ភ្នំពេញៈ លោកនាយករដ្ឋមន្រ្ដី ហ៊ុន សែន បានអំពាវនាវដល់ប្រជាពលរដ្ឋគ្រប់គ្នាគោរពច្បាប់ចរាចរណ៍ពេលធ្វើដំណើរក្នុងពេលទៅលេងកម្សាន្តនាឱកាសចូលឆ្នាំប្រពៃណីជាតិខ្មែរនេះ ដើម្បីកុំឱ្យការសប្បាយក្លាយទៅជាទុក្ខ ពីព្រោះប៉ុន្មានថ្ងៃកន្លងទៅនេះ ជំងឺកូវីដ១៩ មិនបណ្ដាលឱ្យមានអ្នកស្លាប់ទេ ប៉ុន្ដែគ្រោះថ្នាក់ចរាចរណ៍បណ្ដាលឱ្យមានអ្នកស្លាប់ជារៀងរាល់ថ្ងៃ។
លោកនាយករដ្ឋមន្រ្ដី ហ៊ុន សែន បានណែនាំបែបនេះ ក្នុងពេលលោក និងភរិយា បានអញ្ជើញជាអធិបតីក្នុងពិធីអភិសេករូបសំណាក «ព្រះថោងនាងនាគ» នៅខេត្តព្រះសីហនុ កាលពីនៅព្រឹក ថ្ងៃទី១៦ ខែមេសា ឆ្នាំ ២០២២ ដែលជាថ្ងៃទី៣ នៃពិធីបុណ្យចូលឆ្នាំថ្មី ប្រពៃណីជាតិខ្មែរ។
លោកនាយករដ្ឋមន្រ្ដីថ្លែងថា៖ «ចំណុចទី៣ នេះ ដែលខ្ញុំព្រះករុណា ខ្ញុំសូមអំពាវនាវ គឺសូមគោរពច្បាប់ចរាចរណ៍គ្រប់ៗគ្នា កុំឱ្យការសប្បាយក្លាយទៅជាទុក្ខ ដែលក្នុងប៉ុន្មានថ្ងៃកន្លងទៅនេះ ជំងឺកូវីដ១៩ មិនបណ្ដាលឱ្យមានអ្នកស្លាប់ទេ កូវីដ១៩ មានឆ្លងក្រោម ២០ ករណី ប៉ុន្ដែអ្នករងគ្រោះដោយសារគ្រោះថ្នាក់ចរាចរណ៍មានស្លាប់រាល់ថ្ងៃនឹងរបួសរាល់ថ្ងៃ នោះហើយជាចំណុចដែលយើងត្រូវយកចិត្ដទុកដាក់ទាំងអស់គ្នា»។
លោកនាយករដ្ឋមន្រ្ដីក៏បានណែនាំដល់អាជ្ញាធរគ្រប់លំដាប់ថ្នាក់ ត្រូវបន្តខិតខំថែរក្សាសន្តិសុខ សណ្ដាប់ធ្នាប់សង្គម ដើម្បីភាពសុខសាន្តរបស់ប្រជាជន ដែលនៅគ្រប់ទីកន្លែងទាំងអស់ សុទ្ធតែមានការរៀបចំកម្លាំង។
លោកថ្លែងថា៖ «ខ្ញុំក៏សូមយកឱកាសនេះថ្លែងនូវការកោតសរសើរចំពោះអាជ្ញាធរគ្រប់លំដាប់ថ្នាក់នៅគ្រប់ទីកន្លែងនៅទូទាំងព្រះរាជាណាចក្រកម្ពុជាក៏ដូចជាកងកម្លាំងប្រដាប់អាវុធគ្រប់ប្រភេទដែលបានចូលរួមរក្សាសន្តិសុខសណ្ដាប់ធ្នាប់សង្គម ធ្វើឱ្យប្រជាពលរដ្ឋធ្វើដំណើរទាំងយប់ទាំងថ្ងៃគ្មានការភ័យខ្លាចពីចម្បាំងនិងភ័យខ្លាចពីសត្រូវយាយី ចោរលួចចោរប្លន់ជាដើម»។
លោកបន្តថា៖ «ពីព្រោះតាមការយល់ដឹងរបស់ខ្ញុំ មិនមែនត្រឹមតែថ្ងៃនេះទេ គឺថ្ងៃស្អែក ថ្ងៃខានស្អែក ឬប៉ុន្មានថ្ងៃក្រោយទៀត ចំហាយនៃការចូលឆ្នាំនេះ នៅតែបន្តនៅតាមភូមិ ឃុំ និងនៅតាមទីកន្លែងនានា ដែលទាក់ទាញប្រជាពលរដ្ឋ ពីកន្លែងមួយទៅកាន់កន្លែងមួយធ្វើដំណើរទៅកម្សាន្ត»៕