កំពង់ស្ពឺៈ បៃតងសង្ក្រាន្តមិនមែនត្រឹមតែជាព្រឹត្តិការណ៍អបអរសាទរពិធីបុណ្យចូលឆ្នាំថ្មីប្រពៃណីជាតិ និងបង្ហាញពីវប្បធម៌សិល្បៈប៉ុណ្ណោះទេ ប៉ុន្តែជាឱកាសនៃការបណ្តុះស្មារតីពលរដ្ឋឱ្យចេះគោរពស្រឡាញ់បរិស្ថាន និងធនធានធម្មជាតិកាន់តែខ្លាំង និងជាសកម្មភាពមួយចូលរួមជាមួយរាជរដ្ឋាភិបាលក្នុងការបង្កើតសេដ្ឋកិច្ចមូលដ្ឋាន មុខរបរ និងបង្កើនចំណូលសម្រាប់ពលរដ្ឋនៅមូលដ្ឋានផងដែរ។ នេះជាការថ្លែងរបស់លោក នេត្រ ភក្ត្រា រដ្ឋលេខាធិការក្រសួងបរិស្ថាន ក្នុងឱកាសដែលលោកអញ្ជើញចូលរួមជាអធិបតីបើកព្រឹត្តិការណ៍ «បៃតងសង្ក្រាន្ត» រៀបចំដោយក្រុមយុវជនស្ម័គ្រចិត្តជួយសង្គមបៃតងវ៉ររៀរស៍ នៅទំនប់ពាមល្វា ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ នៅថ្ងៃទី ៨ ខែមេសា ឆ្នាំ ២០២២។
អ្នកនាំពាក្យក្រសួងបរិស្ថានបានថ្លែងថា នៅក្នុងឃុំត្រពាំងជោរមានព្រៃសហគមន៍ និងមានបឹងធម្មជាតិដ៏ពោរពេញដោយសក្តានុពលទេសចរណ៍ ត្រូវបានក្រុមយុវជនស្ម័គ្រចិត្តជួយសង្គម បៃតងវ៉ររៀរស៍ បានចូលរួមជួយរៀបចំ និងអភិវឌ្ឍផែនការ ដើម្បីជួយចូលរួមលើកកម្ពស់ជីវភាពពលរដ្ឋនៅតំបន់នោះតាមរយៈទេសចរណ៍ធម្មជាតិ និងកាត់បន្ថយការពឹងអាស្រ័យលើធនធានធម្មជាតិ ដើម្បីជីវភាពប្រចាំថ្ងៃ។ ចំពោះគំនិតផ្តួចផ្តើមនេះត្រូវបានគាំទ្រដោយក្រសួងបរិស្ថាន និងរដ្ឋបាលខេត្តកំពង់ស្ពឺ។
លោក នេត្រ ភក្ត្រា បានគូសបញ្ជាក់ថា៖ «សម្រាប់ពលរដ្ឋនៅឃុំត្រពាំងជោរ មានកេរមរតកធម្មជាតិគឺបឹងពាមល្វា ព្រៃសហគមន៍ មានព្រៃភ្នំព័ទ្ធជុំវិញ ដែលនេះគឺជាសម្បត្តិធម្មជាតិដ៏មានតម្លៃដែលអាចទាញបានផលប្រយោជន៍មិនចេះរីងស្ងួតពីទេសចរណ៍ធម្មជាតិ បង្កើតមុខរបរថ្មីជូនដល់ពលរដ្ឋនៅមូលដ្ឋាន»។
លោកបានអំពាវនាវដល់ពលរដ្ឋចូលរួមគ្នាការពារ និងអភិរក្សធនធានធម្មជាតិ ព្រៃឈើ សត្វព្រៃដែលមាននៅតំបន់នេះ ត្រូវធ្វើយ៉ាងណារក្សាការពារឱ្យបាននូវសម្រស់ធម្មជាតិនៅតំបន់នេះ កុំឱ្យបាត់បង់ដើម្បីប្រភពចំណូលពីទេសចរណ៍ធម្មជាតិ។ នៅក្នុងព្រឹត្តិការណ៍ «បៃតងសង្ក្រាន្ត» មានការរៀបចំតូបបង្ហាញផលិតផលរបស់សហគមន៍ដើម្បីបង្ហាញដល់អ្នកចូលរួមអំពីប្រភេទមុខម្ហូប និងផលិតផលផ្សេងៗដែល អ្នកឃុំត្រពាំងជោរ មាន។ មិនតែប៉ុណ្ណោះក៏មានការរៀបចំតាំងស្នាដៃសិល្បៈដែលកែច្នៃពីសំណល់សំរាមប្លាស្ទិក និងសំណល់ផ្សេងទៀតដ៏គួរឱ្យទាក់ទាញ ព្រមទាំងមានការតាំងពិព័រណ៍ពីអន្ទាក់ កាំភ្លើងកែច្នៃ រណារយន្តដែលជាឧបករណ៍បំផ្លិចបំផ្លាញធនធានធម្មជាតិ ព្រៃឈើ សត្វព្រៃ។ នេះបើតាមការបញ្ជាក់បន្ថែមរបស់លោក នេត្រ ភក្ត្រា។
លោក តាន់ គឹមសួរ ប្រធានគម្រោងព្រឹត្តិការណ៍បៃតងសង្ក្រាន្តថ្លែងថាព្រឹត្តិការណ៍នេះរៀបចំឡើងក្នុងអត្ថន័យដ៏ជ្រាលជ្រៅ ដើម្បីរួមចំណែកក្នុងការលើកស្ទួយវប្បធម៌ និងអភិរក្សព្រៃឈើកម្ពុជា ក៏ដូចជាចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ។ លោក បញ្ជាក់ថា ព្រឹត្តិការណ៍បៃតងសង្ក្រាន្ត គឺជាចលនាមួយនៃការផ្សារភ្ជាប់រវាងមនុស្ស និងមនុស្ស មនុស្ស និងធម្មជាតិ មនុស្ស និងសិល្បៈ វប្បធម៌ ទំនៀមទម្លាប់ប្រពៃណីខ្មែរ និងបណ្ដុះមនសិការយុវជនឱ្យចេះស្រឡាញ់ អភិរក្ស ថែរក្សា និងអភិវឌ្ឍសម្បត្តិធម្មជាតិ មរតកវប្បធម៌ជាតិ។
លោក សរ សុពុត្រា អភិបាលរងនៃគណៈអភិបាលខេត្តកំពង់ស្ពឺបានថ្លែងវាយតម្លៃខ្ពស់ចំពោះគំនិតផ្តួចផ្តើមរៀបចំបៃតងសង្ក្រាន្តនេះឡើង។ ព្រឹត្តិការណ៍នេះបាននិងកំពុងតែប្រែក្លាយពីតំបន់ដែលឮសំឡេងរណារយន្តកាប់បំផ្លាញព្រៃឈើទៅជាកន្លែងសប្បាយរីករាយ។
លោកថា៖ «ក្នុងនាមរដ្ឋបាលខេត្តកំពង់ស្ពឺសូមគាំទ្រចំពោះគំនិតផ្តួចផ្តើមទាំងឡាយក្នុងការជំរុញឱ្យតំបន់បឹងពាមល្វាក្លាយជាទីកន្លែងទេសចរណ៍ដ៏ទាក់ទាញមួយបន្ថែមទៀត សម្រាប់គោលដៅទេសចរណ៍»។ តំណាងក្រសួងមួយចំនួនបានបង្ហាញការគាំទ្រព្រឹត្តិការណ៍នេះ៕