.jpg)
ប្រជាពលរដ្ឋធ្វើដំណើរតាមផ្លូវទៅស្រុកកំណើត កាលពីថ្ងៃទី ១២ មេសា។ ហុង មិនា
លោកនាយករដ្ឋមន្ត្រី ហ៊ុន សែន បន្តក្រើនរំឭកប្រជាពលរដ្ឋឱ្យចូលរួមអនុវត្តវិធានការ ៣ ការពារ ៣ កុំ ជាពិសេសពាក់ម៉ាស់ក្នុងពេលសប្បាយរីករាយបុណ្យចូលឆ្នាំថ្មី ខណៈអំពាវនាវប្រជាពលរដ្ឋឱ្យមានការប្រុងប្រយ័ត្នខ្ពស់នៅពេលធ្វើដំណើរចៀសវាងគ្រោះថ្នាក់ចរាចរណ៍។
ការអំពាវនាវនេះ បន្ទាប់ពីលោកនាយករដ្ឋមន្ត្រីសង្កេតឃើញថា ប្រជាពលរដ្ឋបាននិងកំពុងដើរលេងយ៉ាងសប្បាយរីករាយ និងមានការជួបជុំ ប៉ុន្តែមិនសូវពាក់ម៉ាស់នោះទេ។
លោកបានថ្លែងយ៉ាងដូច្នេះថា៖ «ថ្ងៃចូលឆ្នាំខ្មែរបានចូលមកដល់ និងឆ្លងហួសមកដល់ថ្ងៃទី ២ យើងបានសង្កេតឃើញថា ប្រជាពលរដ្ឋរបស់យើងបានធ្វើដំណើរលេងកម្សាន្តនៅទីកនែ្លងនានាយ៉ាងច្រើន ហើយជាថ្ងៃដែលសប្បាយរីករាយ បន្ទាប់ពីខកខានអស់រយៈពេល ២ ឆ្នាំកន្លងផុតទៅ ហើយនៅក្នុងការសប្បាយរីករាយនេះ ខ្ញុំក៏បានសង្កេតឃើញថា បងប្អូនប្រជាពលរដ្ឋរបស់យើង ជាពិសេសក្មួយៗ ចៅៗមិនសូវមានពាក់ម៉ាស់នោះទេ។
លោកបន្តទៀតថា ហើយជាមួយគ្នានេះ ក៏យើងសង្កេតឃើញថា ទីកន្លែងដែលមានការចាក់វ៉ាក់សាំង ក៏អ្នកដែលទទួលវ៉ាក់សាំងមានចំនួនតិចតួចនៅឡើយ អាស្រ័យហេតុនេះលោកអំពាវនាវចំពោះបងប្អូនប្រជាពលរដ្ឋ ដែលធ្វើដំណើរកម្សាន្តក្រៅពីខេត្តរតនគិរី មណ្ឌលគិរី ស្ទឹងត្រែង និងព្រះវិហារ សូមមេត្តាប្រុងប្រយ័ត្នជាមួយនឹងការយកចិត្តទុកដាក់ការពារខ្លួនតាមវិធានការពា ៣ កុំ និង ៣ ការពារ។
ទន្ទឹមនឹងនេះដែរលោកនាយករដ្ឋមន្ត្រីអំពាវនាវចំពោះប្រជាពលរដ្ឋ ដែលមិនទាន់ទទួលចាក់វ៉ាក់សាំងដែលក្រុមការងាររៀបចំនៅតាមទីកន្លែងកម្សាន្តនានាត្រូវឆ្លៀតឱកាសពេលនោះ គួរតែមានការទទួលយកនូវវ៉ាក់សាំងនៅពេលត្រឡប់ទៅផ្ទះវិញ ដើម្បីឱ្យអត្រានៃដូសជំរុញ សម្រាប់ប្រជាពលរដ្ឋមានភាពស៊ាំ ដើម្បីធានាថាក្រោយចូលឆ្នាំខ្មែរនេះ វ៉ាក់សាំងដូសជំរុញរបស់យើងចាក់បានចំនួនច្រើន។
បន្ថែមពីនេះលោកក៏អំពាវនាវអាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធ គ្រប់ប្រភេទ យកចិត្តទុកដាក់ជាមួយនឹងការការពារសន្តិសុខសណ្ដាប់ធ្នាប់ សម្រាប់ប្រជាពលរដ្ឋក្នុងការសប្បាយក្នុងឱកាសចូលឆ្នាំថ្មីប្រពៃណីជាតិ។
លោកក៏អំពាវនាវពលរដ្ឋយកចិត្តទុកដាក់ទៅលើការធ្វើដំណើរគោរពនូវច្បាប់ចរាចរណ៍ ចៀសវាងការបើកប្រជែងគ្នា។ លោកថា៖ «ដូចដែលឃើញអត្រាគ្រោះថ្នាក់ ដែលបានកើតឡើងរយៈពេលនៃបុណ្យចូលឆ្នាំរបស់យើង យើងពុំមានអ្នកស្លាប់សម្រាប់ជំងឺកូវីដនោះទេ ហើយជំងឺកូវីដក៏ឆ្លងនៅក្រោម ២០ នាក់ ក្នុងមួយថ្ងៃ ទាំងមុនពេលចូលឆ្នាំ និងក្រោយពេលចូលឆ្នាំថ្មី ប៉ុន្តែសម្រាប់គ្រោះថ្នាក់ចរាចរណ៍គឺមានចំនួនច្រើនដែលធ្វើឱ្យមនុស្សស្លាប់»។
លោកនាយករដ្ឋមន្ត្រី ហ៊ុន សែន បន្តអំពាវនាវប្រជាពលរដ្ឋដែលមានការសង្ស័យខិតខំធ្វើតេស្ត ដើម្បីពិនិត្យថា តើមានឆ្លង ឬមិនឆ្លង ដើម្បីមានវិធានការការពារខ្លួនផ្ទាល់ និងការពារនៅក្នុងក្រុមគ្រួសាររបស់យើង៕
