ក្រសួងទេសចរណ៍បានចេញសេចក្តីជូនដំណឹងស្តីពីការ “លើកលែងកាតព្វកិច្ចពាក់ម៉ាស់” ក្នុងខេត្តចំនួន ៤ ប៉ុន្តែក្រើនរំឭកឱ្យបន្តប្រកាន់ខ្ជាប់វិធានការចាំបាច់នានាក្នុងការចូលរួមទប់ស្កាត់ការឆ្លងរីករាលដាលនៃជំងឺកូវីដ ១៩។
សេចក្តីជូនដំណឹងរបស់ក្រសួងទេសចរណ៍ ចុះថ្ងៃទី ១២ ខែមេសា បានលើកលែងកាតព្វកិច្ចពាក់ម៉ាស់ នៅខេត្តរតនគិរី ខេត្តមណ្ឌលគិរី ខេត្តស្ទឹងត្រែង និងខេត្តព្រះវិហារ។
សេចក្តីជូនដំណឹងបន្តថា ដើម្បីចូលរួមទប់ស្កាត់ការឆ្លងរីករាលដាលនៃជំងឺកូវីដ ១៩ និងធានាការធ្វើដំណើរកម្សាន្តប្រកបដោយសុខ សុវត្ថិភាពជូនដល់គ្រប់ភ្ញៀវទេសចរ និងតាមអនុសាសន៍របស់លោកនាយករដ្ឋមន្ត្រី ហ៊ុន សែន កាលពីថ្ងៃទី ១២ ខែ មេសា ឆ្នាំ ២០២២ ក្រសួងទេសចរណ៍សូមធ្វើការជូនដំណឹងដល់គ្រប់ភ្ញៀវទេសចរ និងសាធារណជន ដូចខាងក្រោម។
១ គ្រប់ភ្ញៀវទេសចរ និងសាធារណជនត្រូវបានអនុវត្ត ការលើកលែងកាតព្វកិច្ចពាក់ម៉ាស់ សម្រាប់ការធ្វើដំណើរឆ្លងកាត់ និងដំណើរកម្សាន្តនៅក្នុងខេត្តចំនួន ៤ រួមមាន ខេត្តរតនគិរី ខេត្តមណ្ឌលគិរី ខេត្តស្ទឹងត្រែង និងខេត្តព្រះវិហារ។
សេចក្តីជូនដំណឹងបន្តថា ៖«ការលើកលែងកាតព្វកិច្ចពាក់ម៉ាស់ នៅក្នុងខេត្តទាំង៤ខាងលើនេះ ត្រូវបានធ្វើឡើងដោយឈរលើគោលការណ៍សម្រេចចិត្តដោយខ្លួនឯង តែប្រកបដោយស្មារតីទទួលខុសត្រូវខ្ពស់ រៀងៗខ្លួន និងត្រូវបន្តប្រកាន់ខ្ជាប់វិធានការចាំបាច់នានាក្នុងការចូលរួមទប់ស្កាត់ការឆ្លងរីករាលដាលនៃ ជំងឺកូវីដ ១៩ ប្រកបដោយប្រសិទ្ធភាពខ្ពស់»។
ក្រសួងបន្តថា ទី២ គ្រប់ភ្ញៀវទេសចរ និងសាធារណជនត្រូវចាំបាច់អនុវត្ត “កាតព្វកិច្ចពាក់ម៉ាស់” និងបន្តអនុវត្តវិធានសុខាភិបាល ពិសេសវិធានការ“៣ការពារ និង ៣កុំ” ឱ្យបានខ្ជាប់ខ្លួន នៅពេលធ្វើដំណើរចាកចេញពីព្រំប្រទល់ខេត្តទាំង ៤ ខាងលើ៕