.jpg)
គ្រូពេទ្យមកទទួលអ្នកជំងឺទៅព្យាបាល នាពេលកន្លងទៅ។ រូបថត ហ្វេសប៊ុក
ភ្នំពេញៈក្រសួងសុខាភិបាលបានប្រកាសរកឃើញអ្នកឆ្លងវីរុសកូវីដ ១៩ ចំនួនជាង ១០ នាក់បន្ថែមទៀត ដែលសុទ្ធតែជាប្រភេទវីរុសបំប្លែងថ្មីអូមីក្រុងទាំងអស់ និងមានអ្នកជាសះស្បើយបន្ថែមចំនួន ជាង ២០ នាក់ផងដែរ ប៉ុន្តែមិនមានអ្នកស្លាប់ដោយសារមេរោគកូវីដ ១៩ ថ្មីទៀតឡើយ។
យោងតាមសេចក្តីប្រកាសរបស់ក្រសួងសុខាភិបាលនៅថ្ងៃទី ១១ ខែ មេសា ឆ្នាំ ២០២២ បានបញ្ជាក់ថា មនុស្សចំនួន ១៦ នាក់ទៀត មានឆ្លងវីរុសកូវីដ ១៩ និងមានអ្នកជាសះស្បើយចំនួន ២១ នាក់។ ការរកឃើញនេះមានករណីឆ្លងសហគមន៍ ចំនួន ១៦ នាក់ និងមិនមានការរកឃើញឆ្លងលើអ្នកដំណើរពីបរទេសទេ។
គិតត្រឹមព្រឹកថ្ងៃទី ១១ ខែ មេសា ឆ្នាំ ២០២២ កម្ពុជាមានអ្នកឆ្លងវីរុសកូវីដ ១៩ សរុបទូទាំងប្រទេសចំនួន ១៣៥ ៩៦៣ នាក់ អ្នកជាសះស្បើយ សរុប ចំនួន ១៣២ ៦៣៩ នាក់ និងអ្នកស្លាប់មានចំនួន ៣ ០៥៥ នាក់៕
