.jpg)
មន្ត្រីជំនាញរបស់អគ្គនាយកដ្ឋាន កបប ប្រចាំខេត្តព្រះវិហារចុះត្រួតពិនិត្យតាមស្ថានីយ/ដេប៉ូប្រេងឥន្ធនៈកាលពីម្សិលមិញ។ រូបថត កបប
ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) បន្តរកឃើញទំនិញខូចគុណភាពរាប់រយគីឡូក្រាមដាក់លក់នៅលើទីផ្សារ ខណៈនៅតាមស្ថានីយ និងដេប៉ូប្រេងឥន្ធនៈបន្តរកស៊ីកេងប្រវ័ញ្ចអ្នកប្រើប្រាស់ត្រូវបានផាកពិន័យជាអន្តរការណ៍។
កកប បានឱ្យដឹងថា នៅថ្ងៃទី ១២ ខែមេសា ឆ្នាំ ២០២២ មន្ត្រីជំនាញរបស់អគ្គនាយកដ្ឋាន កបប ប្រចាំខេត្តបន្ទាយមានជ័យ ខេត្តកំពង់ឆ្នាំង និងខេត្តព្រះវិហារបន្តចុះត្រួតពិនិត្យតាមស្ថានីយ/ដេប៉ូប្រេងឥន្ធនៈបានចំនួន ២១ ស្ថានីយ/ដេប៉ូ ដោយបានរកឃើញដេប៉ូចំនួន ៨ មិនមានអនុលោមភាព និងបានធ្វើការពិន័យដល់ម្ចាស់ដេប៉ូទាំងនោះផងដែរ។
ចំណែក ទំនិញខូចគុណភាព និងហួសកាលបរិច្ឆេទប្រើប្រាស់មួយចំនួនត្រូវបានមន្ត្រីជំនាញរកឃើញ និងដកហូត។
នៅថ្ងៃទី ១២ ខែមេសា ឆ្នាំ ២០២២ មន្ត្រីជំនាញ កបប សាខាខេត្តស្វាយរៀងនៅតែបន្តយុទ្ធនាការត្រួតពិនិត្យទំនិញគ្រប់ប្រភេទនៅលើទីផ្សារ ដើម្បីធ្វើឱ្យប្រាកដថាទំនិញដែលដាក់លក់ជូនប្រជាពលរដ្ឋមុនឱកាសបុណ្យចូលឆ្នាំប្រពៃណីជាតិខ្មែរមកដល់ គឺមានសុវត្ថិភាពក្នុងការបរិភោគ ក៏ដូចជាប្រើប្រាស់។
កកប បន្តថា តាមលទ្ធផលមន្ត្រីជំនាញបានរកឃើញ និងដកហូតបានទំនិញខូចគុណភាព និងហួសកាលបរិច្ឆេទប្រើប្រាស់ចំនួន ២០,៧៤ គីឡូក្រាម មករក្សាទុកដើម្បីបន្តនីតិវិធី និងពិន័យអន្តរការណ៍។
សាខា កបប អមដំណើរដោយរថយន្តមន្ទីរពិសោធន៍ចល័តផ្នែកម្ហូបអាហារ សហការជាមួយមន្ទីរពាណិជ្ជកម្មបានដឹកនាំមន្ត្រីរបស់ខ្លួនចុះត្រួតពិនិត្យគុណភាព សុវត្ថិភាពទំនិញនានាតាមបណ្តាម៉ាត ផ្សារ ផ្ទះចែកចាយទំនិញ ស្ថិតក្នុងក្រុងកំពត ខេត្តកំពត ក្រុងសំរោង ខេត្តឧត្តរមានជ័យ ក្រុងខេមរភូមិន្ទ ខេត្តកោះកុង ក្រុងស្វាយរៀង ខេត្តស្វាយរៀង ស្រុកសំរោង ខេត្តតាកែវ ក្រុងកែបនិងស្រុកដំណាក់ចង្អើរ ខេត្តកែប និងភូមិសាស្ត្ររាជធានីភ្នំពេញ ដើម្បីការពារផលប្រយោជន៍អ្នកប្រើប្រាស់ក្នុងឱកាសបុណ្យចូលឆ្នាំប្រពៃណីជាតិខ្មែរខិតជិតមកដល់។
យោងតាមលទ្ធផលនៃការត្រួតពិនិត្យចាប់ពីថ្ងៃទី ៨ ដល់ថ្ងៃទី ១១ ខែមេសា ឆ្នាំ ២០២២ មន្ត្រី កបប បានធ្វើតេស្តបឋមរកសារធាតុគីមីហាមឃាត់លើទំនិញហូបចុកចំនួន ៧៣ គំរូ ដោយបានរកឃើញពពុះសណ្តែកមានលាយសារធាតុបូរ៉ាក់ចំនួន ៣ គីឡូ និងបានធ្វើការដកហូតទំនិញមិនមានអនុលោមភាព រួមមាន ភេសជ្ជៈ ឡេ ទំនិញហូបចុក ទំនិញវេចខ្ចប់ស្រេចចម្រុះសរុបចំនួន ២៩៣,៨១ គីឡូ។
គួរបញ្ជាក់ផងដែរថា ទំនិញដែលបានដកហូតត្រូវបានមន្ត្រីយកមករក្សាទុកនៅទីស្នាក់ការសាខា និងចំពោះអាជីវករដែលប្រព្រឹត្តកំហុសបានទទួលការពិន័យអន្តរការណ៍៕
វីដេអូ៖
