.jpg)
បុគ្គលិកស៊ីនទ្រីប្រមូលសំរាមនៅខណ្ឌចំការមន នាពេលកន្លងទៅ។ ហ៊ាន រង្សី
ភ្នំពេញៈ រដ្ឋបាលរាជធានីភ្នំពេញបានអំពាវនាវ និងស្នើទៅដល់ប្រជាពលរដ្ឋទាំងអស់ត្រូវរក្សាការទុកដាក់សំរាមឱ្យបានត្រឹមត្រូវនៅក្នុងទីតាំងរៀងៗខ្លួនឱ្យបានស្អាតល្អ និងមិនត្រូវបញ្ចេញសំរាមដាក់នៅតាមដងផ្លូវសាធារណៈឡើយក្នុងអំឡុងពេលនៃពិធីបុណ្យចូលឆ្នាំថ្មីប្រពៃណីជាតិខ្មែររយៈពេល ៣ ថ្ងៃខាងមុខនេះ។
លោក ឃួង ស្រេង អភិបាលរាជធានីភ្នំពេញកាលពីថ្ងៃទី ៨ ខែមេសា បានធ្វើការជូនដំណឹងទៅដល់ប្រជាពលរដ្ឋទាំងអស់ដោយឱ្យរក្សា និងទុកដាក់សំរាមឱ្យបានត្រឹមត្រូវក្នុងឱកាសនៃពិធីបុណ្យចូលឆ្នាំ ៣ ថ្ងៃ គឺចាប់ពីថ្ងៃទី ១៤ ដល់ទី ១៦ ខែមេសា ដោយសារកម្មករ-កម្មការិនីប្រមូលសំរាមរបស់ក្រុមហ៊ុនទាំង ៣ នឹងត្រូវសម្រាកពីការងារ។
លោកបានថ្លែងថា៖ «នៅក្នុងអំឡុងពេលការឈប់សម្រាកក្នុងពិធីបុណ្យចូលឆ្នាំខ្មែរខាងមុខនេះ ការផ្តល់សេវាសម្អាត ប្រមូល និងដឹកជញ្ជូនសំរាម សំណល់រឹងក្នុងរាជធានីភ្នំពេញ នឹងប្រព្រឹត្តទៅមិនបានពេញលេញដូចរៀងរាល់ថ្ងៃនោះទេ សម្រាប់រយៈពេល ៣ ថ្ងៃ គិតចាប់ពីថ្ងៃទី ១៤ ដល់ថ្ងៃទី ១៦ ខែមេសា ឆ្នាំ ២០២២ ដោយសារបងប្អូនកម្មករ-កម្មការិនីប្រមូលសំរាមរបស់ក្រុមហ៊ុនប្រមូលសំរាមសម្រាក»។
លោក ឃួង ស្រេង ថា៖ «អាស្រ័យហេតុនេះ ដើម្បីចូលរួមថែរក្សាអនាម័យបរិស្ថាន និងសោភណភាពរបស់រាជធានីភ្នំពេញ រដ្ឋបាលរាជធានីភ្នំពេញ សូមអំពាវនាវដល់បងប្អូនប្រជាពលរដ្ឋជាម្ចាស់លំនៅឋានក្នុងរាជធានីភ្នំពេញទាំងអស់ សូមមេត្តាយោគយល់ និងអធ្យាស្រ័យ កុំបញ្ចេញសំរាមមកដាក់នៅតាមដងផ្លូវសាធារណៈនៅក្នុងអំឡុងពេលដែលការផ្តល់សេវាមិនបានពេញលេញនេះ ដោយសូមរក្សាការទុកដាក់សំរាមឱ្យបានត្រឹមត្រូវនៅក្នុងទីតាំងរៀងៗខ្លួនជាបណ្តោះអាសន្នសិន»។
លោក ជួន លីនដា ប្រជាពលរដ្ឋក្នុងខណ្ឌដង្កោ រាជធានី-ភ្នំពេញបានឱ្យដឹងថា ក្នុងរយៈពេល ៣ ថ្ងៃនៃបុណ្យចូលឆ្នាំនេះនឹងមានសំរាមគរច្រើន ដូចជារៀងរាល់ឆ្នាំដែរ ប៉ុន្តែលោកសង្ឃឹមថា សេវាកម្មនៃការប្រមូលនឹងបានល្អ និងរហ័សបន្ទាប់ពីបញ្ចប់ពេលចូលឆ្នាំមកវិញ។ លោកថា៖ «ប្រជាពលរដ្ឋភាគច្រើនបានទុកដាក់សំរាមបានល្អនៅតាមមុខគេហដ្ឋានរបស់ពួកគាត់ ប៉ុន្តែវាតែងតែមានអ្នករើសអេតចាយមកហែកស្បោង និងធ្វើឱ្យសំរាមដែលយើងចងទុកដាក់ស្អាតហើយនោះមកជារញ៉េរញ៉ៃវិញ»។
មន្ត្រីជាន់ខ្ពស់ឱ្យដឹងថា ក្នុងរាជធានីភ្នំពេញមានសំរាមចន្លោះពី ២ ៧០០ ទៅ ៣ ០០០ តោនក្នុង ១ ថ្ងៃ៕
