.jpg)
គ្រូពេទ្យកំពុងចាក់វ៉ាក់សាំងឱ្យនារីម្នាក់នៅខណ្ឌជ្រោយចង្វារ។ ហុង មិនា
ភ្នំពេញៈ មន្ត្រីជាន់ខ្ពស់នៃគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសបានធ្វើការក្រើនរំឭកជាថ្មីម្តងទៀតដល់ប្រជាពលរដ្ឋដែលដល់វេនចាក់វ៉ាក់សាំងកូវីដ ១៩ ឱ្យទៅចាក់វ៉ាក់សាំងនៅតាមមូលដ្ឋានសុខាភិបាលសាធារណ: ដែលកំពុងតែផ្តល់សេវាចាក់ជារៀងរាល់ថ្ងៃ និងនៅតាមទីតាំងកម្សាន្ត ឬវត្តអារាមមួយចំនួន ដែលរៀបចំឡើងដោយរដ្ឋបាលរាជធានី-ខេត្តទាំង ២៥ ចាប់ពីថ្ងៃទី ១៣-១៧ ខែមេសា ឆ្នាំ ២០២២។
លោកស្រី ឱ វណ្ណឌីន បានលើកឡើងថា៖ «ខ្ញុំសូមធ្វើការក្រើនរំឭកថា ការចាក់វ៉ាក់សាំងកូវីដ ១៩ គឺជួយអាយុជីវិតមនុស្សពីការឈឺធ្ងន់ និងសេចក្តីស្លាប់។ លោកអ្នកដែលមិនទាន់បានចាក់ទាំងដូសមូលដ្ឋាន ដូសទី ៣ និងដូសទី ៤ សូមអញ្ជើញទៅចាក់នៅតាមមូលដ្ឋានសុខាភិបាលសាធារណ: ដែលកំពុងតែផ្តល់សេវាចាក់ជារៀងរាល់ថ្ងៃ»។
លោកស្រីបានបន្ថែមថា ប្រជាពលរដ្ឋក៏អាចចាក់វ៉ាក់សាំងបាននៅតាមទីតាំងកម្សាន្ត ឬវត្តអារាមមួយចំនួនដែលរៀបចំឡើង ដោយរដ្ឋបាលរាជធានី-ខេត្តទាំង២៥ ចាប់ពីថ្ងៃទី ១៣-១៧ ខែមេសា ឆ្នាំ ២០២២។
លោកស្រីបញ្ជាក់ថា ត្រូវបន្តអនុវត្តវិធានការការពារ ៣ ការពារ និង ៣ កុំជាបន្តទៀត ក្នុងជីវិតរស់នៅប្រចាំថ្ងៃ។
ជាមួយគ្នានេះដែរ លោក ឃួង ស្រេង អភិបាលរាជធានីភ្នំពេញក៏បានប្រកាសរៀបចំទីតាំងបន្ថែមនូវកន្លែងចាក់វ៉ាក់សាំងបង្ការជំងឺកូវីដ ១៩ ដល់ប្រជាពលរដ្ឋនាពិធីបុណ្យចូលឆ្នាំថ្មីប្រពៃណីខ្មែរ ចាប់ពីថ្ងៃទី ១៣ ដល់ថ្ងៃទី ១៧ មេសា នៅតាមខណ្ឌទាំង ១៤ ក្នុងរាជធានីភ្នំពេញ។ លោកថា៖ «រដ្ឋបាលរាជធានី បានរៀបចំទីតាំងចាក់វ៉ាក់សាំងបង្ការជំងឺកូវីដ-១៩ នៅតាមមន្ទីរពេទ្យបង្អែក មណ្ឌលសុខភាពសរុបចំនួន ៤២ ទីតាំង ដល់ប្រជាពលរដ្ឋកម្មករ-កម្មការិនី រាប់បញ្ចូលទាំងកុមារ និងយុវវ័យទាំងដូសមូលដ្ឋាន ដូសជំរុញ ឬដូសទី ៣ និងដូសទី ៤»។
ចំណែករដ្ឋបាលខេត្តត្បូងឃ្មុំ ក៏បានរៀបចំនូវទីតាំងសម្រាប់ចាក់វ៉ាក់សាំងការពារជំងឺកូវីដ ១៩ ក្នុងពិធីបុណ្យចូលឆ្នាំថ្មីខាងមុខនេះដល់ប្រជាជនដែលមានអាយុចាប់ពី ៣ ឆ្នាំឡើង ចាប់ពីថ្ងៃទី ១៤ ដល់ទី ១៦ ខែមេសាផងដែរ។
យោងតាមរបាយការណ៍របស់ក្រសួងសុខាភិបាលបានឱ្យដឹងថា កំណើនអត្រាចាក់វ៉ាក់សាំងកូវីដ ១៩ នៅកម្ពុជា គិតត្រឹមថ្ងៃទី ០៩ ខែមេសា ឆ្នាំ ២០២២ គឺបានចាក់លើប្រជាជនអាយុពី ១៨ ឆ្នាំឡើង មាន ១០២,៧២% ធៀបជាមួយចំនួនប្រជាជនគោលដៅ ១០ លាននាក់។
ចំណែកអត្រា ចាក់វ៉ាក់សាំងលើកុមារ-យុវវ័យអាយុពី ១២ ឆ្នាំ ទៅក្រោម ១៨ ឆ្នាំ មាន ១០០,១៧% ធៀបជាមួយចំនួនប្រជាជនគោលដៅ ១ ៨២៧ ៣៤៨ នាក់ និងលើកុមារអាយុពី ៦ ឆ្នាំ ដល់ក្រោម ១២ ឆ្នាំ មានចំនួន ១០៧,៨៤% ធៀបជាមួយនឹងប្រជាជនគោលដៅ ១ ៨៩៧ ៣៨២ នាក់។
រីឯអត្រាលើកុមារអាយុ ៥ ឆ្នាំ មាន ១២៤,៤២% ធៀបជាមួយនឹងប្រជាជនគោលដៅ ៣០៤ ៣១៧ នាក់ និងលើកុមារអាយុ ៣ ឆ្នាំ ដល់ក្រោម ៥ ឆ្នាំ មាន ៥២,០៣% ធៀបជាមួយនឹងប្រជាជនគោលដៅ ៦១០ ៧៣០ នាក់ ក្រសួងសុខាភិបាលបានបញ្ជាក់ថា លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦ លាននាក់ បានចំនួន ៩២,៧៨%៕
