.jpg)
សមត្ថកិច្ចបង្ក្រាបល្បែងភ្នាល់ជល់មាន់ និងល្បែងអាប៉ោង ១ កន្លែងខេត្តកំពង់ចាម កាលពីថ្ងៃទី ១១ មេសា។ រូបថត ប៉ូលិស
កំពង់ចាមៈ បុរសលេងល្បែងភ្នាល់ជល់មាន់ និងល្បែងអាប៉ោង ១៥ នាក់ ត្រូវបាននគរបាលខេត្តកំពង់ចាម បញ្ជូនទៅសាលាដំបូងខេត្តនៅថ្ងៃទី ១១ មេសា បន្ទាប់ពីឃាត់ខ្លួនបាន ១ ថ្ងៃ នៅភូមិ-ឃុំ គោករវៀង ស្រុកជើងព្រៃ ខេត្តកំពង់ចាម។
លោក ហេង វុទ្ធី ស្នងការរងទទួលផែនការងារនគរបាលព្រហ្មទណ្ឌខេត្តកំពង់ចាមឱ្យដឹងនាថ្ងៃទី ១១ មេសាថា ជនសង្ស័យជាមនុស្សប្រុសចំនួន ១៥ នាក់ ត្រូវបាននគរបាលជំនាញព្រហ្មទណ្ឌកសាងសំណុំរឿងបញ្ជូនទៅសាលាដំបូងខេត្តកំពង់ចាមនៅព្រឹកថ្ងៃទី ១១ មេសា។ ការឃាត់ខ្លួននេះ បន្ទាប់ពីកម្លាំងជំនាញព្រហ្មទណ្ឌទទួលបញ្ជាពីលោក ឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម។
លោកថ្លែងថា៖ «ករណីក្រុមជនសង្ស័យខាងលើនេះ ខ្ញុំបានកសាងសំណុំរឿងបញ្ជូនទៅតុលាការព្រឹកមិញអស់ហើយ [ថ្ងៃទី ១១ មេសា]។ ចំពោះការចោទប្រកាន់បឋមរបស់សមត្ថកិច្ចយើងពាក់ព័ន្ធនឹងបទល្បែងស៊ីសង»។
ចំពោះការឃាត់ខ្លួនក្រុមជនសង្ស័យខាងលើលោក ហេង វុទ្ធី មិនបានបញ្ជាក់លម្អិតឡើយ។ ប៉ុន្តែបើតាមមន្ត្រីនគរបាលស្រុកជើងព្រៃ ១ រូបសុំមិនឱ្យបញ្ចេញឈ្មោះប្រាប់ថា នគរបាលស្រុកជើងព្រៃមិនបានចុះអនុវត្តផ្ទាល់ទេ ប៉ុន្តែខាងនគរបាលព្រហ្មទណ្ឌខេត្តជាអ្នកបង្ក្រាប ហើយនគរបាលស្រុកជើងព្រៃបានចូលរួមសហការបង្ក្រាប។
មន្ត្រីនគរបាលបន្តថា ការចុះបង្ក្រាបនេះបន្ទាប់ពីសមត្ថកិច្ចនគរបាលស្រុកជើងព្រៃទទួលបានសេចក្តីរាយការណ៍ពីអ្នកភូមិថា មានមនុស្សមួយក្រុមលួចលេងល្បែងភ្នាល់ជល់មាន់។ បន្ទាប់ពីទទួលបានសេចក្តីរាយការណ៍នេះ ក៏រាយការណ៍បន្តទៅកម្លាំងជំនាញព្រហ្មទណ្ឌខេត្តហើយក៏ចុះមកបង្ក្រាបតែម្តង។
មន្ត្រីរូបនោះថា៖ «នេះជាការអនុវត្តគោលនយោបាយភូមិឃុំមានសុវត្ថិភាព ហើយការងារនេះ កម្លាំងសមត្ថកិច្ចរបស់ស្រុកជើងព្រៃតែងតែអនុវត្តជាប្រចាំ។ អំពើភ្នាល់ល្បែងនេះ ទោះជាប្រភេទណាក៏ដោយ ក៏មិនត្រូវឱ្យមានដែរនៅក្នុងមូលដ្ឋានយើង»៕
