យរបួសធ្ងន់ត្រង់កញ្ចឹងកពីខាងក្រោយ។ នៅពេលនោះគាត់បានដឹកកូនរបស់គាត់មកមន្ទីរពេទ្យបង្អែកស្រុករតនមណ្ឌលដើម្បីសង្គ្រោះជីវិត។ ប៉ុន្តែក្រោយពីដឹកជនរងគ្រោះដល់ពាក់កណ្តាលផ្លូវក៏ដាច់ខ្យល់ស្លាប់ទៅ។
លោកបន្តថា បន្ទាប់មកឪពុករបស់ជនរងគ្រោះ បានមកប្តឹងនៅប៉ុស្តិ៍នគរបាល នៅវេលាម៉ោង១២ថ្ងៃត្រង់ នៅថ្ងៃទី៨ មេសាដដែល ហើយលោកបានរាយការណ៍ទៅលោកសន និល អធិការនគរបាលស្រុករតនមណ្ឌល។ លោកអធិការ បានចាត់កម្លាំងស្រុក ដោយសហការជាមួយនគរបាលឃុំត្រែង ចុះទៅដល់កន្លែងកើតហេតុ ក្នុងដីចម្ការមួយកន្លែង ក្នុងភូមិស្វាយសឃុំត្រែងស្រាវជ្រាវ ទើបរកឃើញថា ឈ្មោះ សេង គន្ធា ដែលជាប្អូនប្រុសបង្កើតជាអ្នកសម្លាប់ជនរងគ្រោះហើយក៏ចាប់ខ្លួន។
លោកបញ្ជាក់ថា៖ «ដំបូងឡើយ ប្រហែលជាឪពុករបស់ជនសង្ស័យ និងត្រូវជាឪពុករបស់ជនរងគ្រោះមិនដឹងថា កូនខ្លួនឯងជាអ្នកវាយសម្លាប់ទេ ទើបបានជាគាត់ប្តឹងយើង។ ប៉ុន្តែក្រោយមក ពេលយើងស្រាវជ្រាវចាប់ជនសង្ស័យទើប គាត់ដឹងថាកូនគាត់ជាអ្នកសម្លាប់បង»។
បើតាមលោក ហិត ណាត ក្រោយចាប់ខ្លួន សមត្ថកិច្ចបានពិនិត្យឃើញក្នុងខ្លួនរបស់ជនសង្ស័យ មានផ្ទុកសារធាតុញៀនហើយជនសង្ស័យបានសារភាពប្រាប់សមត្ថកិច្ចដែរថា រូបគេពិតជាបានវាយសម្លាប់បងប្រុសខ្លួនឯងមែន ព្រោះតែមានជម្លោះនឹងគ្នា ហើយក៏យកចបកាប់វាយនឹងត្បូងចបចំកញ្ចឹងកពីក្រោយ។ ទាំងខ្លួនគេនិងជនរងគ្រោះសុទ្ធតែប្រើប្រាស់គ្រឿងញៀនដូចគ្នា។ សាកសពរបស់ជនរងគ្រោះត្រូវបានមន្ត្រីជំនាញកោសល្យវិច័យពិនិត្យឃើញមានស្នាមរបួសជាំត្រង់កញ្ចឹងកពីខាងក្រោយមួយកន្លែង៕
