.jpg)
រថយន្តដែលជួបគ្រោះថ្នាក់ចរាចរណ៍នៅក្នុងខេត្តតាកែវ ពីថ្ងៃទី ១១ ខែមេសា បណ្តាលឱ្យស្លាប់ ៤ នាក់របួស ១ នាក់។ រូបថត នគរបាល
ភ្នំពេញៈ យ៉ាងហោចណាស់មានមនុស្ស ១៩ នាក់បានស្លាប់ និង ១២ នាក់ផ្សេងទៀតបានរងរបួសក្នុងគ្រោះថ្នាក់ចរាចរណ៍ទូទាំងប្រទេសនៅថ្ងៃទី ១១ ខែមេសា ឆ្នាំ ២០២២។ តួលេខនេះបានធ្វើឱ្យចំនួនជនរងគ្រោះ ដែលបានស្លាប់ក្នុងគ្រោះថ្នាក់ចរាចរណ៍ក្នុងរយៈពេល ១១ ថ្ងៃ នៃខែមេសា កើនដល់ ៧៨ នាក់ និង ១២៥ នាក់ផ្សេងទៀតបានរងរបួស។
តាមទិន្នន័យរបស់នគរបាលដែលភ្នំពេញប៉ុស្តិ៍ ប្រមូលបានពីរថ្ងៃទី ១១ ខែមេសា បង្ហាញថា គ្រោះថ្នាក់ចរាចរណ៍នៅថ្ងៃទី ១១ ខែមេសា មានចំនួនជនរងគ្រោះស្លាប់រហូតដល់ ១៩ នាក់ និង ១២ នាក់ទៀតរងរបួសនៅក្នុងចំណោមរាជធានី-ខេត្តចំនួន ៨ រួមមាន ខេត្តកំពង់ស្ពឺ ស្លាប់ ២ នាក់ កណ្តាល ស្លាប់ ១ នាក់ និងរបួស ២ នាក់ ភ្នំពេញស្លាប់ ៥ នាក់ និងរបួស ៤ នាក់ រតនគីរីស្លាប់ ១ នាក់ សៀមរាបស្លាប់ ៦ នាក់ និងរបួស ២ នាក់ ព្រះសីហនុរបួស ៣ នាក់ ស្វាយរៀងរបួស ២ នាក់ និងខេត្តតាកែវ ស្លាប់ ៤ នាក់ និងរបួស ១ នាក់។ មូលហេតុនៃគ្រោះថ្នាក់ចរាចរណ៍ភាគច្រើនបណ្ដាលមកពី «កត្តាមនុស្ស [អ្នកបើកបរ] ធ្វេសប្រហែស និង បើកបរក្នុងល្បឿនលឿន រំលោភលើសិទ្ធិជាអាទិភាព»។
លោក ឈាង សុផាណារ៉ា ស្នងការនគរបាលខេត្តតាកែវបានប្រាប់ភ្នំពេញប៉ុស្តិ៍ថា ករណីគ្រោះថ្នាក់ចរាចរណ៍រវាងរថយន្តដឹកមាន់ និងរថយន្តដឹកស្រូវកាលពីវេលាម៉ោង ៤ ទៀបភ្លឺនាថ្ងៃទី ១១ ខែមេសា ឆ្នាំ ២០២២ នៅចំណុច ភូមិជ្រៃ ឃុំជីខ្នា ស្រុកទ្រាំង ខេត្តតាកែវ បានបង្កឱ្យមានជនរងគ្រោះ ៣ នាក់ស្លាប់នៅនឹងកន្លែង និងម្នាក់ទៀតស្លាប់ពេលបញ្ជូនទៅសង្គ្រោះបន្ទាន់នៅឯមន្ទីរពេទ្យ និងមានជនរងគ្រោះម្នាក់ទៀតរងរបួសធ្ងន់កំពុងសម្រាកព្យាបាលនៅមន្ទីរពេទ្យបង្អែកខេត្ត។
លោក សុផាណារ៉ា បានបញ្ជាក់ថា៖ «ករណីគ្រោះថ្នាក់ចរាចរណ៍នេះបង្កឡើងពីអ្នកបើកបររថយន្តដឹកមាន់ខ្វះការទទួលខុសត្រូវ គឺបើកបរក្នុងល្បឿនលឿន និងក្នុងសភាពងោកងុយ ហើយបានរេចង្កូតទៅបុករថយន្តដឹកស្រូវដែលបើកបរក្នុងទិសដៅខុសគ្នា បណ្ដាលឱ្យស្លាប់ និងរងរបួសសរុប ៥ នាក់»។
បន្ទាប់ពីកើតហេតុ សមត្ថកិច្ចជំនាញបានអូសស្ទូចរថយន្តបង្កហេតុ ទៅអធិការដ្ឋាននគរបាលស្រុកទ្រាំង ដើម្បីរង់ចាំការដោះស្រាយតាមនីតិវិធី។
យោងតាមរបាយការណ៍ពីកន្លែងកើតហេតុ មន្ត្រីនគរបាលចរាចរណ៍បានប្រើប្រាស់ឧបករណ៍ និងមធ្យោបាយគ្រឿងចក្រធំៗមួយចំនួនមកជួយអន្តរាគមន៍ ស្ទូចអូសរថយន្តដឹកស្រូវប្រមាណជាង ២០ តោន ដែលបានក្រឡាប់សង្កត់លើរថយន្តដឹកមាន់កប់នៅក្នុងទឹកបឹង ដើម្បីជួយសង្គ្រោះជនរងគ្រោះ។ ប៉ុន្តែជនរងគ្រោះ ៣ នាក់បានស្លាប់នៅនឹងកន្លែងកើតហេតុ និង ២ នាក់ទៀតបានរងរបួសធ្ងន់ត្រូវបានដឹកទៅកាន់មន្ទីរពេទ្យ ។
របាយការណ៍បន្តថា៖ «ជនរងគ្រោះម្នាក់ ថាវ ស្រីឡែន អាយុ ២៣ ឆ្នាំជាអ្នករួមដំណើរលើរថយន្តដឹកស្រូវបានស្លាប់នៅពេលក្រុមគ្រូពេទ្យនៃមន្ទីរពេទ្យបង្អែកខេត្តតាកែវបញ្ជូនបន្តទៅកាន់មន្ទីរពេទ្យក្នុងរាជធានីភ្នំពេញ ព្រោះតែហូរឈាមខ្លាំងពេក»។
លោក វ៉ុន រដ្ឋា អាយុ ៣៨ ឆ្នាំដែលជាសាច់ញាតិ ជនរងគ្រោះឈ្មោះ ថាវ ស្រីឡែន បានប្រាប់ភ្នំពេញប៉ុស្តិ៍ថា នៅពេលនេះលោកកំពុងរង់ចាំទទួលរបាយការណ៍លម្អិតពីសមត្ថកិច្ចជំនាញ ដើម្បីរៀបចំបណ្ដឹងទាមទារសំណងរដ្ឋប្បវេណីពីក្រុមគ្រួសារសាច់ញាតិជនល្មើស ដែលបានបង្កគ្រោះថ្នាក់ចរាចរណ៍ដ៏សែនរន្ធត់នេះ។
លោក រដ្ឋា បានបន្តថា លោកមិនស្ថិតនៅក្នុងហេតុការណ៍នោះទេ ប៉ុន្តែយោងតាមរបាយការណ៍អង្កេតរបស់មន្ត្រីនគរបាលចរាចរណ៍នៅកន្លែងកើតហេតុ «គ្រោះថ្នាក់ចរាចរណ៍នេះបង្កឡើងពីអ្នកបើកបររថយន្តដឹកមាន់» ដែលបើកបរក្នុងល្បឿនលឿន និងខ្វះការប្រុងប្រយ័ត្នមកបុករថយន្តដឹកស្រូវ បណ្ដាលឱ្យខូចខាតទាំងទ្រព្យសម្បត្តិ និងបាត់បង់ជីវិតមនុស្ស។
លោកបានបញ្ជាក់ថា៖ «វាពិតណាស់ រថយន្តដឹកមាន់ដែលបង្កគ្រោះថ្នាក់ចរាចរណ៍នោះ វាតូចជាងរថយន្តដឹកស្រូវរបស់យើងខ្ញុំ ហើយអ្នកបើកបរ និងអ្នករួមដំណើលើរថយន្តនោះ សរុបគ្នា ៣ នាក់បានស្លាប់ទាំងអស់មែន ប៉ុន្តែដោយសារវាជាកំហុសនៃការបើកបររបស់គាត់បាននាំឱ្យពួកយើងខូចខាត រងរបួសម្នាក់ និងស្លាប់ម្នាក់ទៀតផងដែរ។ ដូច្នេះខ្ញុំយល់ថា ជាកាតព្វកិច្ចនៃការទទួលខុសត្រូវ គឺសាច់ញាតិ ឬម្ចាស់អាជីវកម្មទិញលក់មាន់នោះត្រូវសងសំណងរដ្ឋប្បវេណីមួយចំនួនដល់យើងខ្ញុំ»។
ដោយឡែកលោក តាប់ លន ស្នងការរងខេត្តកំពង់ស្ពឺទទួលបន្ទុកសណ្ដាប់ធ្នាប់ចរាចរណ៍បានប្រាប់ភ្នំពេញប៉ុស្តិ៍ថា នៅព្រឹកថ្ងៃទី ១១ ខែមេសា ឆ្នាំ ២០២២ មានករណី គ្រោះថ្នាក់ចរាចរណ៍មួយបានកើតឡើង ដោយបានធ្វើឱ្យជនរងគ្រោះ ២ នាក់ស្លាប់ ក្រោយពីរថយន្តមិនស្គាល់ម៉ាក ១ គ្រឿង បានបុកទៅលើម៉ូតូដែលជិះឌុបគ្នានៅលើផ្លូវជាតិលេខ ៤ ចន្លោះគីឡូម៉ែត្រលេខ ៦១-៦២ ស្ថិតក្នុងភូមិអន្លង់ថ្លឹង ឃុំមហាសាំង ស្រុកភ្នំស្រួច។
នៅក្នុងត្រីមាសទី ១ នៃឆ្នាំ ២០២២ នេះ គ្រោះថ្នាក់ចរាចរណ៍ផ្លូវគោកបានបង្កឱ្យមានជនរងគ្រោះ ៤៩៣ នាក់ស្លាប់ និង ១ ២៦២ នាក់ទៀតរងរបួស ក្នុងនោះ ៧៨៤ នាក់រងរបួសធ្ងន់។ នេះបើយោងរបាយការណ៍ដែលទទួលបានពីអគ្គស្នងការដ្ឋានគរបាលជាតិ។ ចំនួនអ្នកស្លាប់ដោយគ្រោះថ្នាក់ចរាចរណ៍ក្នុងត្រីមាសទី ១ ឆ្នាំ ២០២២ នេះគឺមានការកើនឡើងចំនួន ៦០ នាក់ បើធៀបទៅនឹងរយៈពេលដូចគ្នា កាលពីឆ្នាំ ២០២១ ដែលមានអ្នកស្លាប់ចំនួន ៤៣៣ នាក់៕
