ភ្នំពេញៈ លោកនាយករដ្ឋមន្រ្ដី ហ៊ុន សែន បានណែនាំអាជ្ញាធរគ្រប់លំដាប់ថ្នាក់កុំអនុវត្ដនូវច្បាប់ទាក់ទងនឹងការគ្រប់គ្រងកូវីដ១៩ និងជំងឺឆ្លងដទៃទៀត ក្នុងដំណាក់កាលនៃពិធីបុណ្យចូលឆ្នាំប្រពៃណីជាតិនេះ លើកលែងតែមានស្ថានភាពឆ្លងធ្ងន់ធ្ងរ។
លោកនាយករដ្ឋមន្រ្ដី ហ៊ុន សែន បានណែនាំបែបនេះ ក្នុងពេលលោកនិងភរិយា បានអញ្ជើញជាអធិបតីក្នុងពិធីបដិមាភិសេករូបសំណាក «ព្រះថោងនាងនាគ» នៅខេត្តព្រះសីហនុ កាលពីនៅព្រឹកថ្ងៃទី១៦ ខែមេសា ឆ្នាំ ២០២២ ដែលជាថ្ងៃទី៣ នៃពិធីបុណ្យចូលឆ្នាំថ្មី ប្រពៃណីជាតិខ្មែរ។
លោកសង្កេតឃើញថា ពិតជាមានការសប្បាយរីករាយ និងមានសាមគ្គីភាពក្នុងចំណោមប្រជាជននៅតាម ភូមិ តាមឃុំ និងទីកន្លែងកម្សាន្តនានា បើទោះបីប្រទេសកម្ពុជាមាន ១៧ គណបក្សដែលត្រៀមប្រកួតប្រជែងនៅពេលខាងមុខនេះក៏ដោយចុះ ក៏ប៉ុន្ដែមិនបានឃើញនូវសញ្ញានៃការបែងចែករើសអើងណាមួយ នៅក្នុងចំណោមប្រជាជននៅពេលវេលាដែលមកដល់សម្រាប់ការបោះឆ្នោតនោះទេ។
លោកថ្លែងថា៖ «គេ[ពលរដ្ឋ]ចូលរាំសប្បាយរីករាយ ចូលលេងជាមួយគ្នា ដោយមិនគិតថា អ្នកណានៅខាងគណបក្សណានោះទេ។ ការទទួលបានវ៉ាក់សាំងក៏ដូចគ្នាកម្ពុជាគ្មានការរើសអើងណាមួយនៅក្នុងចំណោមប្រជាពលរដ្ឋរបស់ខ្លួនទោះបីជឿលើបក្សណាក៏ដោយសុទ្ធតែទទួលបាននូវវ៉ាក់សាំងទាំងអស់ នេះហើយជាមោទនភាពរបស់កម្ពុជារបស់ខ្មែរយើង»។
លោកនាយករដ្ឋមន្រ្ដីលើកឡើងថា ឆ្នាំនេះគឺជាឆ្នាំដ៏ល្អ ហើយលោកសង្ឃឹមថា ប្រជាពលរដ្ឋនឹងបន្តការលេងកម្សាន្ត។
លោកបន្តថាថ្ងៃទី១៦ ជាថ្ងៃចុងក្រោយនៃពិធីបុណ្យចូលឆ្នាំប្រពៃណីជាតិខ្មែរ ប៉ុន្ដែប្រជាពលរដ្ឋក៏នឹងលេងបន្តដោយសារថ្ងៃទី១៦ នេះទើបតែថ្ងៃសៅរ៍ ពលរដ្ឋអាចលេងកម្សាន្តដល់ថ្ងៃអាទិត្យ ហើយភូមិ ឃុំ និងតំបន់រមណីយដ្ឋានខ្លះអាចបន្តលេងកម្សាន្តទៅមុខទៀត ពីព្រោះទម្លាប់ប្រជាពលរដ្ឋ គឺលេងមុន ១សប្ដាហ៍ និងក្រោយកន្លះខែថែមទៀត។
លោកនាយករដ្ឋមន្រ្ដីបញ្ជាក់ថា៖ «ខ្ញុំគ្មានបំណងដាក់បម្រាមណាមួយទៅលើការលេងនោះទេ ហើយក៏សូមឱ្យអាជ្ញាធរគ្រប់លំដាប់ថ្នាក់ កុំអនុវត្ដនូវច្បាប់ទាក់ទងនឹងការគ្រប់គ្រងកូវីដ១៩ និងជំងឺឆ្លងដទៃទៀត គឺមិនអនុវត្ដនៅក្នុងដំណាក់កាលនៃពិធីបុណ្យចូលឆ្នាំនេះទេ។ លើកលែងតែមានស្ថានភាពឆ្លងធ្ងន់ធ្ងរ គឺយើងនឹងអាចប្រកាសជូនចំពោះប្រជាពលរដ្ឋរបស់យើងដើម្បីផ្អាកការលេងឬកាត់បន្ថយ ការលេង»។
លោកបន្តថា៖ «អ៊ីចឹងនៅតាមភូមិ ឃុំ នៅតាមតំបន់ទេសចរណ៍នានា នៅតែបន្តដំណើរការធម្មតា។ ពិតមែនតែខ្ញុំព្រះករុណាខ្ញុំនៅតែមានការកង្វល់នៅឡើយ តែខ្ញុំព្រះករុណាខ្ញុំក៏នឹងលើកទឹកចិត្ដផ្ដល់ឱ្យប្រជាពលរដ្ឋរបស់យើងអាចធ្វើដំណើរលេងកម្សាន្តនៅក្នុងក្របខ័ណ្ឌទូទាំងព្រះរាជាណាចក្រកម្ពុជា។ ហើយក៏សូមស្វាគមន៍បងប្អូនខ្មែរដែលរស់នៅឯបរទេសអញ្ជើញមកលេងនៅប្រទេសកម្ពុជាដោយនៅទីនេះមិនតម្រូវនូវការបញ្ជាក់ធ្វើតេស្ដ PCR សម្រាប់រយៈពេល ៧២ ម៉ោងនោះទេ។ ហើយមកដល់ពេលនេះ ក៏មិនមានតម្រូវការណាមួយ ដើម្បីនឹងធ្វើតេស្តនោះដែរ។ ហើយយើងទុកភារកិច្ចទាំងអស់នេះជូនប្រជាពលរដ្ឋរបស់យើង បើមានការមិនស្រួល ត្រូវស្វះស្វែងរកការធ្វើតេស្ត ហើយបើឃើញថាវិជ្ជមានត្រូវព្យាបាលភ្លាម»៕
វីដេអូ៖