ប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស លោកស្រី ឱ វណ្ណឌីន បានធ្វើការជូនពរដល់ប្រជាពលរដ្ឋទាំងអស់ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរ ដែលបានប្រារព្ធធ្វើឡើងនៅថ្ងៃទី ១៤ ខែមេសានេះ។
លោកស្រីបានសរសេរលើបណ្តាញធ្វីធើររបស់លោកស្រីថា សូមប្រសិទ្ធិពរជ័យ សិរីមង្គល វិបុលសុខ មហាប្រសើរ និងចម្រើនរុងរឿងជានិរន្តរ៍ ក្នុងឱកាសបុណ្យចូលឆ្នាំខ្មែរ ឆ្នាំ ២០២២ នេះ ប្រកបដោយសុវត្ថិភាព។
លោកស្រី ឱ វណ្ណឌីន បានបន្ថែមថា៖ «សង្ឃឹមថា មេរោគកូវីដ ១៩ នឹងមិនធ្វើដំណើរជាមួយអ្នកត្រឡប់ទៅផ្ទះវិញទេ។ សូមថែទាំចាស់ជរា និងមនុស្សជាទីស្រលាញ់របស់អ្នក!»។
ទន្ទឹមនឹងនេះដែរ លោកស្រីបានថ្លែងអំណរគុណ និងកោតសរសើរចំពោះក្រុមគ្រូពេទ្យទាំងរាជធានី និងខេត្តនានាដែលបានយកចិត្តទុកដាក់ផ្តល់សេវាចាក់វ៉ាក់សាំងកូវីដ ១៩ ដល់ប្រជាពលរដ្ឋ ពិសេសជនវ័យចាស់ និងកុមារ ដើម្បីពង្រឹងភាពស៊ាំបុគ្គល និងសហគមន៍។
តំណាងអង្គការសុខភាពពិភពលោកប្រចាំកម្ពុជា លោកស្រី លី អៃឡែន បានធ្វើការជូនពរប្រជាពលរដ្ឋកម្ពុជាក្នុងពិធីបុណ្យចូលឆ្នាំខ្មែរនេះផងដែរ ដោយលោកស្រីបានលើកឡើងថា បន្ទាប់ពីមានជំងឺរាតត្បាតជាសកលអស់រយៈពេលជាង ២ ឆ្នាំកន្លងមកនេះ ទាំងអស់គ្នាដឹងយ៉ាងច្បាស់អំពីវិធានការរក្សាសុវត្ថិភាពដល់គ្នាទៅវិញទៅមក។
លោកស្រីបានឱ្យដឹងថា កិច្ចខិតខំប្រឹងប្រែងរបស់អ្នកទាំងអស់គ្នានៅក្នុងការទទួលបានការចាក់វ៉ាក់សាំងពេញលេញ និងការអនុវត្តវិធានការ ៣ កុំ ៣ ការពារ ដែលជាវិធានការការពារជំងឺកូវីដ ១៩ របស់ប្រទេសកម្ពុជា គឺពិតជាមានប្រសិទ្ធភាព ហើយនេះគឺជាមូលហេតុដ៏ចម្បងដែលគ្រប់គ្នាអាចប្រារព្ធពិធីបុណ្យចូលឆ្នាំខ្មែរក្នុងឆ្នាំនេះបាន។
ជាការពិតណាស់ ការរាតត្បាតជាសកលនៃជំងឺនេះ គឺមិនទាន់ចប់នៅឡើយនោះទេ ហើយវីរុសនេះនៅតែបន្តឆ្លង។ លោកស្រី លី អៃឡែន បានបញ្ជាក់ថា ៖ «សមិទ្ធផលនៃការចាក់វ៉ាក់សាំងប្រឆាំងជំងឺកូវីដ ១៩ នេះ គឺពិតជាគួរឱ្យកត់សម្គាល់ និងគួរឱ្យកោតសរសើរបំផុត។ ឥឡូវនេះ ការចាក់ដូសជំរុញ គឺពិតជាពេលវេលាដ៏ត្រឹមត្រូវ និងកាន់តែមានសារៈសំខាន់សម្រាប់សមាជិកគ្រួសារដែលមានវ័យចំណាស់ និងអ្នកដែលមានជំងឺប្រចាំកាយ»។
តំណាងអង្គការសុខភាពពិភពលោកប្រចាំកម្ពុជារូបនេះបានបន្ថែមថា ការដែលសមាជិកដែលគ្រប់លក្ខខណ្ឌទាំងអស់បានចាក់វ៉ាក់សាំងបានពេញលេញនឹងជួយបន្ធូរបន្ថយហានិភ័យនៅពេលជួបជុំគ្នា។ ការទទួលបានដូសជំរុញ គឺមានការចាំបាច់ជាខ្លាំងក្នុងការពង្រឹងប្រព័ន្ធភាពស៊ាំ ដែលចាំបាច់ដើម្បីការពារពីការធ្លាក់ខ្លួនឈឺធ្ងន់ធ្ងរ និងការចូលសម្រាកពេទ្យ។
លោកស្រីថា៖ «សូមប្រជាជនទាំងអស់គ្នាគិតគូរអំពីទីតាំងល្អបំផុត និងសុវត្ថិភាពបំផុតក្នុងការប្រារព្ធពិធីបុណ្យចូលឆ្នាំថ្មីនេះ។ ទីតាំងខាងក្រៅដែលមានខ្យល់អាកាសបរិសុទ្ធ ឬកន្លែងដែលមានលំហូរខ្យល់ចេញចូលល្អ គឺជាជម្រើសទីតាំងដ៏ល្អ និងមានសុវត្ថិភាពសម្រាប់គ្រួសារ និងមិត្តភក្តិទាំងអស់គ្នា»។
លោកស្រី លី អៃឡែនបានបង្ហាញពីក្តីសប្បាយរីករាយក្នុងពិធីបុណ្យចូលឆ្នាំខ្មែរ ដែលលោកស្រីថានេះគឺជាការអបអរសាទរដ៏សំខាន់មួយ ហើយលោកស្រីពិតជាមានក្ដីរំភើបក្នុងការស្ថិតនៅក្នុងប្រទេសដ៏ល្អអស្ចារ្យមួយនេះនាឱកាសពិធីបុណ្យចូលឆ្នាំខ្មែរឆ្នាំ ២០២២ ដ៏ពិសេសនេះ៕