ភ្នំពេញៈ ក្នុងឆ្នាំ ២០២១ មានទណ្ឌិតជាង ១ ៣០០ នាក់ត្រូវបានព្រះមហាក្សត្រ បន្ធូរបន្ថយ និងលើកលែងទោស នាឱកាសបុណ្យចូលឆ្នាំប្រពៃណីខ្មែរ បុណ្យឯករាជ្យជាតិ និងពិធីបុណ្យអុំទូក អកអំបុក សំពះព្រះខែ។
របាយការណ៍សន្និបាតបូកសរុបការងារយុត្តិធម៌ឆ្នាំ ២០-២១ និងទិសដៅការងារសម្រាប់ ឆ្នាំ ២០២២ របស់ក្រសួងយុត្តិធម៌បានឱ្យដឹងថា ក្នុងឆ្នាំ ២០២១ ព្រះមហាក្សត្របានប្រោសព្រះរាជទាន បន្ធូរបន្ថយទោស និងលើកលែងទោស អ្នកជាប់ឃុំសរុបចំនួន ១ ៣៧០ នាក់។
របាយការណ៍បន្តថា ចំពោះការបន្ធូរបន្ថយ និងលើកលែងទោសនាឱកាសបុណ្យចូលឆ្នាំខ្មែរ មានចំនួន ៣៦០ នាក់ ក្នុងនោះបន្ថយទោស ៣ ខែ ចំនួន ១៩៦ នាក់ បន្ថយទោស ៦ ខែ ៨៩ នាក់ បន្ថយទោស ៩ ខែ ៥៤ នាក់ បន្ថយទោស ១២ ខែ ៨ នាក់ លើកលែងទោស ២ នាក់។
ចំណែកក្នុងឱកាសបុណ្យឯករាជ្យជាតិ និងបុណ្យអុំទូក អកអំបុក សំពះព្រះខែ អ្នកជាប់ឃុំចំនួន ៩៨៣ នាក់ ត្រូវបានបន្ធូរបន្ថយ និងលើកលែងទោសក្នុងនោះ បន្ថយទោស ៣ ខែ ចំនួន ៦៣៨ នាក់ បន្ថយទោស ៦ ខែ ២០៣ នាក់ បន្ថយទោស ៩ ខែ ១២៥ នាក់ បន្ថយទោស ១២ ខែ ១៤ នាក់ លើកលែងទោស។ ក្នុងនោះក៏មានការបន្ធូរបន្ថយទោសអ្នកជាប់ទោស ១ ជីវិតចំនួន ៣ នាក់ផងដែរ។
របាយការណ៍បន្តទៀតថា ក្នុងឆ្នាំ ២០២១ ក្រសួងយុត្តិធម៌បានខិតខំប្រឹងប្រែងអនុវត្តសកម្មភាពការងារសម្រេចបាន សមិទ្ធផល ជាច្រើនគួរឱ្យកត់សម្គាល់ក្រៅពីកិច្ចការងារបន្ធូរបន្ថយទោសនេះ។
ភ្នំពេញប៉ុស្តិ៍មិនទាន់អាចទាក់ទងអ្នកនាំពាក្យក្រសួងយុត្តិធម៌ ដើម្បីសុំការបញ្ជាក់បាននៅឡើយទេ ពាក់ព័ន្ធនឹងការបន្ធូរបន្ថយ និងលើកលែងទោស សម្រាប់បុណ្យចូលឆ្នាំប្រពៃណីខ្មែរនៅឆ្នាំនេះ។
នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គការលីកាដូលោក អំ សំអាត មើលឃើញថា ការបន្ធូរបន្ថយ និងលើកលែងទោសក្នុងរយៈពេលប៉ុន្មានឆ្នាំចុងក្រោយនេះមានភាពប្រសើរជាងមុន បន្ទាប់ពីមានប្រតិកម្មពីលោកនាយករដ្ឋមន្ត្រី ហ៊ុន សែន កន្លងមកដែលលោកបានលើកឡើងពីការមានភាពមិនប្រក្រតីច្រើន។
លោកថា៖ «បើយើងមើលលើយន្តការនៃការបន្ធូរបន្ថយ និងលើកលែងទោស គឺខុសពីមុន ដោយសារប៉ុន្មានឆ្នាំចុងក្រោយនេះ ក្រសួងយុត្តិធម៌ ជាពិសេសអន្តរក្រសួងដែលពាក់ព័ន្ធបានធ្វើការវាយតម្លៃ អ៊ីចឹងរាល់ការស្នើសុំបន្ធូរបន្ថយ និងលើកលែងទោសមានច្រើនដំណាក់កាល។ អ៊ីចឹងវាជានីតិវិធី និងយន្តការវាយតម្លៃមួយដែលខុសពីមុន ដែលពីមុនៗមកធ្លាប់មានប្រតិកម្មពីសម្តេចនាយករដ្ឋមន្ត្រី ទាក់ទងការបន្ធូរបន្ថយ និងលើកលែងទោសវាមានភាពមិនប្រក្រតី និងមានអំពើពុករលួយច្រើន»។
លោកបានបន្តថា ការបន្ធូរបន្ថយ និងការលើកលែងទោស គឺមានសារៈសំខាន់ ចំពោះជនជាប់ឃុំដែលមានជំងឺការដោះស្រាយភាពចង្អៀតណែននៅក្នុងពន្ធនាគារ និងជាផ្នែកមួយដែលធ្វើឱ្យអ្នកជាប់ឃុំមានចិត្តចង់ចេះកែខ្លួន ដើម្បីទទួលបានការអនុគ្រោះ តាមរយៈការបន្ធូរបន្ថយទោស និងការលើកលែងទោស។
យ៉ាងណាក៏ដោយលោក អំ សំអាត បានស្នើឱ្យអន្តរក្រសួងអនុវត្តឱ្យមានតម្លាភាព ក្នុងការពិនិត្យលើការបន្ធូរបន្ថយទោស និងលើកលែងទោសដល់ទណ្ឌិត ដើម្បីចៀសវាងធ្វើឱ្យការរិះគន់ពីសំណាក់មហាជន។
សូមជម្រាបជូនថា ការបន្ធូរបន្ថយ និងលើកលែងទោសមានចំនួន ៥ ដងក្នុង ១ ឆ្នាំ រួមមានទិវាជ័យជម្នះលើរបបប្រល័យពូជសាសន៍ ៧ មករា ពិធីបុណ្យចូលឆ្នាំថ្មីប្រពៃណីជាតិ ពិធីបុណ្យវិសាខបូជា ពិធីបុណ្យឯករាជ្យជាតិ ពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក៕
វីដេអូ៖