.jpg)
លោក អំ បឺរឡា (សំពះ) ប្រធានសភាជាន់ទាបឥណ្ឌា។ រូបថត ហ្វេសប៊ុក
ភ្នំពេញៈ គណៈប្រតិភូជាន់ខ្ពស់នៃសាធារណរដ្ឋឥណ្ឌាដឹកនាំដោយ លោក អំ បឺរឡា (OM BIRLA) ប្រធានសភាជាន់ទាបនៃសាធារណរដ្ឋឥណ្ឌាគ្រោងអញ្ជើញមកបំពេញទស្សនកិច្ចជាផ្លូវការនៅកម្ពុជា ចាប់ពីថ្ងៃទី ២១ ដល់ថ្ងៃទី ២៤ ខែមេសាដើម្បីលើកតម្កើងទំនាក់ទំនងមិត្តភាព និងកិច្ចសហប្រតិបត្ដិការលើគ្រប់វិស័យជាមួយកម្ពុជា។
តាមសេចក្ដីប្រកាសព័ត៌មានរបស់រដ្ឋសភាស្ដីពីលទ្ធផលនៃកិច្ចប្រជុំគណៈកម្មាធិការអចិន្រៃ្តយ៍រដ្ឋសភា នៅថ្ងៃទី ១២ ខែមេសា បានឱ្យដឹងថា ដំណើរទស្សនកិច្ចជាផ្លូវការរបស់លោក អំ បឺរឡា គណៈប្រតិភូជាន់ខ្ពស់នៃសភាជាន់ទាបនៃសាធារណរដ្ឋឥណ្ឌាមកកម្ពុជានេះ គឺតបតាមការអញ្ជើញរបស់លោក ហេង សំរិន ប្រធានរដ្ឋសភាក្នុងឱកាសខួបទី ៧០ ឆ្នាំនៃទំនាក់ទំនងមិត្តភាពការទូត ប្រទេសទាំង ២ កម្ពុជា-ឥណ្ឌា។
សេចក្ដីប្រកាសព័ត៌មានបញ្ជាក់ថា៖ «គោលបំណងនៃដំណើរទស្សនកិច្ចនាពេលនេះ គឺធ្វើឡើងក្នុងឱកាសខួបទី ៧០ ឆ្នាំនៃទំនាក់ទំនង មិត្តភាពការទូត ប្រទេសទាំង ២ កម្ពុជា-ឥណ្ឌា ដែលជិតឈានចូលមកដល់ និងដើម្បីពង្រឹងពង្រីកចំណងមិត្តភាពកិច្ចសហប្រតិបត្តិការប្រទេសទាំង ២ ទាំងខាងស្ថាប័ននីតិប្បញ្ញត្តិ នីតិប្រតិបត្តិឱ្យកាន់តែរីកចម្រើន រឹងមាំ និងគ្រប់ជ្រុងជ្រោយថែមទៀត»។
លោក ឡេង ប៉េងឡុង អ្នកនាំពាក្យរដ្ឋសភាថ្លែងក្នុងសន្និសីទសារព័ត៌មាន ក្រោយបញ្ចប់កិច្ចប្រជុំនេះថា នៅក្នុងកិច្ចប្រជុំគណៈកម្មាធិការអចិន្រៃ្តយ៍នៃរដ្ឋសភានេះដែរ រូបលោកក្នុងនាមជាអគ្គលេខាធិការរដ្ឋសភាបានរាយការណ៍ជូនគណៈកម្មាធិការអចិន្រៃ្តយ៍ពីការរៀបចំទទួលដំណើរទស្សនកិច្ចជាផ្លូវការរបស់គណៈប្រតិភូជាន់ខ្ពស់នៃសភាជាន់ទាបឥណ្ឌាដឹកនាំដោយលោក អំ បឺរឡា មកកាន់ប្រទេសកម្ពុជា។
ដំណើរទស្សនកិច្ចនៃគណៈប្រតិភូជាន់ខ្ពស់នៃសភាជាន់ទាបឥណ្ឌានេះ គឺធ្វើឡើងនៅក្នុងឱកាសខួបទី ៧០ នៃទំនាក់ទំនងការទូតរវាងកម្ពុជា និងឥណ្ឌា។ លោកបានថ្លែងថា៖ «ខ្ញុំសូមបញ្ជាក់ថា ឥណ្ឌាជាប្រទេសជាមិត្ដរបស់កម្ពុជាយូរមកហើយ ដោយសារថា ឥណ្ឌាបានទទួលស្គាល់ព្រះរាជាណាចក្រកម្ពុជាជាប្រទេសឯករាជ្យចាប់តាំងពីមុនកម្ពុជាបានឯករាជ្យពីប្រទេសបារាំងម្ល៉េះ គឺនៅឆ្នាំ ១៩៥២ ហើយប្រទេសកម្ពុជាយើងបានទទួលឯករាជ្យពេញបរិបូរពីប្រទេសបារាំងនៅឆ្នាំ ១៩៥៣»។
លោកបញ្ជាក់ថា ដូច្នេះប្រទេសឥណ្ឌាជាប្រទេសដែលបានគោរពនូវសិទ្ធិស្វ័យសម្រេចរបស់ប្រជាជនកម្ពុជា ហើយទទួលស្គាល់កម្ពុជាជាប្រទេសឯករាជ្យ ចាប់តាំងពីឆ្នាំ ១៩៥២ មុនកម្ពុជា ទទួលបានឯករាជ្យជាផ្លូវការណ៍ពីប្រទេសបារាំង ១ ឆ្នាំ។
ប្រទេសទាំង ២ បានលើកតម្កើងទំនាក់ទំនងជាមួយគ្នាតាំងពីឆ្នាំ ១៩៥២ រហូតមកដល់សព្វថ្ងៃ មិនដែលមានការទាស់ទែង ឬការខ្វែងគំនិតគ្នាឡើយ។ ប៉ុន្ដែកាលពីសម័យ ប៉ុល ពត (១៩៧៥-១៩៧៩) គឺឥណ្ឌាបានផ្ដាច់ទំនាក់ទំនងជាមួយ ប៉ុល ពត ដោយសារ ប៉ុល ពត មានការកាចសាហាវ។ ក្រោយ ប៉ុល ពត រលាយទៅឥណ្ឌាបានភ្ជាប់ទំនាក់ទំនងជាមួយកម្ពុជាវិញ។ លោក ប៉េងឡុង បញ្ជាក់ថា ប្រទេសឥណ្ឌាបានធ្វើទំនាក់ទំនងមិត្ដភាព និងកិច្ចសហប្រតិបត្ដិការជាច្រើនវិស័យនៅកម្ពុជា ខណៈគោលបំណងនៃទស្សនកិច្ចនេះ គឺដើម្បីលើកតម្កើងទំនាក់ទំនងមិត្តភាព កិច្ចសហប្រតិបត្ដិការលើគ្រប់វិស័យជាមួយកម្ពុជា។ លោកឱ្យដឹងថា៖ «គោលបំណងធំមួយទៀតគឺប្រទេសឥណ្ឌាបានសូមយាងព្រះមហាក្សត្រកម្ពុជាទៅធ្វើទស្សនកិច្ចនៅសាធារណរដ្ឋឥណ្ឌានៅក្នុងឆ្នាំនេះឱ្យបានឆាប់ដោយសារចង់មានទំនាក់ទំនងល្អ»៕
