នគរបាលបានចាប់បញ្ជូនយុវជនញៀនថ្នាំម្នាក់ទៅអធិការដ្ឋាននគរបាលស្រុកអង្គរបុរី កាលពីថ្ងៃទី ១២ មេសា ប៉ុន្មានម៉ោង ក្រោយពីដុតផ្ទះឪពុកម្តាយរបស់ខ្លួនចោលនៅភូមិទួលសាំង ក ឃុំអង្គរបូរី ស្រុកអង្គរបូរី ខេត្តតាកែវ។
លោក មៀច ចន្ថា នាយនគរបាលប៉ុស្តិ៍ឃុំ អង្គរបូរីឱ្យដឹងនៅថ្ងៃទី ១៣ មេសា ថា យុវជនម្នាក់នោះឈ្មោះ ជា ថុន អាយុ ២៥ ឆ្នាំ។ ប៉ុន្តែផ្ទះដែលដុតឆេះនោះត្រូវបានឪពុកម្តាយរបស់ជនសង្ស័យទុកចោលប្រហែល ៥ ឆ្នាំមកហើយ ដោយម្ចាស់ផ្ទះទៅធ្វើការសំណង់នៅខេត្តព្រះសីហនុ។ ចំណែកជនសង្ស័យត្រូវបានឃាត់ខ្លួន ក្រោយពីបានបង្កហេតុប៉ុន្មានម៉ោងមុន នៅថ្ងៃទី ១២ មេសា។
លោកប្រាប់ថា៖ «ជនសង្ស័យខ្ញុំបានបញ្ជូនទៅអធិការដ្ឋាននគរបាលស្រុកអង្គរបុរី តាំងពីថ្ងៃបង្កហេតុបានប៉ុន្មានម៉ោងម្ល៉េះ។ រឿងនេះបើទោះជាផ្ទះនោះជាកម្មសិទ្ធិគាត់ និងឪពុកម្តាយគាត់ក្តី តែគាត់ដុតបំផ្លាញបែបនេះគឺខុសច្បាប់ហើយ»។
លោករៀបរាប់តាមសម្តីសាក្សីនៅកន្លែងកើតហេតុថា ជនសង្ស័យ ឈ្មោះ ជា ថុន ម្នាក់នេះបានចេញពីភូមិទៅធ្វើកម្មករសំណង់ជាច្រើនឆ្នាំមកហើយ។ តែពេលជិតបុណ្យឆ្នាំខ្មែរនេះ ជនសង្ស័យបានត្រឡប់មកលេងស្រុកកំណើតតែម្នាក់ឯងហើយជាមនុស្សប្រើប្រាស់គ្រឿងញៀនផង។ លុះនៅវេលាម៉ោងជាង ៦ ល្ងាចថ្ងៃទី ១២ មេសា ជនសង្ស័យបានផឹកស្រាស្រវឹងហើយក៏ហាក់មានស្មារតីមិននឹងនរផងនោះបានយកភ្លើងទៅដុតចម្បើងក្នុងផ្ទះបណ្តាលឱ្យឆាបឆេះទាំងផ្ទះទៅ។
លោកបញ្ជាក់ថា ផ្ទះ ១ ខ្នងនោះធ្វើពីឈើប្រក់ស័ង្កសីមានទំហំទទឹងប្រវែង ៤ ម៉ែត្រ និងមានបណ្តោយ ៦ ម៉ែត្រ ដែលត្រូវបានម្តាយឪពុករបស់ជនសង្ស័យទុកចោលប្រហែល ៥ ឆ្នាំមកហើយ។ ពេលឆេះនោះមិនបង្កជាហានិភ័យ ឬគ្រោះថ្នាក់ដល់ទ្រព្យសម្បត្តិ ឬក៏អាយុជីវិតមនុស្សឡើយ។
លោកប្រាប់ថា៖ «ក្រោយកើតហេតុ កម្លាំងខ្ញុំបានឃាត់ខ្លួនគាត់មកសាកសួរ ហើយគាត់ឆ្លើយថា ផ្ទះនោះមិនដឹងទុកធ្វើអីផង ព្រោះវាទ្រុឌទ្រោមអស់ហើយ។ អ៊ីចឹងគាត់ដុតចោលតែម្តងទៅ»៕