.jpg)
រូបសំណាកព្រះថោង នាងនាគ ត្រូវបានស្ទូចដំឡើងដាក់លើបល្ល័ង្ក មានកម្ពស់សរុប ២១ ម៉ែត្រ។ រូប រដ្ឋបាលខេត្តព្រះសីហនុ
ព្រះសីហនុៈ លោកនាយករដ្ឋមន្ត្រី ហ៊ុន សែន នឹងធ្វើជាអធិបតីក្នុងពិធីអភិសេករូបសំណាក «ព្រះថោងនាងនាគ» នៅថ្ងៃទី ១៦ ខែមេសា ស្ថិតនៅភូមិគគីរ ឃុំបិតត្រាំង ស្រុកព្រៃនប់ ខណៈគិតត្រឹមថ្ងៃទី ១១ មេសា ការដំឡើងរូបសំណាកនេះបានរួចរាល់ស្ទើរ ១០០ ភាគរយហើយ។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុថ្លែងប្រាប់ភ្នំពេញប៉ុស្ដិ៍នៅថ្ងៃទី ១១ មេសាថា កាលពីវេលាម៉ោង ២២ យប់ថ្ងៃទី ១០ ខែមេសា លោក គួច ចំរើន អភិបាលខេត្តព្រះសីហនុបានជួបសំណេះសំណាលជាមួយកម្មករ និងក្រុមការងារជំនាញដែលកំពុងបំពេញការងារ ដំឡើងរូបសំណាកនៅរង្វង់មូលព្រះថោងនាងនាគស្ថិតនៅភូមិគគីរ ឃុំបិតត្រាំង ស្រុកព្រៃនប់។ លោកថ្លែងថា៖ «ក្នុងឱកាសនោះឯកឧត្ដមអភិបាលបានសំណេះសំណាល និងពាំនាំនូវការផ្ដាំផ្ញើក្តីនឹករឭក សួរសុខទុក្ខពីសម្តេចអគ្គមហាសេនាបតីតេជោ ហ៊ុន សែន ជូនដល់បងប្អូនកម្មករ និងក្រុមការងារជំនាញទាំងអស់ដែលបានខិតខំប្រឹងប្រែងធ្វើការយ៉ាងយកចិត្តទុកដាក់ទាំងយប់ទាំងថ្ងៃ អស់ពីកម្លាំងកាយចិត្ត នាឱកាសពិធីបុណ្យចូលឆ្នាំថ្មីប្រពៃណីខ្មែរ សូមទទួលបានសិរីសួស្តី ជ័យមង្គលគ្រប់ក្រុមគ្រួសារ»។
ក្នុងឱកាសនោះលោកអភិបាលខេត្តក៏បាននាំយកថវិការបស់លោក ហ៊ុន សែន ឧបត្ថម្ភដល់កម្មករ និងក្រុមការងារជំនាញចំនួន ៣៥ នាក់ ក្នុង ១ នាក់ទទួលបានថវិកា ៤០ ម៉ឺនរៀល។
លោក ភារម្យ បញ្ជាក់ថា៖ «ចំពោះការដំឡើងរូបសំណាក ព្រះថោងនាងនាគ មែនទែនទៅស្ទើរតែរួចរាល់ហើយ។ ដោយឡែកចំពោះការរៀបចំពិធីអភិសេករូបសំណាកនេះនឹងធ្វើឡើងក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិតិ្តព្រឹទ្ធបណ្ឌិត»។ ការសាងសង់រង្វង់មូល ព្រះថោងនាងនាគ គឺធ្វើឡើងក្នុងគម្រោងថវិកា ការស្ថាបនាហេដ្ឋារចនាសម្ព័ន្ធផ្លូវទាំង ៣៤ ខ្សែក្នុងខេត្ដព្រះសីហនុ។
កាលពីម៉ោង ៨ យប់ ថ្ងៃទី ៨ ខែមេសា លោក គួច ចំរើន បានដឹកនាំបញ្ជាផ្ទាល់ក្នុងដំណើរការលើករូបសំណាក ព្រះថោងនាងនាគ ដាក់គង់លើបល្ល័ង្ក ហើយមកដល់ម៉ោង ១ និង ៣០ នាទី ព្រឹកថ្ងៃទី ៩ ខែមេសា រូបសំណាកនេះបានលើកដាក់លើបល្ល័ង្កបានដោយជោគជ័យ។
រូបសំណាក ព្រះថោងនាងនាគ ធ្វើឡើងពីស្ពាន់មានទម្ងន់ ៦០ តោន កម្ពស់ពីព្រះបាទដល់កំពូលមកុដ ២១ ម៉ែត្រ មានអង្កត់ផ្ចិត ៩៩ ម៉ែត្រ ដាក់លើបល្ល័ង្កកម្ពស់ជាង ៦ ម៉ែត្រ សម្រាប់ដាក់នៅរង្វង់មូលព្រះថោងនាងនាគ ស្ថិតនៅភូមិគគីរ ឃុំបិតត្រាង ស្រុកព្រៃនប់ ដោយរូបសំណាកនេះឈរបែរព្រះភក្ត្រឆ្ពោះទៅសមុទ្ររាម។ រូបសំណាកនេះជារូបសំណាកទី ៣ បន្ទាប់ពីរូបសំណាកបដិមាព្រះឧមាមហេសូរ នៅរង្វង់មូលព្រះឧមាមហេសូរ ស្ថិតនៅភូមិថ្មធំ ឃុំរាម ស្រុកព្រៃនប់ និងរូបសំណាក សីហរាជមុខ ៣ ដែលនៅខាងមុខរោងចក្រស្រាបៀរអង្គរ ស្ថិតនៅសង្កាត់លេខ ១ ក្រុងព្រះសីហនុ។
លោក ហ៊ុន សែន កាលពីថ្ងៃទី ៩ មិថុនា ឆ្នាំ ២០២១ បានចុះហត្ថលេខាលើអនុក្រឹត្យលេខ ៨២ អនក្រ.បក ស្តីពី «ការរៀបចំ និងការប្រព្រឹត្តទៅរបស់គណៈកម្មាធិការបច្ចេកទេសអន្តរក្រសួងរៀបចំគោលនយោបាយគ្រប់គ្រង និងប្រើប្រាស់ដីធ្លី ដើម្បីអភិវឌ្ឍន៍ខេត្តព្រះសីហនុឱ្យទៅជាតំបន់សេដ្ឋកិច្ចពិសេសគំរូពហុបំណង (គ.ប.ដ.)»។
តាមខ្លឹមសារអនុក្រឹត្យ គណៈកម្មការអន្តរក្រសួងដែលមានសមាជិកជាមន្ត្រីជាន់ខ្ពស់នៅតាមក្រសួងស្ថាប័នមួយចំនួន និងអភិបាលខេត្តព្រះសីហនុ សរុប ២៥ រូប មានតួនាទី និងភារកិច្ច ដឹកនាំ និងសម្របសម្រួលអន្តរក្រសួងស្ថាប័នក្នុងការរៀបចំគោលនយោបាយគ្រប់គ្រង និងប្រើប្រាស់ដីធ្លី ដើម្បីអភិវឌ្ឍន៍ខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង។
គណៈកម្មការអន្តរក្រសួងក៏មានភារកិច្ចផ្តល់ការណែនាំជាយុទ្ធសាស្ត្រ និងបច្ចេកទេសក្នុងការរៀបចំគោលនយោបាយគ្រប់គ្រង និងប្រើប្រាស់ដីធ្លី ដើម្បីអភិវឌ្ឍខេត្តព្រះសីហនុ តាមដាន និងត្រួតពិនិត្យវឌ្ឍនភាពនៃការរៀបចំគោលនយោបាយ រៀបចំរបាយការណ៍ពីវឌ្ឍនភាពនៃការរៀបចំគោលនយោបាយគ្រប់គ្រង និងប្រើប្រាស់ដីធ្លី ជូនក្រុមប្រឹក្សារៀបចំផែនការមេ និងធ្វើកិច្ចសហប្រតិបត្តិការបច្ចេកទេស និងហិរញ្ញវត្ថុជាមួយដៃគូអភិវឌ្ឍន៍ជាតិ និងអន្តរជាតិ។
តាមរយៈផែនការអភិវឌ្ឍន៍ខេត្ដនេះរាជរដ្ឋាភិបាលបានចំណាយថវិការដ្ឋប្រមាណ ២៩៤ លានដុល្លារអាមេរិក កសាងហេដ្ឋារចនាសម្ព័ន្ធនានា និងផ្លូវជិត ៤០ ខ្សែ ក្នុងខេត្ដព្រះសីហនុ៕
វីដេអូ៖
