.jpg)
សិស្សានុសិស្សថតរូបជាមួយនឹងអំណោយកុំព្យូទ័រចាស់ សម្រាប់សិក្សា។ រូបថត ក្រសួងអប់រំ
ភ្នំពេញៈ កុំព្យូទ័រលើតុ និងយួរដៃចំនួន ១៥៤ គ្រឿង ត្រូវបានប្រគល់ជូនដល់សិស្សក្រីក្រ ក្នុងយុទ្ធនាការកុំព្យូទ័រនៃការផ្លាស់ប្តូរដែលត្រូវបានផ្តួចផ្តើមបង្កើតឡើងដោយ Tech for Kids Academy ក្រោមការសហការជាមួយនាយកដ្ឋានបច្ចេកវិទ្យាព័ត៌មាន ក្រសួងអប់រំ យុវជន និងកីឡា។ យោងតាមក្រសួងអប់រំ។
ក្រសួងអប់រំបានឱ្យដឹងនៅថ្ងៃទី១២ មេសានេះថា យុទ្ធនាការកុំព្យូទ័រនៃការផ្លាស់ប្តូរនេះ ត្រូវបានធ្វើឡើងក្នុងគោលបំណងប្រមូល ការបរិច្ចាគកុំព្យូទ័រយួរដៃដែលប្រើរួចសម្រាប់ឧបត្ថម្ភដល់សិស្សខ្វះខាតកុំព្យូទ័រ ដើម្បីអាចប្រើប្រាស់សម្រាប់បំពេញតម្រូវការសិក្សាតាមអនឡាញក្នុងបរិបទកូវីដ១៩ ក្រោមប្រធានបទ «ចាស់សម្រាប់អ្នក ថ្មីសម្រាប់ខ្ញុំ»។
ក្រសួងបញ្ជាក់ថា៖«យុទ្ធនាការនេះ ត្រូវបានធ្វើឡើងក្នុងចក្ខុវិស័យមួយក្នុងការរួមចំណែកយ៉ាងធំដល់ការសិក្សារបស់សិស្សានុសិស្សដែលក្រុមគ្រួសារពុំមានលទ្ធភាពឧបត្ថម្ភសម្ភារៈសម្រាប់ការសិក្សា»។
កម្មវិធីនេះបានប្រព្រឹត្តទៅក្រោមអធិបតីភាពលោកស្រី គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា និងមានការចូលរួមពីលោកគ្រូ អ្នកគ្រូ សិស្សានុសិស្សនៃសាលារៀនគោលដៅក្នុងខេត្ដទាំង ៥ មានដូចជា កំពង់ចាម បាត់ដំបង បន្ទាយមានជ័យ រាជធានីភ្នំពេញ និងខេត្ដព្រះវិហារ។
លោកស្រីថ្លែងក្នុងពិធីនេះថា យុទ្ធនាការកុំព្យូទ័រនៃការផ្លាស់ប្តូរ ជួយលើកកម្ពស់ការសិក្សារបស់សិស្សានុសិស្សក្រីក្រ និងសិស្សក្នុងតំបន់ដាច់ស្រយាល ដើម្បីអាចសិក្សាតាមអនឡាញ។
លោកស្រីបន្តថា៖ «សូមថ្លែងអំណរគុណយ៉ាងជ្រៀលជ្រៅ ដល់ថ្នាក់ដឹកនាំក្រសួងអប់រំយុវជន និងកីឡា ដែលបានផ្តួចផ្តើមបង្កើតឡើងដោយ Tech for kids Acodemy ក្រោមការសហការជាមួយនាយកដ្ឋានបច្ចេកវិទ្យាពណ៌មាន ក្រសួងអប់រំ យុវជននិងកីឡា»។
លោស្រី រ័ត្ន ស៊ូណា គ្រូបង្រៀននៅវិទ្យាល័យជ្រោយចង្វារបានឱ្យដឹងថា សិស្សានុសិស្ស ៥នាក់ នៃវិទ្យាល័យជាស៊ីមជ្រោយចង្វារ ទទួលបានកុំព្យូទ័រលើតុ៣ និងកុំព្យូទ័រយួដៃ។
អ្នកគ្រូប្រាប់ថា យុទ្ធនាការកុំព្យូទ័រនៃការផ្លាស់ប្តូរក្រោមប្រធានបទ «ចាស់សម្រាប់អ្នក ថ្មីជានិច្ចសម្រាប់ខ្ញុំ» នឹងសូមភ្ជាប់នូវ អរគុណកាដូដែលបានផ្លាស់ប្តូរជីវិតរបស់សិស្សក្រីក្រ។
អ្នកគ្រូបានឱ្យដឹងថា៖«ក្នុងពិធីប្រគល់កំព្យូទ័រនេះលោកស្រី សេដ្ឋានី បានផ្តល់អនុសាសន៏ដ៏មានប្រយោជន៏សំខាន់ដល់ប្អូនសិស្សានុសិស្ស ដែលទទួលបានកុំព្យូទ័រ ដើម្បីលើកកម្ពស់ដល់ការសិក្សារបស់សិស្សក្រីក្រ និងតំបន់ដាច់ស្រយាល បានស្វ័យសិក្សាតាមប្រព័ន្ធអេឡិចត្រូនិចដែល»៕
