.jpg)
លោក ម៉ម ប៊ុនហេង ពេលសម្ពោធអគារថ្មីនៃមន្ទីរពេទ្យស្រុកជាំក្សាន្ត។ រូបថត ក្រសួងសុខាភិបាល
ព្រះវិហារៈ អគារថ្មីនៃមន្ទីរពេទ្យបង្អែកជាំក្សាន្តដែលជាសមិទ្ធផលថ្មីមួយសម្រាប់ខេត្តព្រះវិហារ និងប្រជាពលរដ្ឋក្នុងខេត្តនេះត្រូវបានដាក់សម្ពោធឱ្យប្រើប្រាស់ជាផ្លូវការកាលពីថ្ងៃទី ១០ ខែមេសា បន្ទាប់ពីបានចាប់ផ្ដើមសាងសង់កាលពីឆ្នាំ ២០២០ ដោយចំណាយថវិកា អស់ជាង ៣ ៤០០ លានរៀល។
ប្រធានមន្ទីរសុខាភិបាលខេត្តព្រះវិហារលោក គួង ឡូ បានប្រាប់កាសែតភ្នំពេញប៉ុស្តិ៍ កាលពីថ្ងៃទី ១១ ខែមេសា ថា ស្រុកជាំក្សាន្តជាស្រុកមួយដែលមានប្រជាពលរដ្ឋរស់នៅច្រើនជាងគេដែលមានជិត ៦ ម៉ឺននាក់ ហើយពីស្រុកជាំក្សាន្តមកទីរួមខេត្តគឺមានចម្ងាយផ្លូវរហូតដល់ប្រហែល ១០០ គីឡូម៉ែត្រ។
លោកបានថ្លែងថា៖ «មន្ទីរពេទ្យបង្អែកស្រុកជាំក្សាន្តនេះពិតជាមានសារៈប្រយោជន៍សំខាន់ណាស់សម្រាប់ជួយប្រជាពលរដ្ឋយើងនៅស្រុកជាំក្សាន្តនេះ ហើយជាមន្ទីរពេទ្យមួយ បង្អែកឱ្យមណ្ឌលសុខភាពចំនួន ១៣ ក្នុងស្រុកជាំក្សាន្តនេះដែរ»។
លោក គួង ឡូ បានបញ្ជាក់ថា អគារព្យាបាលថ្មី ១ ខ្នងនេះ មានទំហំ ៣៧,៦ ម៉ែត្រ គុណ ១៨ ម៉ែត្រ មានកម្ពស់ ២ ជាន់ មាន ១៧ បន្ទប់ដែលបានចាប់ផ្តើមសាងសង់កាលពីដើមខែវិច្ឆិកា ឆ្នាំ ២០២០ និងបានសាងសង់រួចនៅដើរខែកញ្ញា ឆ្នាំ ២០២១ ហើយបានដាក់សម្ពោធឱ្យប្រើប្រាស់កាលពីថ្ងៃទី ១០ ខែមេសា ដោយចំណាយថវិកាសាងសង់ និងបំពាក់សម្ភារសរុបចំនួនជាង ៣ ៤៤៨ លានរៀល។
នៅក្នុងពិធីសម្ពោធអគារថ្មីនេះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានលើកឡើងថា បច្ចុប្បន្ននេះ នៅតាមតំបន់ព្រំដែនដាច់ស្រយាលមានហេដ្ឋារចនាសម្ព័ន្ធសុខាភិបាលជាច្រើន ដែលនេះគឺជាគោលនយោបាយរបស់រាជរដ្ឋាភិបាលដែលបានផ្តល់អនុសាសន៍ និងថវិកាដើម្បីសាងសង់។
ជាមួយគ្នានោះដែរ លោក ម៉ម ប៊ុនហេង បានណែនាំដល់មន្ត្រីសុខាភិបាលឱ្យខិតខំបន្តទៀតដោយធ្វើយ៉ាងណាផ្តល់សេវាសុខភាពប្រកបដោយសមធម៌ ប្រសិទ្ធភាព គុណភាព និងសុវត្ថិភាពដល់ប្រជាជន ដោយមិនទុកឱ្យនរណាម្នាក់មិនបានថែទាំសុខភាពនោះឡើយ។
លោកបានបញ្ជាក់ថា៖ «អាជ្ញាធរមូលដ្ឋានត្រូវបន្តគាំទ្រសហការឱ្យបានជិតស្និទ្ធ ធានាការប្រើប្រាស់អគារសម្រាប់ព្យាបាលថ្មីនេះជាគុណប្រយោជន៍សម្រាប់ប្រជាជននៅស្រុកជាំក្សាន្ត រយៈពេលយូរអង្វែង ដែលនេះជាការរួមចំណែកកាត់បន្ថយអត្រាឈឺ និងស្លាប់របស់មាតា ទារក និងកុមារ ស្របតាមផែនការយុទ្ធសាស្ត្រសុខាភិបាលក៏ដូចជាការរួមចំណែកកាត់បន្ថយភាពក្រីក្ររបស់ប្រជាជន»។
លោក គួង ឡូ បានប្រាប់ឱ្យដឹងទៀតថាក្នុងខេត្តព្រះវិហារមានមន្ទីរពេទ្យបង្អែកចំនួន ២ គឺមន្ទីរពេទ្យបង្អែកខេត្ត និងមន្ទីរពេទ្យបង្អែកស្រុកជាំក្សាន្ត។
លោកថា៖ «ក្រៅពីមន្ទីរពេទ្យបង្អែកទាំង ២ នេះ យើងក៏មានមណ្ឌលសុខភាពចំនួន ៣០ មណ្ឌល ប៉ុស្ដិ៍សុខភាពចំនួន ១៧ ប៉ុស្តិ៍ ហើយនៅថ្ងៃខាងមុខទៀត យើងមានផែនការយុទ្ធសាស្ត្រក្នុងការគ្របដណ្តប់ដោយមានគម្រោងបង្កើតនូវមន្ទីរពេទ្យ ១ ទៀត នៅស្រុករវៀង ដែលមានចម្ងាយផ្លូវប្រមាណជា ១០០ គីឡូម៉ែត្រពីខេត្តហើយក៏មានប្រជាពលរដ្ឋច្រើនផងដែរ»៕
