ភ្នំពេញៈ លោកនាយករដ្ឋមន្ត្រី ហ៊ុន សែន ប្រកាសឱ្យប្រជាពលរដ្ឋក្នុងខេត្តចំនួន ៤ ធ្វើការសម្រេចក្នុងការពាក់ ឬមិនពាក់ម៉ាស់ ដើម្បីផ្តល់លទ្ធភាពឱ្យប្រជាពលរដ្ឋយកការទទួលខុសត្រូវដោយខ្លួនឯង ដោយមិនបង្ខំឱ្យពាក់ម៉ាស់ ឬក៏មិនពាក់ម៉ាស់នោះទេ គឺទុកឱ្យពលរដ្ឋជ្រើសរើសដោយខ្លួនឯង។
ការសម្រេចបែបនេះ បន្ទាប់ពីលោកនាយករដ្ឋមន្ត្រីបានពិគ្រោះយោបល់ជាមួយថ្នាក់ដឹកនាំ ដែលមានឧបនាយករដ្ឋមន្ត្រី រដ្ឋមន្ត្រីក្រសួងសុខាភិបាល និងផ្នែកពាក់ព័ន្ធដទៃទៀតផងដែរ កាលពីថ្ងៃទី ១០ មេសា។ តាមរយៈសារសំឡេង នាថ្ងៃទី ១០ ខែមេសា លោក ហ៊ុន សែន ថ្លែងថា៖ «ខ្ញុំ ក្នុងនាមរាជរដ្ឋាភិបាល សុំបញ្ជាក់ និងសម្រេចថា យើងដាក់ខេត្ត ៤ គឺខេត្តរតនគិរី មណ្ឌលគិរី ស្ទឹងត្រែង និងព្រះវិហារ ជាខេត្តដែលទុកលទ្ធភាពឱ្យបុគ្គលជាអ្នកសម្រេចថា ពាក់ម៉ាស់ ឬមិនពាក់ម៉ាស់»។
លោកពន្យល់ថា ប្រជាពលរដ្ឋក្នុងខេត្តទាំង ៤ នេះមិនតម្រូវឱ្យត្រូវតែពាក់ម៉ាស់នោះទេ ប៉ុន្តែទុកលទ្ធភាពឱ្យប្រជាជនសម្រេចចិត្តដោយខ្លួនឯងថា តើគួរពាក់ម៉ាស់ ឬមិនគួរពាក់នៅក្នុងខេត្តទាំង ៤ នេះ។
លោកនាយករដ្ឋមន្ត្រីបញ្ជាក់ថា៖ «ធ្វើដូចនេះ ដើម្បីឱ្យប្រជាពលរដ្ឋរបស់យើងធ្វើការទទួលខុសត្រូវ ដោយខ្លួនឯង ដោយមិនបង្ខំឱ្យពាក់ម៉ាស់ ឬក៏មិនពាក់ម៉ាស់នោះទេ គឺទុកឱ្យពលរដ្ឋជ្រើសរើសខ្លួនឯង។ សង្ឃឹមថា ប្រជាពលរដ្ឋរបស់យើងនឹងពិចារណាដោយខ្លួនឯងក្នុងការជ្រើសរើសពាក់ ឬមិនពាក់ម៉ាស់នេះ»។
ប៉ុន្តែលោក ហ៊ុន សែន ក៏បានបញ្ជាក់ដែរថា អ្នកដែលចេញពីខេត្តទាំង ៤ នេះនៅពេលចូលទៅកាន់ខេត្តផ្សេង គឺត្រូវតែពាក់ម៉ាស់។ ចំណែកអ្នកដែលមកពីខេត្តផ្សេងចូលក្នុងខេត្តទាំង ៤ នេះ ក៏អាចសម្រេចចិត្តបានដោយខ្លួនឯងផងដែរថា តើពាក់ ឬមិនពាក់ម៉ាស់ ដោយលោកទុកសិទ្ធិឱ្យបុគ្គលនោះជាអ្នកសម្រេច។
លោកមានប្រសាសន៍ថា៖ «ខ្ញុំសុំបញ្ជាក់ថា ក្រោយការចាកចេញពីខេត្តទាំង ៤ នេះ គឺត្រូវតែពាក់ម៉ាស់ជាកាតព្វកិច្ចដែលស្ថិតនៅក្នុងវិធានការសុខាភិបាល ៣ ការពារ និង ៣ កុំ»។
ការអនុវត្តនូវការមិនពាក់ម៉ាស់ចំពោះប្រជាពលរដ្ឋនៅក្នុងខេត្តទាំង ៤ នេះ ត្រូវបានលោកនាយករដ្ឋមន្ត្រី ហ៊ុន សែន អនុញ្ញាតឱ្យអនុវត្តចាប់ពីល្ងាចថ្ងៃទី ១០ មេសា តទៅ។ លោកក៏បានស្នើទៅលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក ម៉ម ប៊ុនហេង រដ្ឋមន្ត្រីក្រសួងសុខាភិបាល ដឹកនាំកិច្ចប្រជុំ ដើម្បីចាត់វិធានការ ណែនាំលើវិធានការបន្ថែមដែលត្រូវប្រកាន់យកសម្រាប់ខេត្តទាំង ៤ នេះផងដែរឱ្យបានឆាប់តាមដែលអាចធ្វើបាន។
ជាមួយគ្នានេះ លោក ហ៊ុន សែន ក៏បានរំឭកទៅដល់អាជ្ញាធរខេត្តទាំង ៤ នេះ ក៏ត្រូវប្រុងប្រៀបផងដែរទៅលើវិធានការធ្វើតេស្តរហ័ស រកមេរោគកូវីដ ១៩។ លោកក៏បានអំពាវនាវដល់ប្រជាពលរដ្ឋ ដែលមានការសង្ស័យ ត្រូវតែស្វះស្វែងរកការធ្វើតេស្តពីក្រុមគ្រូពេទ្យផងដែរ។
លោកបញ្ជាក់ថា៖ «នេះការសាកល្បងភាពធន់ ភាពសុំាសហគមន៍ ដែលយើងបានអនុវត្តដោយជោគជ័យក្នុងរយៈពេលកន្លងទៅ ហើយខ្ញុំសង្ឃឹមថា ពីទីក្រុងក៏មិននាំជំងឺទៅជនបទ ហើយពេលត្រឡប់ពីខេត្តទាំង ៤ នេះវិញចាំបាច់ត្រូវតែពាក់ម៉ាស់»។
លោកនាយករដ្ឋមន្ត្រី ហ៊ុន សែន ក៏បានស្នើឱ្យអាជ្ញាធរយកចិត្តទុកដាក់ពិនិត្យ តាមដានឱ្យបានហ្មត់ចត់ ហើយក្រសួងសុខាភិបាល ក៏ត្រូវតែពិនិត្យ និងតាមដានដូចគ្នាផងដែរទៅលើការអនុវត្ត វិធានការសាកល្បងនេះ។
លោកថ្លែងថា៖ «យើងសាកល្បងនេះមិនមែនយកជីវិតរបស់ប្រជាជនទៅសាកល្បងទេ ក៏ប៉ុន្តែយើងចង់ដឹងពីភាពធន់ ភាពសុំាសហគមន៍របស់យើង ទាំងទីក្រុង និងជនបទ ហើយខេត្តដែលយើងដាក់ឱ្យអនុវត្តនេះជាខេត្តដែលគ្មានឆ្លង និងមានការឆ្លងតិចតួចណាស់ក្នុងរយៈកាលកន្លងមកនេះ»។
លោកវេជ្ជបណ្ឌិត គួង ឡូ ប្រធានមន្ទីរសុខាភិបាលខេត្តព្រះវិហារប្រាប់ភ្នំពេញ-ប៉ុស្តិ៍នៅថ្ងៃទី ១១ មេសាថា ក្នុងរយៈពេលប៉ុន្មានខែចុងក្រោយនេះ ខេត្តព្រះវិហារមិនមានការរកឃើញអ្នកឆ្លងមេរោគកូវីដ ១៩ ឡើយ។ នៅក្នុងមន្ទីរពេទ្យ ទាំងកន្លែងសង្គ្រោះបន្ទាន់ និងកន្លែងសម្រាកព្យាបាលកម្រិតស្រាល ក៏មិនមានអ្នកជំងឺដែរ ខណៈមានតិចតួចបំផុតអ្នកជំងឺព្យាបាលនៅតាមផ្ទះ។
លោកប្រាប់ថា៖ «ស្ថានភាពនៃការឆ្លងមេរោគកូវីដ ១៩ នៅក្នុងខេត្តព្រះវិហារ គឺមានស្ថានភាពល្អមែនទែន ដោយសារមិនមានការរកឃើញអ្នកឆ្លងមេរោគនេះ ហើយណាមួយដោយសារតែការចាក់វ៉ាក់សាំងបង្ការជំងឺកូវីដ ១៩ គ្របដណ្តប់ស្ទើរតែ ១០០% ផងដែរទូទាំងខេត្តព្រះវិហារ»។
ទាក់ទងនឹងវិធានការការពារពីមេរោគកូវីដ ១៩ សម្រាប់ប្រជាពលរដ្ឋក្នុងខេត្តព្រះវិហារ គឺមានការយល់ដឹងច្រើនប្រមាណជា ៨០ ទៅ ៩០%។ ប៉ុន្តែនៅមានអ្នកបំពានខ្លះផងដែរ បន្ទាប់ពីស្ថានភាពនៃការឆ្លង និងស្លាប់មានការថយចុះច្រើន។
លោកវេជ្ជបណ្ឌិត គួង ឡូ ថ្លែងថា៖ «ខ្ញុំគិតថា ប្រសិនបើការមិនពាក់ម៉ាស់នេះហើយមិនមានបញ្ហាអ្វីកើតឡើងទេនោះគឺជារឿងល្អមែនទែន។ ពីព្រោះប្រជាពលរដ្ឋ ត្រូវចំណាយក្នុងការទិញម៉ាស់ជាប្រចាំថ្ងៃ ទោះបីជាតម្លៃម៉ាស់ថោកក៏ដោយ។ ខ្ញុំគិតថា សម្តេចនាយកធ្វើការសម្រេចដូចនេះក៏ផ្អែកលើស្ថានភាពនៃការចាក់ស្រោចវ៉ាក់សាំងបានខ្ពស់ផងដែរ ហើយខេត្តទាំង ៤ នេះ ក៏មិនមែនជាខេត្តដែលមានប្រជាពលរដ្ឋច្រើនកុះករដែរ»៕