ភ្នំពេញៈ ក្រសួងបរិស្ថាន តាមរយៈគម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា (CSLEP) បានស្នើសុំដល់សាធារណជនចូលរួមផ្ដល់មតិទៅលើការអភិវឌ្ឍអេកូទេសចរណ៍ក្នុងតំបន់ទេសភាពជួរភ្នំក្រវាញ និងបឹងទន្លេសាបក្នុងខេត្ដកោះកុង សៀមរាប និងកំពង់ស្ពឺដើម្បីជួយក្រុមការងារឈានទៅរៀបចំ និងកសាងប្រកបដោយប្រសិទ្ធភាពនូវចក្ខុវិស័យ និងផែនការវិនិយោគអេកូទេសចរណ៍ក្នុងតំបន់នេះ។ នេះបើតាមសេចក្ដីជូនដំណឹងក្រសួងបរិស្ថានក្រោមប្រធានបទ៖
ព្រឹត្តិការណ៍ស្ទង់មតិពីសាធារណជនទៅលើការអភិវឌ្ឍអេកូទេសចរណ៍ក្នុងតំបន់ទេសភាពជួរភ្នំក្រវាញ និងបឹងទន្លេសាប ដែលភ្នំពេញប៉ុស្ដិ៍ទទួលបានកាលពីថ្ងៃទី ១០ មេសានេះ។
សេចក្ដីជូនដំណឹងបញ្ជាក់ថា៖ «ក្រសួងបរិស្ថាន តាមរយៈគម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា (CSLEP) សូមធ្វើការស្នើសុំឯកឧត្ដម លោកជំទាវ លោក លោកស្រី ចូលរួមផ្តល់គំនិតយោបល់ក្នុងព្រឹត្តិការណ៍ស្ទង់មតិពីសាធារណជនទៅលើការអភិវឌ្ឍអេកូទេសចរណ៍ក្នុងតំបន់ទេសភាពជួរភ្នំក្រវាញ និងបឹងទន្លេសាប»។
ក្រសួងបញ្ជាក់ថា ការចូលរួមពីសាធារណជនក្នុងព្រឹត្តិការណ៍នេះ គឺពិតជាមានតម្លៃក្នុងការជួយក្រុមការងារនៃគម្រោងដើម្បីឈានដល់ការរៀបចំ និងកសាងប្រកបដោយប្រសិទ្ធភាពនូវចក្ខុវិស័យ និងផែនការវិនិយោគអេកូទេសចរណ៍ក្នុងតំបន់ដែនជម្រកសត្វព្រៃពាមក្រសោប និងដែនជម្រកសត្វព្រៃតាតៃក្នុងភូមិសាស្ត្រខេត្តកោះកុង។ តំបន់ដែនជម្រកសត្វព្រៃភ្នំឱរ៉ាល់ និងឧទ្យានជាតិជួរភ្នំក្រវាញកណ្តាលក្នុងភូមិសាស្ត្រខេត្តកំពង់ស្ពឺ និងតំបន់ឧទ្យានជាតិព្រះជ័យវរ្ម័ននរោត្តម «ភ្នំគូលែន» ក្នុងភូមិសាស្ត្រខេត្តសៀមរាប។ ដើម្បីចូលរួមការស្ទង់មតិនេះ ក្រសួងបានផ្ដល់តំណភ្ជាប់ខាងក្រោមដោយមានជ្រើសភាសាខ្មែរ និងអង់គ្លេស និងទីតាំងដែលសាធារណជនពេញចិត្តក្នុងការផ្ដល់មតិ។ តំណភ្ជាប់នោះរួមមាន ខេត្ដកោះកុង https://forms.gle/REtXZvueNDvypgXD8។
ខេត្តសៀមរាប https://forms.gle/F9uK1eJR1dHibvB4A និងខេត្តកំពង់ស្ពឺ https://forms.gle/Ec2sNxjrtiHJbDv76។ ក្រសួងបញ្ជាក់ថា ការស្ទង់មតិនេះនឹងបន្តរហូតដល់ថ្ងៃទី ១៦ មេសា ២០២២។
លោក ឃិន ម៉េងឃាង ប្រធានគ្រប់គ្រងគម្រោង «គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា» និងជាប្រធាននាយកដ្ឋានទេសចរណ៍ធម្មជាតិនៃក្រសួងបរិស្ថានថ្លែងកាលពីថ្ងៃទី ១០ មេសានេះថា ក្រសួងបរិស្ថាន បាននិងកំពុងរៀបចំផែនការយុទ្ធសាស្ត្រអភិវឌ្ឍន៍អេកូទេសចរណ៍នៅតំបន់ទេសភាពជួរភ្នំក្រវាញ និងបឹងទន្លេសាប។
លោកបានឱ្យដឹងថា គោលដៅទេសចរណ៍មួយនៅក្នុងចំណោមគោលដៅជាច្រើនក្នុងតំបន់ទេសភាពនេះដែលត្រូវបានកំណត់អាទិភាពសម្រាប់ការអភិវឌ្ឍអេកូទេសចរណ៍គឺ ដែនជម្រកសត្វព្រៃតាតៃ និងដែនជម្រកសត្វព្រៃពាមក្រសោប។
លោកថ្លែងថា៖ «ការស្ទង់មតិនេះធ្វើឡើងដើម្បីសិក្សាស្វែងយល់ពីការយល់ឃើញ និងមតិយោបល់ផ្សេងៗពីសាធារណជនទៅលើអនុសាសន៍ផ្សេងៗគ្នាសម្រាប់ការកែលម្អ និងអភិវឌ្ឍដែនជម្រកសត្វព្រៃតាតៃ និងដែនជម្រកសត្វព្រៃពាមក្រសោប»។
បើតាមលោក ម៉េងឃាង កម្រងសំណួរនេះបានរៀបចំឡើងដើម្បីផ្តល់ព័ត៌មានដល់សាធារណជន និងជាជំនួយដើម្បីស្វែងយល់អំពីការយល់ឃើញ និងការយល់ដឹងរបស់លោកអ្នកអំពីការអភិវឌ្ឍអេកូទេសចរណ៍នៅក្នុង និងជុំវិញដែនជម្រកសត្វព្រៃតាតៃ និងដែនជម្រកសត្វព្រៃពាមក្រសោប។
លោកថ្លែងថា កម្រងសំណួរនេះ សាធារណជនអាចចំណាយពេលត្រឹមតែ ១០ ទៅ ១៥ នាទីក្នុងការផ្ដល់មតិ។ ការស្ទង់មតិនេះគឺជាការស្ម័គ្រចិត្ត និងរក្សាការសម្ងាត់។ កម្រងសំណួរនេះ មានជាភាសាខ្មែរ និងអង់គ្លេស។ សាធារណជនអាចបំពេញជាភាសាណាមួយក៏បាន។ រីឯការវិភាគមតិ ចម្លើយនីមួយៗត្រូវបានរក្សាការសម្ងាត់ និងបញ្ចូលគ្នាសម្រាប់ធ្វើការវិភាគជារួម។ មិនមានការឆ្លើយតបណាមួយ ដែលនឹងលើកយកមកបង្ហាញតែឯកឯងទេ។ លទ្ធផលនៃការស្រាវជ្រាវនេះជាមូលដ្ឋាននៃការសម្រេចចេញជារូបរាងនូវផែនការយុទ្ធសាស្ត្រ។
លោកថ្លែងថា កម្រងសំណួរនេះជាដំណើរការបន្តជាប់ក្នុងការរួមផ្សំនូវគំនិតរបស់ភាគីពាក់ព័ន្ធនានាមានជាអាទិ៍ ប្រជាជន អាជ្ញាធរក្នុងមូលដ្ឋាន វិស័យឯកជន និងសង្គមស៊ីវិល។ ដូចនេះ អនុសាសន៍ទាំងឡាយកើតចេញពីកម្រងសំណួរនេះ គឺជាទម្រង់ដើម និងជាកម្មវត្ថុនៃការសម្រេចចិត្តចុងក្រោយរបស់ក្រសួងបរិស្ថាន។
បើតាមលោក ម៉េងឃាង ក្រសួងបរិស្ថាន ក្រោមក្របខ័ណ្ឌគម្រោង CSLEP កំពុងធ្វើការសិក្សា និងរៀបចំចក្ខុវិស័យគោលដៅទេសចរណ៍ និងផែនការវិនិយោគទេសចរណ៍ សម្រាប់តំបន់ទេសភាពជួរភ្នំក្រវាញកម្ពុជា ដោយផ្តោតលើកាលានុវត្តភាពនៃការរៀបចំជាតំបន់អេកូទេសចរណ៍នៅក្នុងតំបន់ការពារ សម្រាប់ខេត្តសៀមរាប ខេត្តកំពង់ស្ពឺ និងខេត្តកោះកុង។ ក្នុងនោះរួមមាន ទី ១ តំបន់ឧទ្យានជាតិព្រះជ័យវរ្ម័ននរោត្តម «ភ្នំគូលែន» ២ ដែនជម្រកសត្វព្រៃភ្នំឱរ៉ាល់ និងឧទ្យានជាតិភ្នំក្រវាញកណ្តាល និង ៣ តំបន់ដែនជម្រកសត្វព្រៃតាតៃ និងពាមក្រសោប។
លោកបានឱ្យដឹងថារាជរដ្ឋាភិបាលកំពុងតែអនុវត្ត «គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា» ក្នុងរយៈពេល ៦ ឆ្នាំ (២០២០-២០២៥) ដើម្បីធ្វើឱ្យប្រសើរឡើងនូវការគ្រប់គ្រងតំបន់ការពារ និងខ្សែចង្វាក់តម្លៃអនុផលព្រៃឈើនៅក្នុងតំបន់ទេសភាពភ្នំក្រវាញ និងទន្លេសាបក្នុងទំហំជាង ៣,៨ លានហិកតា។ ក្រសួងបរិស្ថាន និងក្រសួងអភិវឌ្ឍន៍ជនបទបានទទួលកញ្ចប់ថវិកាចំនួន ៥៧,៥៨ លានដុល្លារក្នុងការអនុវត្តគម្រោងនេះ។ សម្រាប់កញ្ចប់ថវិកាទាំងនោះក្រសួងបរិស្ថាន ក្រសួងអភិវឌ្ឍន៍ជនបទទទួលពីភាគីពាក់ព័ន្ធមួយចំនួនដូចជា ថវិកាហិរញ្ញប្បទាន ឥណទាន ពីធនាគារពិភពលោកចំនួន ៥០,៦៦ លានដុល្លារ ថវិកាពីមូលនិធិបរិស្ថានសកល ដែលជាថវិកាជំនួយមានចំនួន ៤,៤២ លានដុល្លារ និងថវិកាបដិភាគពីរដ្ឋាភិបាល ២,៥ លានដុល្លារ៕