.jpg)
ក្រុមនិស្សិតពេលប្រឡងចូលធ្វើការងារកាលពីពេលកន្លងមក។ រូបថត ក្រសួងការងារ
ភ្នំពេញៈ រាជរដ្ឋាភិបាលកម្ពុជាបានជ្រើសរើសយកប្រធានបទ «TVET បង្កើនផលិតភាពការងារ និងភាពប្រកួតប្រជែងខ្ពស់» សម្រាប់ប្រារព្ធទិវាជាតិអប់រំបណ្ដុះបណ្ដាលបច្ចេកទេសនិងវិជ្ជាជីវៈលើកទី៥ នៅឆ្នាំនេះ ហើយបានកំណត់យកថ្ងៃទី ១៥ ខែមិថុនា ជារៀងរាល់ឆ្នាំ សម្រាប់រៀបចំពិធីនេះ។ នេះបើតាមសារាចររបស់រាជរដ្ឋាភិបាល។
យោងតាមសារាចរចុះហត្ថលេខាដោយ លោក ហ៊ុន សែន នាយករដ្ឋមន្ដ្រីនៃកម្ពុជា កាលពីថ្ងៃទី៧ មេសា បានឱ្យដឹងថា រាជរដ្ឋាភិបាលកម្ពុជា បានកំណត់យកថ្ងៃទី១៥ ខែមិថុនាជារៀងរាល់ឆ្នាំ ជាទិវាជាតិអប់រំបណ្តុះ បណ្តាលបច្ចេកទេស និងវិជ្ជាជីវៈ ក្នុងគោលបំណងដើម្បីលើកកម្ពស់ការអប់រំបណ្តុះបណ្តាលបច្ចេកទេស និងវិជ្ជាជីវៈ និងធ្វើការផ្សព្វផ្សាយទៅដល់សិស្សានុសិស្ស និស្សិត យុវជន មាតាបិតា អាណាព្យាបាល និងផ្នែកឯកជនឱ្យបានយល់អំពីសារៈសំខាន់នៃ «ការអប់រំបណ្តុះបណ្តាលបច្ចេកទេស និងវិជ្ជាជីវៈ ហៅថា ធីវេទ (TVET)។
នៅក្នុងសារាចរនោះលោកនាយករដ្ឋមន្ត្រីបានបញ្ជាក់ថា ការប្រារព្ធទិវានេះក៏ដើម្បីជំរុញការអភិវឌ្ឍកម្លាំងពលកម្មជំនាញប្រកបដោយគុណភាព និងប្រសិទ្ធភាព ឱ្យឆ្លើយតបទៅនឹងតម្រូវការទីផ្សារការងារទាំងក្នុងនិងក្រៅប្រទេសផងដែរ។ ដូច្នេះ ទិវាជាតិលើកទី៥ នៅថ្ងៃទី១៥ ខែមិថុនា ខាងមុខនេះ នឹងប្រារព្ធឡើងក្រោមប្រធានបទ «TVET បង្កើនផលិតភាពការងារ និងភាពប្រកួតប្រជែងខ្ពស់»។
ដើម្បីឱ្យទិវាជាតិនេះអាចប្រព្រឹត្តទៅដោយរលូន ប្រកបដោយភាពអធិកអធម និងមានការចូលរួមពីគ្រប់ភាគីពាក់ព័ន្ធលោក នាយករដ្ឋមន្ដ្រី បានណែនាំដល់ក្រសួង ស្ថាប័នពាក់ព័ន្ធានានា ក្នុងនោះមាន ក្រសួងការងារ និងបណ្តុះបណ្តាលវិជ្ជាជីវៈ ទទួលបន្ទុករៀបចំទិវាជាតិនេះដោយអនុវត្តឱ្យបានត្រឹមត្រូវតាមវិធានការសុខាភិបាល។
លោកបន្ថែមថា ក្រសួងការងារ ត្រូវរៀបចំផលិតជាវីដេអូ និងខ្លឹមសារឯកសារផ្សេងៗ ដោយសហការជាមួយក្រសួង ស្ថាប័នពាក់ព័ន្ធ រដ្ឋបាលរាជធានី ខេត្ត អង្គការជាតិ អន្តរជាតិដៃគូអភិវឌ្ឍន៍និងវិស័យឯកជនដើម្បីផ្សព្វផ្សាយឱ្យបានទូលំទូលាយទូទាំងប្រទេស។
លោកបានបន្តថាក្រសួងស្ថាប័នពាក់ព័ន្ធនានាត្រូវចូលរួមសហការគាំទ្រនិងផ្សព្វផ្សាយគ្រប់មធ្យោបាយនានាដើម្បីអបអរសាទរទិវាជាតិអប់រំ បណ្តុះបណ្តាលបច្ចេកទេសនិងវិជ្ជាជីវៈ លើកទី៥ឆ្នាំ២០២២ តាមអង្គភាពរៀងៗខ្លួន។
ចំណែក រដ្ឋបាលរាជធានីភ្នំពេញ ត្រូវចូលរួមសហការ និងគាំទ្រដល់ក្រសួងការងារ និងបណ្តុះបណ្តាលវិជ្ជាជីវៈ ធ្វើការផ្សព្វផ្សាយទិវាជាតិលើកទី៥ ឆ្នាំ២០២២នេះ ឱ្យកាន់តែផុលផុស និងគ្រប់មធ្យោបាយដូចជា ការចងពាក្យស្លោក បដា នៅតាមទីសាធារណៈក្នុងដែនដីរបស់ខ្លួន។
រីឯរដ្ឋបាលខេត្តនីមួយៗ ត្រូវរៀបចំទិវានេះ ដោយមានការចូលរួមពីមន្ទីរការងារ និងបណ្តុះបណ្តាលវិជ្ជាជីវៈ គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈសាធារណៈ ឯកជន និងអង្គការសមាគម ដែលស្ថិតក្នុងដែនដីរបស់ខ្លួន។
លោកនាយករដ្ឋមន្ដ្រីបានបញ្ជាក់ថា ទន្ទឹមនឹងនេះ រដ្ឋបាលខេត្តនីមួយៗ ត្រូវមានចលនាលើកទឹកចិត្តឱ្យមានការចូលរួមពីវិស័យឯកជន ក្រុមហ៊ុន រោងចក្រ សហគ្រាស និងគ្រឹះស្ថានផងដែរ។
ចំពោះក្រសួងព័ត៌មាន ត្រូវណែនាំប្រព័ន្ធឃោសនារបស់រដ្ឋ ឯកជន និងបណ្តាញសារព័ត៌មានសង្គមនានា រួមមាន វិទ្យុ ទូរទស្សន៍កាសែត និងមធ្យោបាយផ្សព្វផ្សាយផ្សេងទៀត ឱ្យផ្សព្វផ្សាយសារាចរ សារលិខិត លោក ហ៊ុន សែន នាយករដ្ឋមន្ត្រីនៃកម្ពុជា វីដេអូ និងខ្លឹមសារឯកសារផ្សេងៗ ក្នុងឱកាសប្រារព្ធទិវាជាតិនេះ។
ក្រៅពីនោះ លោកនាយករដ្ឋមន្ដ្រីក៏បានណែនាំដល់ក្រសួងស្ថាប័នពាក់ព័ន្ធនានា រដ្ឋបាលរាជធានី ខេត្ត រៀបចំចងបដា ពាក្យស្លោក នៅតាមអង្គភាព និងទីសាធារណៈ តាមខ្លឹមសារដូចជា អបអរសាទរទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៥ ឆ្នាំ២០២២! TVET បង្កើនផលិតភាពការងារ និងភាពប្រកួតប្រជែងខ្ពស់!TVET ជួយឱ្យមានការងារសមរម្យ និងមានប្រាក់ចំណូលខ្ពស់! TVET ជំនាញពិត ជីវិតប្រសើរ! TVET ជាសសរស្តម្ភមួយនៃកិច្ចគាំពារសង្គមជូនប្រជាពលរដ្ឋ! TVET ផ្តល់ជំនាញពិត ផ្តល់ការងារ និងមុខរបរសមរម្យ! យុវជនម្នាក់មានជំនាញមួយយ៉ាងតិចប្រចាំជីវិត! ស្ត្រី និងជនជាតិដើមភាគតិច ក៏រៀនជំនាញបច្ចេកទេស និងវិជ្ជាជីវៈបានដែរ! TVET ដើម្បីទាំងអស់គ្នា!
ជាមួយនេះដែរ លោកនាយករដ្ឋមន្ដ្រីបានអំពាវនាវដល់សាស្ត្រាចារ្យ លោកគ្រូ អ្នកគ្រូ សិស្សានុសិស្ស និស្សិត មាតាបិតា អាណាព្យាបាល កម្មករនិយោជិត និយោជក អង្គការមិនមែនរដ្ឋាភិបាល ដៃគូអភិវឌ្ឍន៍និងបងប្អូនជនរួមជាតិទាំងអស់ សូមចូលរួមនិងផ្សព្វផ្សាយទិវាជាតិនេះឱ្យបានផុលផុសឱឡារិក អធិកអធមទូទាំងប្រទេស៕
