ភ្នំពេញៈ អគ្គមេបញ្ជាការនៃកងបញ្ជាការដ្ឋាននៃកងយោធពលខេមរភូមិន្ទ លោក វង្ស ពិសេន បានលើកឡើងថា កងយោធពលខេមរភូមិន្ទបានរួមចំណែកយ៉ាងសកម្មក្នុងការអនុវត្តរាល់បទបញ្ជារបស់រាជរដ្ឋាភិបាលក្នុងការទប់ស្កាត់ បង្ក្រាបសកម្មភាពខុសច្បាប់នានា រួមចំណែកក្នុងការជួយសង្គ្រោះប្រជាជនពីគ្រោះមហន្តរាយនានា និងសហការទប់ស្កាត់ បង្ការ ការពារ និងចូលរួមព្យាបាលជំងឺកូវីដ ១៩។
លោកបានលើកឡើងដូចនេះក្នុងសារជូនពរដែលលោកបានផ្ញើជូននាយទាហាន នាយទាហានរង និងពលទាហានទាំងអស់នៃកងយោធពលខេមរភូមិន្ទ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំ ២០២២ នេះ។
លោកថា៖ «នាយទាហាន នាយទាហានរង និងពលទាហានទាំងអស់នៃកងយោធពលខេមរភូមិន្ទកាលពីឆ្នាំកន្លងទៅបានខិតខំពុះពារជម្នះរាល់ការលំបាក ធ្វើពលិកម្មគ្រប់បែបយ៉ាង ដើម្បីថែរក្សាសុខសន្តិភាព ស្ថិរភាពសង្គម ការពារបូរណភាពទឹកដី និងអធិបតេយ្យជាតិ មាតុភូមិជាទីស្នេហានៃយើង»។
លោកបានបន្ដថា នាយទាហាន នាយទាហានរង និងពលទាហានទាំងអស់បានចូលរួមអនុវត្តយ៉ាងសកម្មនូវគោលនយោបាយរបស់រាជរដ្ឋាភិបាល ក្រសួងការពារជាតិ អគ្គបញ្ជាការ សំដៅកសាងកងយោធពលខេមរភូមិន្ទ ឱ្យបានរឹងមាំរៀបរយ មានសមត្ថភាពគ្រប់គ្រាន់ក្នុងការបំពេញតួនាទីភារកិច្ចក្នុងកិច្ចការពារជាតិ។
លោក វង្ស ពិសេន បានបញ្ជាក់ថា៖ «កងយោធពលខេមរភូមិន្ទបានរួមចំណែកយ៉ាងសកម្មអនុវត្តរាល់បទបញ្ជារបស់រាជរដ្ឋាភិបាលក្នុងការទប់ស្កាត់បង្ក្រាបសកម្មភាពខុសច្បាប់នានា ដូចជា បទល្មើសព្រៃឈើ បទល្មើសនេសាទ ការជួញដូរផ្លូវភេទ គ្រឿងញៀន…។ លើសពីនេះបានសហការជួយដល់គ្រួសារ យោធិន ពលី ជនបាត់បង់សមត្ថភាពការងារ និងពង្រឹងការចងសម្ព័ន្ធមេត្រីភាពរវាងអង្គភាពកងទ័ពជាមួយក្រសួងស្ថាប័នស៊ីវិល ក្នុងគោលដៅកសាងពង្រឹងខឿនការពារជាតិឱ្យកាន់តែរឹងមាំ»។
សមិទ្ធផលដ៏ធំធេងដែលសម្រេចបានកន្លងមក គឺអាស្រ័យដោយការខិតខំប្រឹងប្រែងពុំខ្លាចនឿយហត់ និងការធ្វើពលិកម្មដ៏ថ្លៃថ្លារបស់នាយទាហាន នាយទាហានរង និងពលទាហានទាំងអស់នៃកងយោធពលខេមរភូមិន្ទក្រោមការដឹកនាំដ៏ត្រឹមត្រូវរបស់លោកនាយករដ្ឋមន្ត្រី ហ៊ុន សែន។ នេះជាការបញ្ជាក់បន្ថែមពីលោក វង្ស ពិសេន៕