ភ្នំពេញៈ ស្ថាប័នពាក់ព័ន្ធមួយចំនួនបានធ្វើការអំពាវនាវទៅដល់ប្រជាពលរដ្ឋទាំងអស់ត្រូវគោរពច្បាប់ចរាចរណ៍ ដើម្បីទប់ស្កាត់ កាត់បន្ថយគ្រោះថ្នាក់ចរាចរណ៍នៅក្នុងពិធីបុណ្យចូលឆ្នាំថ្មី ប្រពៃណីជាតិខ្មែរដែលនឹងមកដល់ចាប់ពីថ្ងៃទី ១៤ ដល់ថ្ងៃទី ១៦ ខែមេសា។
នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈនៃក្រសួងមហាផ្ទៃបានអំពាវនាវដល់ប្រជាពលរដ្ឋអ្នកប្រើប្រាស់ផ្លូវទាំងអស់ត្រូវបើកបរដោយគោរពតាមច្បាប់ចរាចរណ៍ ដោយត្រូវចេះយោគយល់អធ្យាស្រ័យគ្នាក្នុងការបើកបរ។
នាយកដ្ឋានដដែលនេះបានលើកឡើងទៀតថា៖ «កុំបើកបរល្មើសល្បឿនកំណត់ កុំបើកបរក្រោមឥទ្ធិពលនៃជាតិស្រវឹង កុំជែងក្នុងស្ថានភាពគ្រោះថ្នាក់ កុំផ្ទុកលើសកម្រិតកំណត់ និងត្រូវគោរពសិទ្ធិអាទិភាពលើដងផ្លូវ»។
ជាមួយគ្នានេះដែរ បេឡាជាតិ-សន្តិសុខសង្គម (បសស) នៃក្រសួងការងារ និងបណ្តុះបណ្តាលវិជ្ជាជីវៈក៏បានចេញសេចក្តីអំពាវនាវមួយផងដែរ ស្តីពីការបង្ការទប់ស្កាត់ កាត់បន្ថយគ្រោះថ្នាក់ចរាចរណ៍ផ្លូវគោកក្នុងពិធីបុណ្យចូលឆ្នាំ។ បសស លើកឡើងថា លោកនាយករដ្ឋមន្ត្រី ហ៊ុន សែន បានប្រកាសឱ្យប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរឡើងវិញ បន្ទាប់ពីខកខានរយៈពេល ២ ឆ្នាំដោយសារការរីករាលដាលជាសកលនៃជំងឺកូវីដ ១៩ និងដោយសង្កេតឃើញថាជារៀងរាល់ឆ្នាំមុនការរីករាលដាលជំងឺកូវីដ ១៩ ប្រជាពលរដ្ឋខ្មែរក្នុងនោះក៏មានកម្មករនិយោជិតផងដែរ តែងតែធ្វើដំណើរទៅ និងមកពីស្រុកកំណើត ឬទីកន្លែងកម្សាន្តនានាជាហេតុធ្វើឱ្យចរាចរណ៍មមាញឹកខ្លាំង ទន្ទឹមនឹងនោះគ្រោះថ្នាក់ចរាចរណ៍ក៏កើតមានច្រើនផងដែរ។
ជាមួយគ្នានេះ ក្រុមការងារសុវត្ថិភាពចរាចរណ៍ផ្លូវគោក សម្រាប់គាំពារកម្មករនិយោជិត (សផក) បានអំពាវនាវដល់អ្នកបើកបរយានយន្តទាំងអស់ ជាពិសេសកម្មករនិយោជិតត្រូវមានការប្រុងប្រយ័ត្នខ្ពស់ និងត្រូវអនុវត្តវិធានការសុវត្ថិភាពឱ្យបានត្រឹមត្រូវ។ បេឡាជាតិរបបសន្តិសុខសង្គមឱ្យដឹងថា៖ «ត្រូវពាក់មួកសុវត្ថិភាពឱ្យបានត្រឹមត្រូវទាំងអ្នកបើកបរ និងអ្នករួមដំណើរតាមម៉ូតូពាក់ខ្សែក្រវាត់សុវត្ថិភាពជានិច្ចនៅពេលបើកបររថយន្ត បើកបរតាមចំណែកពាក់កណ្តាលទ្រូងផ្លូវខាងស្តាំ។ ត្រូវត្រួតពិនិត្យលក្ខណៈបច្ចេកទេសយានយន្តមុនពេលបើកបរ ជាពិសេសកង់ ចង្កូត ហ្វ្រាំង និងភ្លើងបំភ្លឺ»។
ក្នុងនោះដែរ អ្នកដំណើរមិនត្រូវវ៉ា ឬជែងក្នុងស្ថានភាពប្រថុយប្រថានឡើយ ហើយក៏មិនត្រូវបើកបរនៅពេលងងុយដេកដែរ និងជាពិសេសមិនត្រូវខឹងឆេវឆាវ គឺត្រូវចេះអត់ធ្មត់ និងយោគយល់អធ្យាស្រ័យគ្នាទៅវិញទៅមក។
ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) នៃបេឡាជាតិសន្តិសុខសង្គម សង្ឃឹមជឿជាក់យ៉ាងមុតមាំថា៖ «អ្នកបើកបរយានយន្តទាំងអស់ ជាពិសេសកម្មករនិយោជិតនឹងចូលរួមគោរពច្បាប់ស្តីពីចរាចរណ៍ផ្លូវគោក ក៏ដូចជាអនុវត្តតាមសេចក្តីអំពាវនាវខាងលើនេះឱ្យបានខ្ជាប់ខ្ជួន និងត្រឹមត្រូវ ដើម្បីទទួលបានសុខសុវត្ថិភាព និងជួបជុំក្រុមគ្រួសារ សាច់ញាតិ នាឱកាសពិធីបុណ្យចូលឆ្នាំថ្មីប្រពៃណីជាតិខ្មែរ»។
ទន្ទឹមនឹងនេះដែរស្នងការនគរបាលខេត្តសៀមរាបលោក តេង ច័ន្ទណាត ក៏បានចេញនូវសារាចរណែនាំស្តីពីការធ្វើចរាចរណ៍ និងការឈប់ចតយានជំនិះគ្រប់ប្រភេទក្នុងភូមិសាស្ត្រក្រុងសៀមរាបផងដែរ ដើម្បីចូលរួមចំណែកក្នុងការកាត់បន្ថយគ្រោះថ្នាក់ចរាចរណ៍ ការកកស្ទះចរាចរណ៍ និងបាត់បង់នូវសណ្តាប់ធ្នាប់សាធារណៈ របៀបរៀបរយឱ្យបានកាន់តែល្អប្រសើរប្រកបដោយប្រសិទ្ធភាព។ លោកលើកឡើងថា បច្ចុប្បន្ន បរិក្ខារផ្លូវថ្នល់ថ្មីៗជាច្រើនដូចជា ផ្លាកសញ្ញា គំនូសសញ្ញា ភ្លើងសញ្ញា បាននិងកំពុងបន្តបំពាក់បន្ថែមផងដែរ។ ក្នុងស្មារតីទទួលខុសត្រូវ ដើម្បីចូលរួមចំណែកឱ្យកាន់តែមានប្រសិទ្ធភាពខ្ពស់ក្នុងការកាត់បន្ថយគ្រោះថ្នាក់ចរាចរណ៍លោកបានធ្វើការអំពាវនាវ និងសំណូមពរដល់ប្រជាពលរដ្ឋដែលប្រើប្រាស់ផ្លូវថ្នល់ និងអាជីវករទាំងអស់ត្រូវចូលរួមគោរពច្បាប់ចរាចរណ៍ផ្លូវគោក។
លោក តេង ច័ន្ទណាត បានបញ្ជាក់ថា៖ «ហាមដាក់តាំង លក់ដូរសម្ភារផ្សេងៗ ឬមធ្យោបាយគ្រប់ប្រភេទនៅលើដងផ្លូវសាធារណៈ ពិសេសផ្លូវថ្មើរជើង និងផ្លូវសម្រាប់ជិះកង់ ហាមដាក់តាំងសម្ភារផ្សេងៗដែលធ្វើឱ្យបិទបាំងស្លាកសញ្ញាចរាចរណ៍នានា»។
លោក តេង ច័ន្ទណាត បានបន្ថែមថា លោកសង្ឃឹមយ៉ាងមុតមាំចំពោះសាធារណជន និងអ្នកប្រើប្រាស់ផ្លូវថ្នល់ទាំងអស់ចូលរួមសហការអនុវត្តគោរពច្បាប់ចរាចរណ៍ផ្លូវគោកឱ្យបានព្រមៗគ្នាទៅតាមសារាចរណែនាំនេះ។
យោងតាមរបាយការណ៍អគ្គស្នងការដ្ឋានគរបាលជាតិបានឱ្យដឹងថា ក្នុងត្រីមាសទី ១ នៃឆ្នាំ ២០២២ នេះ គ្រោះថ្នាក់ចរាចរណ៍ផ្លូវគោកបានបង្កឱ្យមនុស្សស្លាប់ចំនួន ៤៩៣ នាក់ និង ១ ២៦២ នាក់ទៀតរងរបួស ក្នុងនោះ ៧៨៤ នាក់រងរបួសធ្ងន់។ របាយការណ៍ដដែលបានបន្តថា ចំនួនអ្នកស្លាប់ដោយសារគ្រោះថ្នាក់ចរាចរណ៍ក្នុងត្រីមាសទី ១ ឆ្នាំ ២០២២ នេះគឺមានការកើនឡើងចំនួន ៦០ នាក់ បើធៀបទៅនឹងរយៈពេលដូចគ្នាកាលពីឆ្នាំ ២០២១ ដែលមានអ្នកស្លាប់ចំនួន ៤៣៣ នាក់៕