.jpg)
ក្រុមអ្នកជំនាញផ្គុំសាកល្បងព្រះហស្តព្រះបាទជ័យវរ្ម័នទី ៧ នៅសារមន្ទីរជាតិកន្លងមក។ រូបថត FB
ភ្នំពេញៈ លោក ឆាយ វិសុទ្ធ ប្រធាននាយកដ្ឋានសារមន្ទីរនៃក្រសួងវប្បធម៌ និងវិចិត្រសិល្បៈបានឱ្យដឹងថា ក្រុមការងារបច្ចេកទេសនៃក្រសួងវប្បធម៌ និងវិចិត្រសិល្បៈមិនទាន់មានគម្រោងតភ្ជាប់បំណែកព្រះហស្តព្រះបាទជ័យវរ្ម័នទី ៧ ដែលបានរកឃើញតាំងពីអំឡុងទសវត្សរ៍ឆ្នាំ ១៩៩០ ភ្ជាប់ទៅនឹងរូបចម្លាក់ព្រះអង្គដែលកំពុងរក្សាទុកនៅសារមន្ទីរជាតិនៅឡើយទេ ដោយហេតុថា ការងារនេះកំពុងពិភាក្សាជាមួយថ្នាក់ដឹកនាំ។
លោក ឆាយ វិសុទ្ធ ថ្លែងប្រាប់ភ្នំពេញប៉ុស្ដិ៍កាលពីថ្ងៃទី ១០ មេសាថា បំណែកព្រះហស្តរបស់ព្រះបាទជ័យវរ្ម័នទី ៧នេះ គឺបានរកឃើញតាំងពីទសវត្សរ៍ឆ្នាំ ១៩៩០ ដោយបុរាណវិទូខ្មែរ លោក មីសែល ត្រាណេ។
លោកថ្លែងថា៖ «កិច្ចការងារនេះរឿងដែលសំខាន់ គឺយើងត្រូវជជែកស្នើសុំគោលការណ៍ពីថ្នាក់ដឹកនាំសិន។ ទាល់តែថ្នាក់ដឹកនាំអនុញ្ញាតឱ្យយើងធ្វើការសិក្សាតភ្ជាប់ព្រះហស្តទៅនឹងរូបព្រះអង្គនោះបានយើងធ្វើបន្ត។ ប៉ុន្ដែបើមិនទាន់មានការអនុញ្ញាតពីថ្នាក់ដឹកនាំ យើងក៏មិនទាន់ហ៊ានធ្វើអ្វីដែរលើកិច្ចការងារនេះ»។
លោកបញ្ជាក់ថា៖ «ប៉ុន្ដែទោះជាយ៉ាងណាជាលក្ខណៈបច្ចេកទេស យើងក៏បានគិតគូរដែរជាមួយក្រុមការងារបច្ចេកទេស គឺបានគិតគូរមុនដែរថា ក្នុងករណីដែលថ្នាក់ដឹកនាំក្រសួងវប្បធម៌ និងវិចិត្រសិល្បៈអនុញ្ញាតថាតើយើងគួរតភ្ជាប់យ៉ាងម៉េច»។
លោកលើកឡើងថា កិច្ចការងារតភ្ជាប់បំណែកព្រះហស្តនេះ ការងារដែលសំខាន់គឺការផ្សព្វផ្សាយជាមុន គឺត្រូវធ្វើការផ្សព្វផ្សាយជាមុនឱ្យបានទូលំទូលាយ។ ក្រៅពីនេះគឺ ត្រូវស្នើសុំគោលការណ៍ទៅថ្នាក់ដឹកនាំក្រសួង សម្រាប់ការពិនិត្យលទ្ធភាពក្នុងការតភ្ជាប់បំណែកព្រះហស្តនេះឡើងវិញ។
លោក វិសុទ្ធ ថ្លែងថា៖ «ព្រះហស្តព្រះអង្គ យើងរកឃើញតាំងពីទសវត្សរ៍ឆ្នាំ ១៩៩០ មកម្ល៉េះដោយលោក បណ្ឌិត មីសែល ត្រាណេ ប៉ុន្ដែកាលនោះយើងមិនបានធ្វើការផ្សព្វផ្សាយអ្វីទេ ព្រោះក្រុមការងារបច្ចេកទេសមិនទាន់បានយកព្រះហស្តនេះមកសារមន្ទីរជាតិនៅរាជធានីភ្នំពេញ។ ប៉ុន្ដែក្រោយមកក៏មានជនជាតិបារាំងក៏បានយករឿងនេះទៅធ្វើបទបង្ហាញខ្លះដែរ»។
លោកបញ្ជាក់ថា៖ «យើងមិនទាន់គិតគូរក្នុងការតភ្ជាប់អីទេ ពីព្រោះកិច្ចការងារនេះគឺត្រូវការពេលវេលាដើម្បីពិភាក្សាជាមួយថ្នាក់ដឹកនាំ ក្រសួងវប្បធម៌ និងវិចិត្រសិល្បៈ ជាពិសេសគឺលោកជំទាវរដ្ឋមន្ដ្រី»។
បើតាមលោក វិសុទ្ធ ក្រុមការងារបច្ចេកទេសកំពុងពិនិត្យលើលទ្ធភាព ទាំងផលវិជ្ជមាន និងអវិជ្ជមាន ពីព្រោះកិច្ចការងារនេះអាចមានប្រតិកម្មពីមហាជន ដោយសារតែប្រជាជនខ្មែរភាគច្រើនបានស៊ាំទៅនឹងរូបចម្លាក់របស់ព្រះអង្គដែលគ្មានព្រះហស្តជាយូរឆ្នាំណាស់មកហើយ។
លោកថា៖ «អ៊ីចឹងក្រែងនៅពេលយើងយកទៅភ្ជាប់ ដោយអត់មានសេចក្ដីពន្យល់ណាមួយ ផ្សព្វផ្សាយជូនសាធារណជនដឹងឮវាទៅជាមានផលអវិជ្ជមានវិញ។ ដូច្នេះការងារនេះ គឺស្ថិតនៅក្នុងដំណាក់កាលយើងជជែកជាមួយថ្នាក់ដឹកនាំនៅឡើយទេ»។
ទាក់ទងនឹងរូបភាពដែលផ្សព្វផ្សាយ ការសាកល្បងផ្គូផ្គងព្រះហស្តព្រះអង្គទៅនឹងរូបចម្លាក់កាលពីពេលថ្មីនេះលោក វិសុទ្ធ បញ្ជាក់ថា ដោយសារលោកស្រីរដ្ឋមន្ដ្រី ត្រូវមានកិច្ចការនៅសារមន្ទីរជាតិ ហើយឱកាសនោះក៏ស្នើឱ្យក្រុមការងារបច្ចេកទេសផ្គូផ្គងសាកល្បង ដើម្បីជូនលោកស្រីរដ្ឋមន្ដ្រីពិនិត្យមើលដោយផ្ទាល់ប៉ុណ្ណោះ។
លោកបញ្ជាក់ថា៖ «ការងារនេះ ត្រូវការការផ្សព្វផ្សាយគឺជារឿងមួយ ប៉ុន្ដែក៏ត្រូវការការសិក្សាជាមួយក្រុមបច្ចេកទេសរបស់យើងដែរក្នុងការតភ្ជាប់យ៉ាងម៉េច ដាក់យ៉ាងម៉េច ដើម្បីកុំឱ្យបាក់»។ បើតាមលោក វិសុទ្ធ បំណែកព្រះហស្តនេះមានទម្ងន់ធ្ងន់ រកឃើញព្រះហស្តពេញលេញល្អគឺព្រះហស្តខាងស្ដាំ។ ប៉ុន្ដែព្រះហស្តខាងឆ្វេងបានបាក់ម្ខាងត្រង់ចំណុចកំភួនដៃដល់ដើមដៃ។ ការងារការតភ្ជាប់នេះ គឺមានការលំបាកទេ ព្រោះជាការងារបច្ចេកទេស ដែលត្រូវការពេលសិក្សាថា ត្រូវធ្វើយ៉ាងណា គឺមិនអាចតភ្ជាប់ទាំងប្រថុយប្រថានបានទេ។ ព្រះហស្តរកឃើញនេះ គឺធ្វើឡើងពីថ្មភក់ហើយជាព្រះហស្តផ្ទាល់របស់រូបចម្លាក់របស់ព្រះបាទជ័យវរ្ម័នទី ៧ ដែលកំពុងរក្សាទុកនៅសារមន្ទីរជាតិ៕
