ភ្នំពេញៈ កម្ពុជាកំពុងប្រារព្ធទិវាសប្ដាហ៍ជាតិសុវត្ថិភាពចរាចរណ៍ផ្លូវគោកលើកទី១៣ ពីថ្ងៃទី ៧ ដល់ថ្ងៃទី ១៤ ខែមេសា ខណៈជារៀងរាល់ឆ្នាំ ស្ថានភាពគ្រោះថ្នាក់ចរាចរណ៍នៅកម្ពុជា តែងតែកើតមានឡើងច្រើន ក្នុងឱកាសបុណ្យប្រពៃណីជាតិធំៗ ពិសេសបុណ្យចូលឆ្នាំខ្មែរ និងបុណ្យភ្ជុំបិណ្ឌ។
ក្នុងត្រីមាសទី១ ឆ្នាំនេះ គ្រោះថ្នាក់ចរាចរណ៍បានកើនឡើងក្នុងអត្រាខ្ពស់បណ្ដាលឱ្យស្លាប់ និងរបួសច្រើនជាងគ្រោះថ្នាក់ សង្គមនានាដែលក្នុង ១ ថ្ងៃមានអ្នកស្លាប់ ៥ នាក់ និងរបួស ១៤ នាក់។
នេះបើតាមលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក ថ្លែងក្នុងពេលអញ្ជើញជាអធិបតីក្នុងទិវាសប្ដាហ៍ជាតិសុវត្ថិភាពចរាចរណ៍ផ្លូវគោក លើកទី១៣ ប្រារព្ធឡើងនៅខេត្តបាត់ដំបងកាលពីថ្ងៃទី១២ ខែមេសា ឆ្នាំ២០២២។
លោកបានថ្លែងថា ទិវាសប្ដាហ៍ជាតិសុវត្ថិភាពចរាចរណ៍ផ្លូវគោកនេះ ផ្ដួចផ្ដើមឡើងដោយអង្គការសហប្រជាតិ និងបានកំណត់យកខែឧសភាជារៀងរាល់ឆ្នាំដើម្បីប្រារព្ធទិវានេះឡើងនៅតាមប្រទេសនានាទូទាំងពិភពលោក ដើម្បីជាការក្រើនរំឭកប្រជាពលរដ្ឋ ពិសេសប្រទេសតំបន់អាស៊ីប៉ាស៊ីហ្វិក រួមទាំងកម្ពុជាដោយត្រូវយកចិត្តទុកដាក់ខ្ពស់លើវិស័យសុវត្ថិភាពចរាចរណ៍។
លោកបន្តថា ឆ្នាំនេះជាឆ្នាំទី១៣ ហើយដែលកម្ពុជា និងបណ្ដាប្រទេសផ្សេងទៀតបានរៀបចំទិវានេះ ក្រោមការលើកទឹកចិត្ត និងឧបត្ថម្ភគាំទ្ររបស់រាជរដ្ឋាភិបាលដែលមាន លោកនាយករដ្ឋមន្ត្រីហ៊ុនសែន ជាប្រមុខ ដើម្បីលើកកម្ពស់ការយល់ដឹងរបស់ប្រជាពលរដ្ឋអំពីហានិភ័យនៃគ្រោះថ្នាក់ចរាចរណ៍ ដែលបង្កមហន្តរាយដល់ អាយុវជីវិតមនុស្ស ការបាត់បង់កាយសម្បទា ខូចខាតទ្រព្យសម្បត្តិ ព្រមទាំងបំផុសស្មារតីឱ្យបង្កើនការប្រុងប្រយ័ត្នចំពោះគ្រោះថ្នាក់ចរាចរណ៍។
លោក ស ខេង បញ្ជាក់ថា៖«ជារៀងរាល់ឆ្នាំ ស្ថានភាពគ្រោះថ្នាក់ចរាចរណ៍នៅកម្ពុជា តែងតែកើតមានឡើងច្រើន ក្នុងឱកាសបុណ្យប្រពៃណីជាតិធំៗ ពិសេសបុណ្យចូលឆ្នាំខ្មែរ និងបុណ្យភ្ជុំបិណ្ឌ ដូច្នេះហើយទើបរាជរដ្ឋាភិបាលបានកំណត់ជាផ្លូវការ និងបានជំរុញលើកទឹកចិត្តឱ្យគណៈកម្មាធិការជាតិសុវត្ថិភាពចរាចរណ៍យកកាលបរិច្ឆេទថ្ងៃទី៧ ដល់ថ្ងៃទី១៤ ខែមេសាជារៀងរាល់ឆ្នាំដើម្បីប្រារព្ធទិវាសប្ដាហ៍សុវត្ថិភាពចរាចរណ៍ផ្លូវគោក»។
លោកបន្ថែមថា ការកំណត់រៀបចំនេះ គឺដើម្បីក្រើនរំឭក និងពញាក់អារម្មណ៍ឱ្យប្រជាពលរដ្ឋយកចិត្តទុកដាក់គោរពច្បាប់ មានសីលធម៌យោគយល់ អធ្យាស្រ័យគ្រប់ពេលធ្វើដំណើរលើដងផ្លូវ នាំមកនូវសុវត្ថិភាពក្នុងការរីករាយជួបជុំគ្រួសារក្នុងសង្គមជាតិ ដែលកំពុងមានសុខសន្តិភាព មានការអភិវឌ្ឍគ្រប់វិស័យ មានកំណើនសេដ្ឋកិច្ច ពិសេសមានផ្លូវ ស្ពានតភ្ជាប់គ្រប់តំបន់ និងជាមួយបណ្ដាប្រទេសនានា ហើយប្រជាពលរដ្ឋក៏មានលទ្ធភាពទិញមធ្យោបាយធ្វើដំណើរកាន់តែច្រើន។
លោកបានកោតសរសើរ និងវាយតម្លៃខ្ពស់ចំពោះការធ្វើពលីកម្មគ្រប់បែបយ៉ាងរបស់មន្ត្រីនគរបាលចរាចរណ៍ផ្លូវគោក មន្ត្រីសាធារណការដឹកជញ្ជូន ដែលបានតស៊ូលះបង់យ៉ាងស្វិតស្វាញ បំពេញតួនាទី ភារកិច្ចរក្សាសុវត្ថិភាពចរាចរណ៍ផ្លូវគោក ប្រកបដោយស្មារតីទទួលខុសត្រូវ និងមនសិការខ្ពស់ ធ្វើឱ្យចំនួនគ្រោះថ្នាក់ អ្នកស្លាប់ និងអ្នករងរបួសដោយគ្រោះថ្នាក់ចរាចរណ៍ផ្លូវគោកឆ្នាំ២០២០ និងឆ្នាំ២០២១ បានថយចុះ គួរឱ្យមោទនភាព។
លោកក៏បានកោតសរសើរនិងលើកទឹកចិត្តចំពោះថ្នាក់ដឹកនាំ និងមន្ត្រីរាជការ នៃក្រសួងស្ថាប័នពាក់ព័ន្ធទាំងអស់ដែលបានរួមចំណែករឹតបន្តឹងការអនុវត្តច្បាប់ចរាចរណ៍ផ្លូវគោក ការផ្សព្វផ្សាយអប់រំច្បាប់ ការសង្គ្រោះជនរងគ្រោះដោយគ្រោះថ្នាក់ចរាចរណ៍ផ្លូវគោក និងកិច្ចការសំខាន់ៗជាច្រើនទៀតប្រកបដោយស្មារតីទទួលខុសត្រូវខ្ពស់។
លោកបញ្ជាក់ថា៖«ហានិភ័យនៃគ្រោះថ្នាក់ចរាចរណ៍ជាបញ្ហាប្រឈមយូរអង្វែង ជាក់ស្ដែងបើទោះបីជាមានការថយចុះនៅឆ្នាំ២០២០ និងឆ្នាំ២០២១ ក៏ដោយ ប៉ុន្តែនិន្នាការនេះបានកើនឡើងគួរឱ្យកត់សម្គាល់នៅឆ្នាំ២០២២ នេះ ពិសេសក្នុងត្រីមាសទី១ឆ្នាំ២០២២នេះដែលគ្រោះថ្នាក់បានកើនឡើងក្នុងអត្រាខ្ពស់ បណ្ដាលឱ្យស្លាប់ និងរបួសច្រើនជាងគ្រោះថ្នាក់សង្គមនានា ក្នុងនោះក្នុង១ថ្ងៃមានអ្នកស្លាប់ ៥នាក់ និងរបួស១៤នាក់»។
នៅក្នុងពិធីនេះ លោក សុខ លូ អភិបាលនៃគណៈអភិបាលខេត្តបាត់ដំបង បានធ្វើរបាយការណ៍អំពីស្ថានភាពផ្លូវ ស្ពាន និងស្ថានភាពចរាចរណ៍នៅក្នុងខេត្តបាត់ដំបង ក្នុងឆ្នាំ២០២១ ដោយខេត្តនេះ មានគ្រោះថ្នាក់ចរាចរណ៍ សរុប១២៧ លើក ស្លាប់ ៧៤ នាក់ របួស ២១៤ នាក់ ធៀបឆ្នាំ២០២០ ថយចុះ ៦២ ករណី ស្លាប់ថយចុះ១២ នាក់ របួសថយចុះ ១០៩ នាក់៕