វ៉ាក់សាំងបង្ការជំងឺកូវីដ ១៩ ដែលជាជំនួយពីប្រជាជន និងរដ្ឋាភិបាលឥណ្ឌាត្រូវបានដឹកមកដល់ប្រទេសកម្ពុជាដែលជាជំហានទី ២ ចំនួន ១២៥ ០០០ ដូស នាព្រឹកថ្ងៃទី ១៤ ខែមេសានេះ ក្នុងចំណោមវ៉ាក់សាំងសរុបចំនួន ៣២៥ ០០០ ដូស ដែលវ៉ាក់សាំង ២០ ម៉ឺនដូសត្រូវបានដឹកមកដល់កាលពីថ្ងៃទី ១១ ខែមេសា កន្លងទៅនេះ។
លោកស្រី យក់ សម្បត្តិ រដ្ឋលេខាធិការនៃក្រសួងសុខាភិបាលក៏បានអញ្ជើញទទួលវ៉ាក់សាំងនេះ នាព្រលានយន្តហោះអន្តរជាតិភ្នំពេញ នាព្រឹកនេះផងដែរ។
លោកនាយករដ្ឋមន្ត្រី ហ៊ុន សែន កាលពីថ្ងៃទី ១២ ខែមេសា ក្នុងពិធីប្រគល់ទទួលវ៉ាក់សាំងជំងឺកូវីដ ១៩ ដែលជាជំនួយរបស់រដ្ឋាភិបាល និងប្រជាជនឥណ្ឌា ដែលពិធីនេះធ្វើឡើងនៅវិមានសន្តិភាពបានថ្លែងថា អំណោយវ៉ាក់សាំងកូវីដ ១៩ នេះ គឺជាសក្ខីភាពដ៏ពិតប្រាកដនៃចំណងមិត្តភាព និងសាមគ្គីភាពរវាងកម្ពុជា និងឥណ្ឌា និងសមាជិកដទៃទៀតនៃគំនិតផ្ដួចផ្ដើមនេះ ដែលរួមមានសហរដ្ឋអាមេរិក ជប៉ុន និងអូស្ត្រាលី។
លោកថា៖ «កម្ពុជាសូមសម្តែងនូវការអរគុណ និងក៏កោតសរសើរជូនដល់សមាជិកនៃគំនិតផ្ដួចផ្ដើមចតុភាគី ក៏ដូចជាបណ្ដាប្រទេសនានានៅជុំវិញពិភពលោក ចំពោះកិច្ចខិតខំប្រឹងប្រែងក្នុងការប្រយុទ្ធប្រឆាំងជំងឺកូវីដ ១៩ នៅក្នុងប្រទេស តំបន់ និងសកលលោកទាំងមូល ដើម្បីធានាបាននូវការងើបឡើងវិញយ៉ាងឆាប់រហ័សនៃសកម្មភាពសង្គម សេដ្ឋកិច្ច»។
លោកស្រី ដេវីយ៉ានី ឧត្តាំ ខូប្រាហ្គាដ (H.E. Mrs. Devyani Uttam Khobragade) ឯកអគ្គរដ្ឋទូតឥណ្ឌាប្រចាំនៅកម្ពុជាបានលើកឡើងនាពេលនោះដែរថា ដើម្បីរួមចំណែកប្រយុទ្ធប្រឆាំងជំងឺកូវីដ ១៩ នៅក្នុងប្រទេសកម្ពុជា រដ្ឋាភិបាល និងប្រជាជនឥណ្ឌា ផ្តល់ជំនួយវ៉ាក់សាំងកូវីសែល ចំនួន ៣២៥ ០០០ ដូសដល់រាជរដ្ឋាភិបាល និងប្រជាជនកម្ពុជា។
លោកស្រីបានបន្ថែមទៀតថា ការផ្តល់ជំនួយវ៉ាក់សាំង គឺជាការបង្ហាញពីស្មារតីនៃការជួយគ្នារវាងកម្ពុជា និងឥណ្ឌា ដែលជាប្រទេសមានចំណងទំនាក់ទំនងល្អជាមួយគ្នាដ៏យូរលង់មកហើយ។ ឥណ្ឌា នឹងបន្តផ្តល់ជំនួយវ៉ាក់សាំងមកកាន់កម្ពុជានាពេលក្រោយបន្ថែមទៀត បើសិនកម្ពុជាត្រូវការ៕