.jpg)
អ្នកដំណើរធ្វើដំណើរឆ្លងកាត់ពីមុខក្រសួងប្រៃសណីយ៍ នៅខណ្ឌដូនពេញពីថ្ងៃទី ៤ មេសា។ ហេង ជីវ័ន
ភ្នំពេញៈ ក្រសួងប្រៃសណីយ៍ និងទូរគមនាគមន៍ប្រកាសរៀបចំការប្រកួតសរសេរសំបុត្រថ្នាក់ជាតិលើកដំបូង ដើម្បីផ្តល់ឱកាសដល់សិស្សានុសិស្ស អាយុចាប់ពី ៩ ឆ្នាំ ដល់ ១៥ ឆ្នាំ បង្ហាញស្នាដៃក្នុងការសរសេរសំបុត្រ ដោយគំនិតច្នៃប្រឌិត ទេពកោសល្យ និងការយល់ដឹងរបស់ខ្លួន ដោយជំរុញការយល់ដឹង និងការប្រើប្រាស់សេវាប្រៃសណីយ៍នៅកម្ពុជា។
លិខិតជូនដំណឹងចេញថ្ងៃទី ៨ មេសា ក្រសួងប្រៃសណីយ៍ និងទូរគមនាគមន៍ ឱ្យដឹងថា ដើម្បីផ្តល់ឱកាសឱ្យសិស្សានុសិស្សបង្ហាញស្នាដៃក្នុងការសរសេររបស់ខ្លួន និងដើម្បីចូលរួមចំណែកក្នុងការលើកកម្ពស់ គំនិតច្នៃប្រឌិត ទេពកោសល្យនៃការសរសេរ ព្រមទាំងជំរុញការយល់ដឹង និងការប្រើប្រាស់សេវាប្រៃសណីយ៍នៅកម្ពុជា ក្រសួងបានរៀបចំកម្មវិធីប្រកួតប្រជែងសរសេរសំបុត្រថ្នាក់ជាតិលើកទី១ ឆ្នាំ ២០២២ លើប្រធានបទ “សរសេរសំបុត្រទៅអ្នកដែលមានឥទ្ធិពលស្តីពីមូលហេតុ និងការដោះស្រាយការប្រែប្រួលអាកាសធាតុ Write a letter to an influential person about why and how to take action on climate change”។
លិខិតដដែលបានបញ្ជាក់ថា បេក្ខជនជយលាភីនឹងទទួលបានរង្វាន់លើកទឹកចិត្ត ព្រមទាំងត្រូវជ្រើសរើសបន្តឱ្យចូលរួមជាតំណាងរបស់កម្ពុជាក្នុងកម្មវិធីប្រកួតប្រជែងកម្រិតអន្តរជាតិ ដែលរៀបចំ ដោយសហភាពប្រៃសណីយ៍សកល (Universal Postal Union) ។
ចំពោះលក្ខខណ្ឌក្នុងការចូលរួម ក្រសួងបានឱ្យដឹងថា ជាសិស្សានុសិស្សត្រូវមានសញ្ជាតិខ្មែរ និងមានអាយុពី ៩ ឆ្នាំ ដល់ ១៥ ឆ្នាំ (គិតត្រឹមថ្ងៃទី ១ ខែឧសភា ឆ្នាំ ២០២២)។ សរសេរសំបុត្រដោយដៃជាភាសាខ្មែរ និងភាសាអង់គ្លេស និងមិនត្រូវលើសពី ៨០០ ពាក្យ ឬ ២ ទំព័រ ហើយផ្ញើពាក្យចុះឈ្មោះចូលរួមប្រកួត និងសំបុត្រដែលបានសរសេររួចតាមរយៈសេវាប្រៃសណីយ៍អនុសិដ្ឋ (Registered Mall) របស់ប្រៃសណីយ៍កម្ពុជាដោយឥតគិតថ្លៃ។ ឬក៏អាចប្រើប្រាស់សេវាបញ្ញើឆាប់រហ័សឯកជនមកអាសយដ្ឋាន អគារលេខ ១៣ មហាវិថីព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ ១២០២១០” យ៉ាងយូរត្រឹមថ្ងៃទី ១៩ ខែមេសា ឆ្នាំ ២០២២។
ក្រសួងប្រៃសណីយ៍បញ្ជាក់ថា៖ «ការជ្រើសរើសនឹងត្រូវធ្វើជា ២ ដំណាក់កាលទី ១ អត្ថបទដែលចូលរួមទាំងអស់នឹងត្រូវគណៈកម្មការវាយតម្លៃ និងដាក់ពិន្ទុផ្អែកលើគំនិតច្នៃប្រឌិត សិល្បៈនៃការសរសេរ និងអត្ថន័យ និងដំណាក់កាលទី ២ ម្ចាស់អត្ថបទដែលបានពិន្ទុច្រើនជាងគេចំនួន ១០ [រូប] នឹងត្រូវអញ្ជើញមកធ្វើបទបង្ហាញពីអត្ថន័យនៃសំបុត្ររបស់ខ្លួននៅថ្ងៃទី ២៥ ខែមេសា ឆ្នាំ ២០២២»។
ក្រសួងបញ្ជាក់ទៀតថា អ្នកចូលរួមត្រូវសរសេរសំបុត្រដោយខ្លួនឯងផ្ទាល់ ខ្លឹមសារលិខិតដែលលួចចម្លងទាំងស្រុង ឬដោយផ្នែកពីអត្ថបទផ្សេង ពុំត្រូវបានវាយតម្លៃ។ ចំណែកសំបុត្រដែលមានកាលបរិច្ឆេទធ្វើក្រោយថ្ងៃកំណត់ខាងលើ មិនត្រូវបានទទួលសម្រាប់ការវាយតម្លៃឡើយ។
លោក សុខ ឡាក់ សហស្ថាបនិកបណ្ណាល័យបញ្ញវន្តថ្លែងនៅថ្ងៃទី ១០ មេសាថា ការចូលរួមរបស់ក្រសួងប្រៃសណីយ៍ក្នុងវិស័យនិពន្ធគឺជាការធ្វើវិភត្តិកម្មមួយក្នុងវិស័យអ្នកនិពន្ធ និងជាការជំរុញឱ្យក្មេងៗជំនាន់ក្រោយចាប់ផ្តើមចេះទំនាក់ទំនងគ្នា តាមរយៈការសរសេរ ការនិពន្ធផងដែរ។ ម្យ៉ាងវិញទៀតក្រសួងប្រៃសណីយ៍ គឺជាអ្នកដើរតួនាទីក្នុងការផ្ញើសារ ផ្ញើសំបុត្រទៅបណ្តាខេត្ត និងពិភពលោក។
លោកថ្លែងថា៖ «នេះជាយន្តការមួយដើម្បីបំផុស ហើយមួយទៀតវាអាចធ្វើឱ្យ សេវាកម្មប្រៃសណីយ៍នៅទូទាំងប្រទេសកម្ពុជា មានដំណើរការល្អដែរ នៅពេលដែលមានគេប្រើប្រាស់ច្រើន។ ខ្ញុំសង្ឃឹម ថា ការចូលរួមក្នុងការប្រកួតប្រជែងនេះ ក៏ធ្វើឱ្យសេវាកម្មប្រៃសណីយ៍ ដែលមានភាពរអាក់រអួលក្នុងប្រទេសយើងនោះ កាន់តែប្រសើរឡើងជាងមុន»។
លោកបញ្ជាក់ថា ការសរសេរតាមពិតមានការបណ្តុះបណ្តាលពីសាលារៀនរួចមកហើយ។ ហេតុនេះ បើសិនជាក្រសួងមានការបំផុសបន្ថែមទៀតបែបនេះ ជាវិធីសាស្ត្រមួយដែលធ្វើឱ្យសិស្សានុសិស្សកាន់តែមានភាពប្រសើរឡើងក្នុងការទំនាក់ទំនង៕
