រតនគិរីៈ ប៉ុន្មានខែចូលដល់ឆ្នាំ ២០២២ នេះ អង្គការជីវិតធម្មជាតិនៅកម្ពុជា (BirdLife in Cambodia) បានជីកស្តារត្រពាំងធម្មជាតិបានចំនួន ១០ ក្នុងដែនជម្រកសត្វព្រៃលំផាត់ ក្នុងខេត្ដរតនគិរី សម្រាប់ជួយដល់ការរស់នៅរបស់សត្វព្រៃក្នុងរដូវប្រាំង។នេះបើតាមការឱ្យដឹងពីអង្គការ BirdLife ពីថ្ងៃទី១២ មេសា។
អង្គការជីវិតធម្មជាតិនៅកម្ពុជា បានឱ្យដឹងថា ត្រពាំង គឺជាទីជម្រកដែលផ្តល់ចំណីនិងទឹកសម្រាប់សត្វជាច្រើនប្រភេទដែលរស់នៅក្នុងព្រៃរបោះក្នុងនោះ មានទាំងសត្វស្លាបទឹកជាច្រើនប្រភេទដូចជា ត្រយងយក្ស ត្រយងចង្កំកស ត្រដក់ ក្រៀល និងសត្វព្រៃជាច្រើនប្រភេទទៀតនៅក្នុងដែនជម្រកសត្វព្រៃលំផាត់ពឹងផ្អែកលើត្រពាំងដើម្បីរកចំណី និងប្រភពទឹក ជាពិសេសក្នុងរដូវប្រាំង។
បច្ចុប្បន្ន មានត្រពាំងជាច្រើនត្រូវបានគ្របដណ្តប់ដោយស្មៅក្រាស់និងមួយចំនួនទៀតគោករាក់មិនអាចរក្សាទឹកបានយូរសម្រាប់សត្វព្រៃរហូតដល់រដូវភ្លៀងត្រឡប់សាជាថ្មី។ នេះបើតាមការបញ្ជាក់របស់អង្គការ BirdLife។
អង្គការនេះបញ្ជាក់ថា«ក្នុងឆ្នាំ២០២២នេះ អង្គការជីវិតធម្មជាតិនៅកម្ពុជា Birdlife in Cambodia បានជីកស្តារត្រពាំងធម្មជាតិចំនួន១០ត្រពាំង ក្នុងដែនជម្រកសត្វព្រៃលំផាត់ក្នុងគោលបំណងសម្រាប់ការប្រើប្រាស់របស់សត្វនៅក្នុងរដូវប្រាំង»។
បើតាមអង្គការ BirdLife ការជីកស្តារត្រូវបានធ្វើឡើងដោយកម្លាំងប្រជាពលរដ្ឋក្នុងមូលដ្ឋាន ហើយការជ្រើសរើសប្រជាពលរដ្ឋមូលដ្ឋានគឺវាប្រសើរជាងការប្រើគ្រឿងចក្រគឺដើម្បីផ្តល់ប្រាក់ចំណូលបន្ថែមជូនពួកគាត់និងផ្សារភ្ជាប់ការងារ អភិរក្សសត្វព្រៃជាមួយសហគមន៍។
អង្គការ BirdLife បញ្ជាក់ថា បន្ទាប់ពីការជីកស្តារត្រពាំងទាំងអស់នេះនឹងត្រូវតាមដានកត់ត្រាពីកម្រិតទឹក ស្ថានភាពរុក្ខជាតិ និងការប្រើប្រាស់របស់សត្វព្រៃនៅទីនោះ ៕