The Phnom Penh Post Search

Search form




Logo of Phnom Penh Post newspaper Phnom Penh Post - អភិបាលខេត្ត​កំពង់ធំ​ ចាត់​ឱ្យ​មន្ត្រី​ចុះ​ត្រួតពិនិត្យ​ការធ្វើ​អាជីវកម្ម​រ៉ែមាស​ខុសច្បាប់​នៅ​ស្រុក​សណ្តាន់

អភិបាលខេត្ត​កំពង់ធំ​ ចាត់​ឱ្យ​មន្ត្រី​ចុះ​ត្រួតពិនិត្យ​ការធ្វើ​អាជីវកម្ម​រ៉ែមាស​ខុសច្បាប់​នៅ​ស្រុក​សណ្តាន់

Content image - Phnom Penh Post
ទីតាំង​ជីករណ្តៅ​កាយ​អាចម៍ដី​យក​រ៉ែ​មាស នៅក្នុង​ឃុំ​សុចិត្រ ស្រុក​សណ្តាន់ កាលពី​ថ្ងៃទី​ ១០ ខែមេសា​។ រូបថត ហ្វេសប៊ុក

អភិបាលខេត្ត​កំពង់ធំ​ ចាត់​ឱ្យ​មន្ត្រី​ចុះ​ត្រួតពិនិត្យ​ការធ្វើ​អាជីវកម្ម​រ៉ែមាស​ខុសច្បាប់​នៅ​ស្រុក​សណ្តាន់

កំពង់ធំៈ លោក ងួន រតនៈ អភិបាល​ខេត្តកំពង់ធំ​បាន​ចាត់​ឱ្យ​មន្ត្រី​ជំនាញ​ពាក់ព័ន្ធ​ចុះ​ត្រួតពិនិត្យ​ស្រាវជ្រាវ ករណី​ការធ្វើ​អាជីវកម្ម​រ៉ែ​មាស​ខុសច្បាប់​ជាច្រើន​ទីតាំង នៅក្នុង​ភូមិសាស្ត្រ​តំបន់​ស្នងអន​ស្ទឹងដំរី នៃ​ឃុំ​សុចិត្រ ស្រុក​សណ្តាន់ ខេត្តកំពង់ធំ​។

លោក ងួន រតនៈ បាន​ប្រាប់​ភ្នំពេញ​-​ប៉ុស្តិ៍ នៅ​ថ្ងៃទី​ ១១ ខែមេសា​ថា​៖ «​ខ្ញុំ​ទទួលបាន​នូវ​ព័ត៌មាន​អំពី​ការកើតមាន​បន្ត​នូវ​អាជីវកម្ម​រ៉ែ​មាស​ខុស​ច្បាប់ ក្នុង​តំបន់​ភូមិសាស្ត្រ​នោះ​ហើយ និង​បាន​ចាត់​ឱ្យ​មន្ត្រី​ជំនាញ​នៃ​មន្ទីរ​អង្គភាព​ពាក់ព័ន្ធ ចុះ​ពិនិត្យ ស្រាវជ្រាវ​លើ​ករណីនេះ ដើម្បី​បិទ​បញ្ឈប់ សកម្មភាព​អាជីវកម្ម​ខុសច្បាប់​នោះ​ទាំងអស់​តែម្ដង​។ យើង​មិនអាច​ទុកឱ្យ​​បទល្មើស​ទាំងនេះ​កើតមាន​តទៅទៀត​បានទេ​»​។

លោក សាវី អាយុ​ ៤៥ ​ឆ្នាំ​ជា​កម្មករ​រ៉ែ​មាស​ម្នាក់ នៅ​ឃុំ​ឈើទាល ស្រុក​សណ្ដាន់ បាន​ប្រាប់​ភ្នំពេញ​ប៉ុស្តិ៍​នៅ​ថ្ងៃទី​ ១០ ខែមេសា​ថា លោក និង​អ្នក​ភូមិ​មួយចំនួន​ត្រូវបាន​ម្ចាស់​ទីតាំង​អណ្ដូងរ៉ែ​មាស​ក្នុង​តំបន់​ស្នង​អន អនុញ្ញាត​ឱ្យ​ឈប់សម្រាក​ ១ ​សប្ដាហ៍​ដើម្បី​មក​ចូលរួម​សប្បាយរីករាយ​ក្នុង​ពិធី​បុណ្យ​ចូលឆ្នាំថ្មី​ជាមួយ​ក្រុមគ្រួសារ​។

លោក​ សាវី និយាយថា លោក និង​ភរិយា​របស់​លោក​ឈ្មោះ សុខុម អាយុ​ ៣៨ ​ឆ្នាំ បាននាំគ្នា​មក​ធ្វើការ​ជា​កម្មករ​អណ្ដូងរ៉ែ​មាស​នៅក្នុង​តំបន់​ស្ទឹងដំរី ដែលជា​ផ្នែក​មួយ​នៃ​តំបន់​ដែន​ជម្រក​សត្វព្រៃ​ព្រៃ​ឡង់ អស់​រយៈពេល​ជិត​ ៣​ ខែ​មកហើយ​។ នៅក្នុង​តំបន់​នេះ មាន​អាជីវកម្ម​រ៉ែ​មាស​ជាច្រើន​ទីតាំង និង​មាន​កម្មករ​ប្រមាណ​ជាង​ ១០០ ​នាក់ មកពី​ស្រុក​សណ្ដាន់ ខេត្តកំពង់ធំ និង​បណ្ដា​ខេត្ត​មួយចំនួន​នៅ​ភាគ​ឦសាន និង ភាគ​កណ្ដាល​នៃ​ប្រទេស​កម្ពុជា​។

លោក​បញ្ជាក់ថា​៖ «​ខ្ញុំ​មិនដឹងថា ម្ចាស់​អាជីវកម្ម​អណ្ដូងរ៉ែ​មាស​ទាំងនោះ មាន​ច្បាប់​អនុញ្ញាត​ឬ​អត់​នោះទេ ប៉ុន្តែ​នៅទីនេះ មាន​ម្ចាស់​ទីតាំង​អណ្ដូងរ៉ែ​មាស​ច្រើន​នាក់​ណាស់​។ ពួកគេ​ឡើង​ចុះ​ខេត្ត​រៀងរាល់​ ២ ​សប្ដាហ៍​ម្ដង ដើម្បី​ទិញ​ស្បៀងអាហារ​សម្រាប់​ពួកយើង និង ប្រេងឥន្ធនៈ ព្រមទាំង​សារធាតុ​គីមី​មួយចំនួនទៀត​សម្រាប់​បំបែក​ ឬ​ញែក​ម៉ូលីគុល​នៃ​លោហធាតុ​ផ្សេងទៀត​ចេញពី​រ៉ែ​មាស​»​។

បើតាម​លោក​ សាវី កម្មករ​អណ្ដូងរ៉ែ​មាស​នៅ​ទីនោះ​ក្នុង​ម្នាក់ៗ​ទទួល​បាន​ប្រាក់​ឈ្នួល​ជាង​ ៩០​ ម៉ឺន​រៀល​ក្នុង​ ១ ​ខែ ប៉ុន្តែ​ថ្លៃ​អាហារ និង​ការស្នាក់នៅ​ជា​បន្ទុក​របស់​ម្ចាស់​ទីតាំង​អាជីវកម្ម​អណ្ដូងរ៉ែ​មាស​នីមួយៗ​។

ទាក់ទិន​ករណីនេះ​ស្ត្រី​ម្នាក់​នៅ​ឃុំ​សុចិត្រ ស្រុក​សណ្ដាន់ បាន​ប្រាប់​ភ្នំពេញ​ប៉ុស្តិ៍​ក្នុង​លក្ខខណ្ឌ​មិន​បញ្ចេញ​ឈ្មោះថា អ្នកស្រី​ក៏បាន​ធ្វើ​អាជីវកម្ម​រ៉ែ​មាស​ជា​លក្ខណៈ​គ្រួសារ​ផងដែរ ដែលមាន​កម្លាំង​កម្មករ​ចំនួន​ ៣​នាក់​ប៉ុណ្ណោះ ព្រោះ​អ្នកស្រី​បាន​ទិញ​អាចម៍ដី​ពី​ម្ចាស់​អាជីវកម្ម​អណ្ដូងរ៉ែ​មាស​មក​លាង និង​រែង​យក​កម្ទេចមាស​មិនមាន​អណ្ដូងរ៉ែ​មាស​ដូច​គេ​នោះទេ​។

ស្ត្រី​រូបនេះ​និយាយថា​៖ «​អាជីវកម្ម​រ៉ែ​មាស​ខ្នាតតូច​ទាំងអស់​នៅក្នុង​ឃុំ​របស់ខ្ញុំ គឺ​មិនមាន​ច្បាប់​អនុញ្ញាត​នោះទេ ក្នុង​នោះ​ក៏មាន​អ្នកធ្វើអាជីវកម្ម​អណ្ដូង​រ៉ែ​ដែលមាន​កម្លាំង​កម្មករ​ជិត​ ២០ ​នាក់​រាប់សិប​កន្លែង​ទៀតផង​ដែរ​»​។

ថ្វីដ្បិត​យ៉ាង​ដូច្នេះ​ក្ដី អ្នកស្រី និង អ្នកធ្វើអាជីវកម្ម​រ៉ែ​មាស​ទាំងអស់​ក្នុង​តំបន់​នេះ បាន​បង់ប្រាក់​ដល់​មន្ត្រី​មួយ​ចំនួន​ចន្លោះ​ពី​ ៥ ​ម៉ឺន​រៀល​ដល់​ ៥០ ​ម៉ឺន​រៀល អាស្រ័យ​ទៅលើ​ទំហំ​នៃ​ចង្វាក់​ផលិតកម្ម​នីមួយៗ ដើម្បី​ជា​ថ្នូរ​ក្នុងការ​មិន​បង្ក្រាប ឬ​មិន​រាយការណ៍​ដល់​មន្ត្រី​ជំនាញ​ថ្នាក់​ខេត្ត និង​ថ្នាក់ជាតិ​។

អ្នកស្រី​បន្តថា​៖ «​ការពិត​អាជីវកម្ម​របស់​ពួកយើង​បានត្រឹមតែ​ចិញ្ចឹម​ឆ្នាំង​ប៉ុណ្ណោះ មិនជា​មានបាន​អ្វី​ទេ​។ បើ​ពួក​អ្នកធ្វើ​អាជីវកម្ម​អណ្ដូងរ៉ែ​មាសធំៗ​នោះ​គឺ​គេ​អាច​មានបាន​ពី​អាជីវកម្ម​នេះ ប៉ុន្តែ​ពួកគេ​ក៏​ចំណាយ​ដើមទុន​ធំ​ដែរ គឺ​ក្នុង​អណ្ដូងរ៉ែ​មួយ​គេ​ហ៊ាន​ចំណាយ​ដើមទុន​រហូតដល់​ជិត​ ១០ ​ម៉ឺន​ដុល្លារ​ឯណោះ ហើយ​ពួកគេ​ភាគច្រើន ក៏​ជា​អ្នកមាន​ខ្នងបង្អែក​ធំៗ​នៅ​ពីក្រោយ​ដែរ​»​។

លោក​ ណឹម ចាន់ថា ប្រធាន​មន្ទីរ​រ៉ែ និង​ថាមពល​ខេត្តកំពង់ធំ មិនអាច​ទាក់ទង​ស្នើសុំ​ផ្ដល់​ការអធិប្បាយ​បានទេ ដោយ​ទូរស័ព្ទ​ចូល​ជា​ច្រើនដង​តែ​គ្មាន​អ្នកទទួល​។

មន្ត្រីខេត្ត​កំពង់ធំ​ម្នាក់​បាន​ប្រាប់​ភ្នំពេញ​-​ប៉ុស្តិ៍​នៅ​ថ្ងៃទី​ ១០ ​មេសា ក្នុង​លក្ខខណ្ឌ​មិន​បញ្ចេញ​ឈ្មោះថា ថ្មីៗ​នេះ​មាន​ក្រុមហ៊ុន​មួយ​ឈ្មោះ K88 កំពុងធ្វើការ​សិក្សា​ពី​ផលប៉ះពាល់​នៃ​បរិស្ថាន​លើ​វិស័យ​រ៉ែ​មាស​នៅក្នុង​ខេត្តកំពង់ធំ​ដោយ​ក្រុមហ៊ុន​នេះ បាន​ចុះ​សិក្សា​នៅក្នុង​តំបន់​អាជីវកម្ម​រ៉ែមាស ដែល​អ្នកភូមិ​កំពុង​ធ្វើជា​លក្ខណៈ​គ្រួសារ​នោះ​។

មន្ត្រី​រូបនេះ​បាន​និយាយថា​៖ «​ការធ្វើ​អាជីវកម្ម​រ៉ែ​មាស​របស់​អ្នកភូមិ ដែល​គ្មាន​ច្បាប់ទម្លាប់​ទាំងនោះ​អាច​នឹងត្រូវ​បិទ​បញ្ចប់​ក្នុងពេល​ឆាប់ៗ​នេះ ព្រោះ​ក្រៅពី​បង្ហូរទឹក​ដែលមាន​សារធាតុ​គីមី​ពុល តាម​ប្រព័ន្ធ​អូរ​ចូល​មកក្នុង​ស្ទឹង ទីតាំង​នៃ​តំបន់​អាជីវកម្ម​រ៉ែ​មាស​ខុសច្បាប់​ទាំងនោះ ស្ថិតនៅក្នុង​ផ្នែក​មួយ​នៃ​តំបន់​ដែនជម្រក​សត្វព្រៃ​ព្រៃឡង់​»​។

ជុំវិញ​ករណីនេះ លោក តុប កក្កដា ប្រធាន​មន្ទីរ​បរិស្ថាន​ខេត្ត​កំពង់ធំ មិនអាច​ស្នើសុំ​ការពន្យល់​បានទេ​ដោយ​លោក​ប្រាប់ថា​៖ «​កំពុង​ជាប់រវល់​»៕

វីដេអូ៖

អត្ថបទគួរចាប់អារម្មណ៍