.jpg)
លោក ហ៊ុន សែន និងឯកអគ្គរដ្ឋទូតឥណ្ឌាក្នុងពិធីប្រគល់ទទួលវ៉ាក់សាំងកូវីដ ពីថ្ងៃទី ១២ មេសា។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន រំឭកដល់ប្រជាពលរដ្ឋមិនត្រូវភ្លេចខ្លួនពីការឆ្លងជំងឺកូវីដ ១៩ ឡើយ ក្នុងស្ថានភាពបច្ចុប្បន្ន ព្រោះប្រទេសជាច្រើននៅបន្តទទួលរងការឆ្លងរាលដាលនៃជំងឺនេះ ហើយក៏មិនទាន់អាចបើកដំណើរការសកម្មភាពសង្គមសេដ្ឋកិច្ចពេញលេញឡើងវិញបាននៅឡើយផងដែរ។
ក្នុងពិធីប្រគល់ទទួលអំណោយដ៏ថ្លៃថ្លានូវវ៉ាក់សាំងកូវីដ ១៩ ប្រភេទកូវីស្យែល (COVISHIELD) ពីប្រជាជន និងរដ្ឋាភិបាលនៃសាធារណរដ្ឋឥណ្ឌានៅវិមានសន្តិភាពនាថ្ងៃទី ១២ ខែមេសា លោក ហ៊ុន សែន ថ្លែងថា៖ «ការអូសបន្លាយនៃការឆ្លងរាលដាលគឺជាហានិភ័យ សម្រាប់យើងទាំងអស់គ្នា ដែលអាចបង្កឱ្យមានការផ្ទុះឡើងវិញនៃជំងឺកូវីដ ១៩ ក៏ដូចជាការធ្លាក់ចូលទៅក្នុងវិបត្តិសង្គម- សេដ្ឋកិច្ច។ ក្នុងស្មារតីនេះ កម្ពុជាសូមលើកទឹកចិត្តឱ្យធ្វើការជំរុញ និងពន្លឿនការចាក់វ៉ាក់សាំងដើម្បីបង្កើតភាពស៊ាំសហគមន៍ ដែលជាវិធានការឆ្លើយតបដ៏ត្រឹមត្រូវ និងមានប្រសិទ្ធភាពបំផុត»។
លោកបញ្ជាក់ថា៖ «ទោះបីជាយ៉ាងនេះក្តីក្នុងស្ថានភាពបច្ចុប្បន្ននេះ យើងមិនត្រូវភ្លេចខ្លួន ដោយប្រទេសជាច្រើននៅបន្តទទួលរងការឆ្លងរាលដាលនៃជំងឺកូវីដ ១៩ និងមិនទាន់អាចបើកដំណើរការសកម្មភាពសង្គមសេដ្ឋកិច្ចពេញលេញឡើងវិញបាននៅឡើយ»។
លោកនាយករដ្ឋមន្ត្រីក៏បានថ្លែងអំណរគុណចំពោះសមាជិកនៃគំនិតផ្តួចផ្តើមចតុភាគី ក៏ដូចជាបណ្តាប្រទេសនានាជុំវិញសកលលោកចំពោះកិច្ចខិតខំប្រឹងប្រែងក្នុងការប្រយុទ្ធនឹងជំងឺកូវីដ ១៩ ទាំងក្នុងប្រទេស តំបន់ និងសកលលោកទាំងមូល ដើម្បីធានាបាននូវការងើបឡើងវិញយ៉ាងឆាប់រហ័សនៃសកម្មភាពសង្គមសេដ្ឋកិច្ច។
ជាមួយស្មារតីបុរេសកម្ម និងកិច្ចខិតខំខ្នះខ្នែងក្នុងការស្វែងរកវ៉ាក់សាំង និងការបើកយុទ្ធនាការជាតិចាក់វ៉ាក់សាំងកាលពីខែកុម្ភៈ ឆ្នាំ ២០២១ កម្ពុជាអាចសម្រេចបាននូវភាពស៊ាំសហគមន៍ពេញលេញក្នុងរយៈពេលត្រឹមប្រមាណ ៨ ខែប៉ុណ្ណោះ។
លោក ហ៊ុន សែន បន្តថា សមិទ្ធផលដ៏ត្រចះត្រចង់នេះអនុញ្ញាតឱ្យកម្ពុជាបើកប្រទេសឡើងវិញលើគ្រប់វិស័យកាលពីថ្ងៃទី ១ ខែវិច្ឆិកា ឆ្នាំ ២០២១ និងអាចរក្សាដំណើរការសកម្មភាពសង្គម-សេដ្ឋកិច្ចជាប្រក្រតី រហូតមកទល់ពេលនេះ ទោះបីជាមានការគំរាមកំហែងជាបន្តបន្ទាប់ពីការឆ្លងរាលដាលនៃជំងឺកូវីដ ១៩ ជាពិសេស មេរោគបំប្លែងថ្មី ប្រភេទអូមីក្រុងដែលបានចម្លងចូលទៅក្នុងសហគមន៍កម្ពុជានៅដើមឆ្នាំ ២០២២ នេះក៏ដោយ។
នាឱកាសនោះ ប្រមុខរាជរដ្ឋាភិបាលកម្ពុជាបានក្រើនរំឭកដល់ប្រជាជនកម្ពុជាឱ្យបន្តអនុវត្តវិធានការសុខាភិបាលឱ្យបានខ្ជាប់ខ្ជួន ជាពិសេសក្នុងឱកាសបុណ្យចូលឆ្នាំថ្មីប្រពៃណីជាតិនៅថ្ងៃទី ១៤, ១៥ និង ១៦ ខែមេសានេះ។
លោកស្រី ដេវីយ៉ានី ខូប្រាហ្គេដ ឯកអគ្គរដ្ឋទូតនៃសាធារណរដ្ឋឥណ្ឌាប្រចាំកម្ពុជា បានថ្លែងថា ការផ្តល់វ៉ាក់សាំងពេលនេះ គឺជាកាយវិការបញ្ជាក់ពីទំនាក់ទំនងល្អរបស់ប្រទេសឥណ្ឌាជាមួយប្រទេសកម្ពុជា និងជំរុញសហប្រតិបត្តិការជាក់ស្តែងលើការបញ្ចប់ការរាតត្បាតជំងឺកូវីដ ១៩។
លោកស្រីលើកឡើងថា៖ «ប្រជាពលរដ្ឋកម្ពុជាអាចចាប់ផ្តើមប្រមូលផ្តុំ ដោយមិនមានការរឹតត្បិតលើចំនួនមនុស្ស ហើយសកម្មភាពសេដ្ឋកិច្ចក៏ពេញលេញផងដែរ។ ពួកយើងត្រូវអរគុណដល់ការដឹកនាំរបស់សម្តេចនាយករដ្ឋមន្ត្រី ហ៊ុន សែន ដែលបានខិតខំប្រឹងប្រែង ដោយមិនខ្លាចនឿយហត់ក្នុងការដឹកនាំក្រសួងសុខាភិបាលដែលបានគ្រប់គ្រងជំងឺកូវីដ ១៩ នៅកម្ពុជា»។
លោកស្រី ដេវីយ៉ានី ខូប្រាហ្គេដ បញ្ជាក់ថា រាជរដ្ឋាភិបាលកម្ពុជាដឹកនាំដោយលោកនាយករដ្ឋមន្ត្រី ហ៊ុន សែន ពិតជាស័ក្តិសមនឹងទទួលបាននូវការកោតសរសើរផងដែរចំពោះការចាក់វ៉ាក់សាំងជូនប្រជាជនរបស់ខ្លួនក្នុងរយៈពេលយ៉ាងលឿនបំផុតក្នុងកម្រិតដែលមិនធ្លាប់មានពីមុនមក។
គួរបញ្ជាក់ថា រដ្ឋាភិបាលឥណ្ឌាបានផ្តល់វ៉ាក់សាំងកូវីដ ១៩ ប្រភេទកូវីសែល ចំនួន ៣២៥ ០០០ ដូស ក្រោមគំនិតផ្តួចផ្តើមចតុភាគីមកដល់ប្រទេសកម្ពុជា។ វ៉ាក់សាំងនេះ គឺជាសក្ខីភាពដ៏ពិតប្រាកដនៃចំណងមិត្តភាព និងសាមគ្គីភាពរវាងកម្ពុជា-ឥណ្ឌា និងសមាជិកដទៃទៀតនៃគំនិតផ្តួចផ្តើមនេះ ដែលរួមមាន សហរដ្ឋ-អាមេរិក ជប៉ុន និងអូស្ត្រាលី។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាលថ្លែងនាថ្ងៃទី ១១ មេសា ថា វ៉ាក់សាំងដែលបានដឹកមកជាជំហានទី ១ នេះមានចំនួន ២០ ម៉ឺនដូស ហើយវ៉ាក់សាំងចំនួន ១២ ម៉ឺន ៥ ពាន់ដូសទៀតនឹងដឹកមកដល់នៅថ្ងៃទី ១៤ ខែមេសានេះ។
លោកស្រីឱ្យដឹងថា៖ «វ៉ាក់សាំងកូវីដ ១៩ សរុបទាំងអស់ដែលកម្ពុជាបានទទួល និងទាំងដៃគូរបស់យើងបានប្តេជ្ញាចិត្តនឹងជួយទាំងតាមរយៈកូវ៉ាក់ផង និងជំនួយរបស់រដ្ឋាភិបាលនៃប្រទេសចិនផង យើងមានចំនួនជាង ៧៣ លានដូស។ វ៉ាក់សាំងដែលនៅសល់ដែលយើងនឹងទទួលបន្តបន្ទាប់រហូតដល់ចុងឆ្នាំ ២០២២ នេះ គឺវ៉ាក់សាំងចំនួន ៧,៥ លានដូសពីយន្តការកូវ៉ាក់ និងវ៉ាក់សាំង ១៥ លានដូសពីប្រទេសចិន»។
បើតាមលោកស្រី យក់ សម្បត្តិ វ៉ាក់សាំងដែលរក្សាទុកក្នុងឃ្លាំងមានជាង ១១ លានដូស ហើយប្រមាណជាជិត ៣ លានដូសកំពុងតែចរាចរចាក់នៅតាមបណ្តារាជធានី-ខេត្ត ដើម្បីចាក់ជូនប្រជាពលរដ្ឋកម្ពុជា៕
