.jpg)
តំណាងអង្គការសុខភាពពិភពលោកប្រចាំប្រទេសកម្ពុជា លោកស្រី លី អៃឡែន។ ហុង មិនា
តំណាងអង្គការសុខភាពពិភពលោកប្រចាំប្រទេសកម្ពុជា លោកស្រី លី អៃឡែន បានឱ្យដឹងថា នៅពេលចូលរួមរីករាយជាមួយគ្រួសារ និងមិត្តភក្តិត្រូវចងចាំទាំងអស់គ្នាថា អ្នកដែលងាយរងគ្រោះបំផុតនោះគឺមនុស្សដែលមានវ័យចំណាស់ អ្នកដែលមានជំងឺរ៉ាំរ៉ៃ បុគ្គលិកសុខាភិបាល និងស្ត្រីមានផ្ទៃពោះ។
លោកស្រីបានលើកឡើងតាមរយៈសារជូនពរដល់ប្រជាជនកម្ពុជាទាំងអស់ ទទួលបាននូវសេចក្ដីសុខ សុវត្ថិភាព សុខភាពល្អ និងសិរីសួស្ដី នាឱកាសពិធីបុណ្យចូលឆ្នាំខ្មែរប្រពៃណីជាតិនេះ ដែលលោកស្រីថា ពិធីបុណ្យចូលឆ្នាំថ្មីនេះគឺឱកាសដ៏វិសេសវិសាល បន្ទាប់ពីមានការរាតត្បាតជាសកលនៃជំងឺកូវីដ ១៩ ជាង ២ ឆ្នាំកន្លងមកនេះ។
ក្នុងនាមអង្គការសុខភាពពិភពលោកប្រចាំប្រទេសកម្ពុជា លោកស្រីពិតជាមានក្ដីរំភើបរីករាយ សូមចូលរួមប្រារព្ធពិធីអបអរសាទរឆ្នាំថ្មីនេះជាមួយប្រជាជនកម្ពុជាទាំងអស់ដែលលោកស្រីយល់យ៉ាងច្បាស់អំពីសារៈសំខាន់ក្នុងការជួបជុំគ្នាជាថ្មីម្ដងទៀតជាមួយមនុស្សជាទីស្រលាញ់នាឱកាសដ៏មានសារៈសំខាន់មួយនេះ។
លោកស្រី លី អៃឡែន មានប្រសាសន៍ថា៖ យើងគួរជួបជុំគ្នា និងរីករាយចូលរួមប្រារព្ធពិធីបុណ្យចូលឆ្នាំខ្មែរដ៏សំខាន់នេះ ដោយប្រកាន់ខ្ជាប់នូវវិធានការសុវត្ថិភាព ដើម្បីការពារមនុស្សជាទីស្រលាញ់របស់យើងពីជំងឺកូវីដ ១៩។ នៅពេលចូលរួមរីករាយជាមួយគ្រួសារ និងមិត្តភក្តិ យើងត្រូវចងចាំទាំងអស់គ្នាថា អ្នកដែលងាយរងគ្រោះបំផុតនោះគឺមនុស្សដែលមានវ័យចំណាស់ អ្នកដែលមានជំងឺរ៉ាំរ៉ៃ បុគ្គលិកសុខាភិបាល និងស្ត្រីមានផ្ទៃពោះ»។
លោកស្រីបន្តថា៖ «យើងទាំងអស់គ្នាសុទ្ធសឹងតែមានក្រុមមនុស្សងាយរងគ្រោះទាំងនេះនៅក្នុងគ្រួសារ និងសហគមន៍របស់យើង ហើយយើងគឺជាអ្នកសម្រេចចិត្តក្នុងការការពារពួកគេ។ កិច្ចខិតខំប្រឹងប្រែងរបស់អ្នកទាំងអស់គ្នានៅក្នុងការទទួលបានការចាក់វ៉ាក់សាំងពេញលេញ និងការអនុវត្តវិធានការ ៣ កុំ ៣ ការពារ ដែលជាវិធានការការពារជំងឺកូវីដ ១៩ របស់ប្រទេសកម្ពុជា គឺពិតជាមានប្រសិទ្ធភាព ហើយនេះគឺជាមូលហេតុដ៏ចម្បងដែលយើងអាចប្រារព្ធពិធីបុណ្យចូលឆ្នាំខ្មែរក្នុងឆ្នាំនេះបាន»។
ជាការពិតណាស់ ការរាតត្បាតជាសកលនៃជំងឺនេះ គឺមិនទាន់ចប់នៅឡើយនោះទេ ហើយវីរុសនេះនៅតែបន្តឆ្លងនៅជុំវិញពិភពលោកក្នុងនោះរាប់បញ្ចូលទាំងប្រទេសកម្ពុជាផងដែរ។ ត្រូវបន្តរក្សានូវការប្រុងប្រយ័ត្ន និងការពារការកើនឡើងនៃជំងឺនេះម្ដងទៀតនៅក្រោយពិធីបុណ្យចូលឆ្នាំខ្មែរ ដូច្នេះត្រូវបន្តរួមចំណែកក្នុងការគ្រប់គ្រងជំងឺកូវីដ ១៩ប្រកបដោយនិរន្តរភាព និងបើកដំណើរការប្រទេសកម្ពុជាប្រកបដោយភាពជោគជ័យ៕
វីដេអូ៖
