.jpg)
មន្ត្រីរៀបចំដឹកជញ្ជូនវ៉ាក់សាំង ដែលដឹកមកដល់កម្ពុជានាពេលកន្លងមក។ ហេង ជីវ័ន
ភ្នំពេញៈ មន្ត្រីជាន់ខ្ពស់នៃក្រសួងសុខាភិបាលបានឱ្យដឹងថា រដ្ឋាភិបាលនៃប្រទេសឥណ្ឌាបានផ្តល់វ៉ាក់សាំងបង្ការ ជំងឺកូវីដ ១៩ ចំនួនជាង ៣២ ម៉ឺនដូសជូនរាជរដ្ឋាភិបាល និងប្រជាជនកម្ពុជា ដោយក្នុងនោះវ៉ាក់សាំងចំនួន ២០ ម៉ឺនដូសបានដឹកមកដល់នាល្ងាចថ្ងៃទី ១១ និងវ៉ាក់សាំងដែលនៅសល់នឹងដឹកមកដល់នៅថ្ងៃទី ១២ ឬទី ១៣ ខែមេសាខាងមុខនេះ។
លោកស្រី យក់ សម្បត្តិ រដ្ឋលេខាធិការនៃក្រសួងសុខាភិបាលបានលើកឡើងឱ្យដឹងនៅថ្ងៃទី ១១ ខែមេសា ថា វ៉ាក់សាំងបង្ការជំងឺកូវីដ ១៩ ដែលផ្តល់ដោយប្រទេសឥណ្ឌានេះនឹងធ្វើការប្រគល់ និងទទួលជាផ្លូវការដោយលោកនាយករដ្ឋមន្ត្រី ហ៊ុន សែន នាថ្ងៃទី ១២ ខែមេសា ផងដែរ នាវិមានសន្តិភាព។
យោងតាមរបាយការណ៍របស់ក្រសួងសុខាភិបាលបានឱ្យដឹងថា គិតត្រឹមថ្ងៃទី ១០ ខែមេសា កម្ពុជាបានចាក់វ៉ាក់សាំងដូសទី ១ បានជិត ១៥ លាននាក់, ដូសទី ២ បានជាង ១៤ លាននាក់, ដូសទី ៣ ទទួលបានជាង ៨ លាននាក់ និងដូសទី ៤ ចាក់បានជាង ១ លាននាក់ផងដែរ។
ប្រទេសកម្ពុជាបានទទួលវ៉ាក់សាំងបង្ការជំងឺកូវីដ ១៩ ទាំងវ៉ាក់សាំងដែលបញ្ជាទិញដោយរាជរដ្ឋាភិបាល និងការផ្តល់ជាជំនួយពីបណ្តាប្រទេសជាមិត្តសរុបបានចំនួនជិត ៥០ លានដូស ហើយប្រមុខរាជរដ្ឋាភិបាលកម្ពុជាក៏បានប្រកាសរួចហើយថា លោកបន្តទទួលជំនួយជាវ៉ាក់សាំងនេះពីគ្រប់បណ្តាប្រទេសនានាផងដែរ ដើម្បីទុកចាក់ជូនប្រជាពលរដ្ឋ។
ដោយសារដំណើរការនៃការចាក់វ៉ាក់សាំងបង្ការជំងឺកូវីដ-១៩ក្នុងប្រទេសកម្ពុជាដំណើរការល្អ និងរលូន ទើបធ្វើឱ្យប្រទេសកម្ពុជាបានឡើងមកឈរនៅលេខរៀងទី ២ ក្នុងនាមជាប្រទេសដែលមានសមត្ថភាពស្ដារខ្លួនងើបចេញពីមេរោគកូវីដ ១៩ លឿនជាងគេនៅលើពិភពលោក ដោយគិតត្រឹមចុងខែមីនា ឆ្នាំ ២០២២។ នេះបើយោងសារព័ត៌មាន Nikkei ដែលបានចេញកាលពីថ្ងៃទី ១០ ខែមេសា ឆ្នាំ ២០២២។
យោងតាមតារាងវាយតម្លៃសន្ទស្សន៍នៃការស្តារឡើងវិញនូវជំងឺ Covid-19 របស់ Nikkei (Nikkei''s Covid-19 Recovery Index) គិតត្រឹមថ្ងៃទី ៣១ ខែមីនា បានឱ្យដឹងថា ប្រទេសកម្ពុជាឈរនៅលេខរៀងទី ២ ដែលមានពិន្ទុ ៨០.៥ ពិន្ទុ គឺបន្ទាប់ពីប្រទេសអេមីរ៉ាតអារ៉ាប់រួម (UEA) ដែលទទួលបាន ៨៥.៥ ពិន្ទុ ជាប្រទេសដែលឈរនៅលេខរៀងទី ១ ដែលមានសមត្ថភាពស្ដារខ្លួនងើបចេញពី COVID-19 លឿនជាងគេនៅលើពិភពលោក។
ចំណែកប្រទេសដែលឈរលើលេខរៀងលំដាប់ទី ៣ គឺប្រទេស រ្វាន់ដា ដែលទទួលបាន ៨០ពិន្ទុ, លេខរៀងទី ៤ គឺសាធារណរដ្ឋដូមីនិក និងកោះតៃវ៉ាន់ ទទួលបាន ៧៨ ពិន្ទុ ចំណែកប្រទេសដែលមានលេខរៀងក្រោយគេដែលឈរលើលេខរៀងទី ១២១ គឺប្រទេសឡាវ ដែលទទួលបាន ៣៦ ពិន្ទុ។
ទាក់ទងដំណើរការនៃការចាក់វ៉ាក់សាំងក្នុងប្រទេសកម្ពុជា លោកស្រី ឱ វណ្ណឌីន អ្នកនាំពាក្យនៃក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) បានលើកឡើងថា ការចាក់វ៉ាក់សាំងកូវីដ ១៩ នៅតែធ្វើជាប្រចាំជារៀងរាល់ថ្ងៃ ហើយដំណើរការនៃការចាក់នេះមានវឌ្ឍនភាពទៅមុខយ៉ាងល្អប្រសើរផងដែរ។
លោកស្រី អ្នកនាំពាក្យរូបនេះបានឱ្យដឹងថា៖ «អ្វីដែលជាការសំខាន់នាពេលនេះ ដូចដែលយើងបានដឹងហើយថាបច្ចុប្បន្ននេះ វីរុសអូមីក្រុងក៏មានការបំប្លែងខ្លួនរបស់វាដែរ ដែលការបំប្លែងខ្លួននេះ យើងត្រូវបន្តប្រុងប្រយ័ត្នខ្ពស់ស្របពេលដែលយើងកំពុងតែរៀនរស់ជាមួយនឹងកូវីដ ១៩»។
លោកស្រី ឱ វណ្ណឌីន បានបន្តទៀតថា ការរក្សាឱ្យបាននូវភាពសុំាក្នុងសរីរាង្គរបស់បុគ្គលក៏ដូចជាការរក្សានូវភាពសុំានៅក្នុងសហគមន៍នេះគឺជាការចាំបាច់បំផុត។ ដូចនេះហើយបានជា គ.វ.ក-១៩ បានពិភាក្សាគ្នា និងស្វែងយល់បន្ថែមទៀតដោយបានយកចិត្តទុកដាក់ខ្ពស់ និងបានបង្ខិតនូវសេវាចាក់វ៉ាក់សាំងកូវីដ ១៩ នេះ ដោយធ្វើយ៉ាងណាឱ្យមានភាពកាន់តែងាយស្រួលសម្រាប់ប្រជាពលរដ្ឋស្វែងរកសេវាចាក់វ៉ាក់សាំងនេះ។
គួរបញ្ជាក់ផងដែរថា ក្រសួងសុខាភិបាលបានណែនាំឱ្យគ្រប់រាជធានីខេត្តទូទាំងប្រទេសរៀបចំបន្ថែមទៀតនូវកន្លែងចាក់វ៉ាក់សាំងជូនប្រជាពលរដ្ឋនៅទីកន្លែងកម្សាន្ត និងវត្តអារាមសម្រាប់ជាការងាយស្រួលដល់ពលរដ្ឋដែលមិនទាន់បានចាក់ និងអាចចាក់បាននៅពេលដែលពួកគេទៅកម្សាន្តនៅទីតាំងណាមួយ៕
