.jpg)
រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង។ ក្រសួងការងារ
ភ្នំពេញៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង ដឹកនាំគណៈប្រតិភូទៅសួរសុខទុក្ខពលករខ្មែរដែលកំពុងធ្វើការ និងរស់នៅប្រទេសថៃ ព្រមទាំងសម្របសម្រួលជាមួយភាគីថៃ ដើម្បីផ្តល់ភាពស្របច្បាប់ជូនបងប្អូនពលករកម្ពុជាដែលមិនទាន់ស្របច្បាប់។
ស្របពេលពិធីបុណ្យចូលឆ្នាំប្រពៃណីខ្មែរនឹងចូលមកដល់ក្នុងពេលដ៏ខ្លីខាងមុខនេះ លោក អ៊ិត សំហេង ដែលក៏ជាប្រធានគណៈកម្មការផ្តល់ភាពស្របច្បាប់ដល់ពលករកម្ពុជាកំពុងស្នាក់នៅ និងធ្វើការក្នុងប្រទេសថៃ នៅថ្ងៃទី ១០ មេសា បានដឹកនាំគណៈប្រតិភូចុះសួរសុខទុក្ខ និងសំណេះសំណាលជាមួយបងប្អូនពលករខ្មែរ ដែលកំពុងធ្វើការនិងរស់នៅក្នុងប្រទេសថៃ រួមនឹងក្រុមនិស្សិតកំពុងបន្តការសិក្សានៅទីនោះក្នុងកម្មវិធីសង្ក្រាន្តខ្មែរនៅថៃ។
ប្រតិភូដែលបានធ្វើដំណើរទៅកាន់ប្រទេសថៃ រួមមានសមាសភាព មកពីក្រសួងការងារ និងបណ្តុះបណ្តាលវិជ្ជាជីវៈ ក្រសួងមហាផ្ទៃ ស្ថានទូត ដែលជាតំណាងក្រសួងការបរទេស និងសហប្រតិបត្តិការអន្តរជាតិ រួមនឹងក្រុមការងារ ដើម្បីបំពេញបេសកកម្មផ្ដល់ភាពស្របច្បាប់ ជូនពលករកម្ពុជានៅប្រទេសថៃក៏ដូចជាបន្តពង្រឹងពង្រីក កិច្ចសហប្រតិបត្តិការរវាងប្រទេស ទាំង ២ លើវិស័យការងារ ដោយចាប់ផ្តើមប្រតិបត្តិការផ្តល់ភាពស្របច្បាប់ជូនពលករកម្ពុជាដែលមិនទាន់ស្របច្បាប់។
នាឱកាសនោះលោកលើកឡើងថា ពិធីបុណ្យចូលឆ្នាំខ្មែរ គឺជាបុណ្យប្រពៃណីជាតិដ៏ធំរបស់ខ្មែរ ដែលកាន់ព្រះពុទ្ធសាសនា ដែលស្ថិតក្នុងដួងចិត្តខ្មែរគ្រប់រូប តាំងពីបុរាណកាលមក។ ពិធីប្រពៃណីនេះទៀតសោត បង្ហាញពីទឹកចិត្តស្រឡាញ់វប្បធម៌ ប្រពៃណីជាតិខ្មែរ ស្មារតីសាមគ្គីជាតិ ទោះជាខ្មែរទៅដល់ទីណាក៏នៅតែស្នេហាជាតិខ្មែរ។
ទន្ទឹមនឹងនេះ លោករដ្ឋមន្ត្រីកោតសរសើរចំពោះឯកអគ្គរាជទូតកម្ពុជាប្រចាំប្រទេសថៃ និងសហការី ដែលបានខិតខំបំពេញភារកិច្ចការទូតតាមគោលនយោបាយរបស់រាជរដ្ឋាភិបាលក្នុងការពង្រឹងពង្រីកកិច្ចសហប្រតិបត្តិការជិតខាងល្អ កម្ពុជា-ថៃ ទាំង ផ្នែកសេដ្ឋកិច្ច អប់រំ វិស័យការងារជាដើម។ ផ្ដល់ឱកាសដល់និស្សិត-កម្ពុជាបានសិក្សា និងក៏ជាឱកាសមួយទៀត សម្រាប់ពលករកម្ពុជាបានធ្វើការទទួលបានប្រាក់ចំណូល សម្រាប់ផ្គត់ផ្គង់ក្រុមគ្រួសារបានមួយកម្រិតដែរ។
លោកថា៖ «ភារកិច្ចរបស់ក្រុមការងារផ្ដល់ភាពស្របច្បាប់លើកនេះគឺបន្តសុពលភាពលិខិតធ្វើដំណើរ (TD) និងបណ្ណការងារនៅ បរទេស (OCWC) ជូនពលករខ្មែរដែលផុតសុពលភាព។ ព្រោះក្នុងបរិបទដែលកូវីដ ១៩ បានរាលដាលខ្លាំងកន្លងទៅ ការបន្តសុពលភាពជួបការលំបាក ដោយសារប្រទេសកម្ពុជា និងប្រទេសថៃបានអនុវត្តនូវវិធានការសុខាភិបាលដ៏តឹងរ៉ឹង»។
លោកថា ដោយកិច្ចសហការល្អ រវាងប្រទេសទាំង ២ ភាគីថៃបានចេញបណ្ណពណ៌ស៊ីជម្ពូដែលអាចរស់នៅ និងធ្វើការស្របច្បាប់បាន ដែលជាផ្នែកមួយជួយសម្រួលដល់ពលករខ្មែរមួយកម្រិតទៀត។ ទន្ទឹមនឹងនេះ លោកកោតសរសើរស្ថានទូតកម្ពុជាប្រចាំប្រទេសថៃ ដែលបានយកចិត្តទុកដាក់សហការល្អជាមួយភាគីថៃ ដោះស្រាយបញ្ហាប្រឈមនានារបស់ពលរដ្ឋខ្មែរ។ ធ្វើឱ្យពលរដ្ឋរស់នៅប្រទេសថៃបានទទួលសេវាសុខាភិបាលដូចប្រជាជនថៃ និងជនបរទេសដែរ។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក ឃុន ថារ៉ូ ថ្លែងថា កន្លងមកក្រសួងបានសហការជាមួយថៃចុះបញ្ជីផ្តល់ភាពស្របច្បាប់នេះ គឺជារឿងវិជ្ជមាន។ លោកជំរុញអាជ្ញាធរកម្ពុជា អនុវត្តការផ្តល់ភាពស្របច្បាប់ឱ្យកាន់តែមានប្រសិទ្ធភាព ដោយលោកថា តួលេខពលករខ្មែរធ្វើការនៅប្រទេសថៃមានច្រើនទាំងតួលេខក្នុងប្រព័ន្ធ និងក្រៅប្រព័ន្ធ។
លោកនិយាយថា៖ «អ្នកទៅធ្វើការងារមិនមានភាពស្របច្បាប់ គឺមានច្រើនណាស់ ជាពិសេសនៅក្នុងវិស័យសេដ្ឋកិច្ចក្រៅប្រព័ន្ធ។ ដូច្នេះវាចាំបាច់ដែលត្រូវជំរុញបន្ថែមទាក់ទងរឿងការផ្តល់សេវាឱ្យវាកាន់តែកៀក និងងាយស្រួលសម្រាប់គាត់ក្នុងការរៀបចំបែបបទ ឯកសារ ជាពិសេសតំបន់ដែលមានពលករខ្មែរធ្វើការច្រើន»។
លោក ថារ៉ូ ឱ្យដឹងថា តាមបណ្តាញរបស់ខ្លួន ដែលធ្វើការជាមួយកម្មករនៅថៃក្នុងវិស័យឧស្សាហកម្មផ្សេងៗភាគច្រើនមានបញ្ហាទាក់ទងករណីវិវាទការងារ នៅតាម ទីតាំង ទីកន្លែងក្រុមហ៊ុនមួយចំនួន។ ជាពិសេសនៅវិស័យសំណង់ជួបបញ្ហាច្រើន ដែលថៅកែមិនបើកប្រាក់ឈ្នួលដល់ពួកគាត់ ដែលទាមទារឱ្យអាជ្ញាធរកម្ពុជាត្រូវជួយអន្តរាគមន៍ក្នុងរឿងនេះ។
លោកថា៖ «ព្រោះពលករខ្លះមិនទាន់មានឯកសារស្របច្បាប់ត្រឹមត្រូវ ដូច្នេះរឿងនេះនិយោជកគាត់ងាយស្រួលក្នុងការកេងចំណេញកម្លាំងពលកម្ម និងប្រាក់ឈ្នួលពួកគាត់។ រីឯករណីគ្រោះថ្នាក់ការងារ ក៏មិនទាន់មានសំណងត្រឹមត្រូវនៅថៃ»។
លោក អ៊ិត សំហេង ថ្លែងទៅកាន់ពលករខ្មែរ និងនិស្សិតថា រាជរដ្ឋាភិបាលកម្ពុជាបានគិតគូរយ៉ាងខ្លាំងពីសុខទុក្ខ និងព្រួយបារម្ភពីសុខុមាលភាពរបស់ពលករនៅក្រៅប្រទេសជាប់ជាប្រចាំ៕
