.jpg)
សាកសពនារីរងគ្រោះដែលគេប្រទះឃើញស្លាប់នៅក្នុងទឹកអូរកាលពីថ្ងៃទី១៦ មេសា ។ រូបថត ហ្វេសប៊ុក
ឧត្តរមានជ័យៈនគរបាលព្រហ្មទណ្ឌខេត្តឧត្តរមានជ័យនៅថ្ងៃទី១៧មេសាកំពុងបន្តស្រាវជ្រាវករណីរំលោភសម្លាប់នារី អាយុ ១៧ឆ្នាំម្នាក់ បន្ទាប់ប្រទះឃើញស្លាប់ទាំងអាក្រាតកាយនៅក្នុងទឹកអូរមួយ ក្នុងភូមិសាស្ត្រ សង្កាត់អូរស្មាច់ ក្រុងសំរោង ខេត្តឧត្តរមានជ័យ កាលពីថ្ងៃទី ១៦ មេសា។
លោក អ៊ុច ប៊ុនអ៊ុយ នាយនគរបាលប៉ុស្តិ៍សង្កាត់អូរស្មាច់ឱ្យដឹងនៅថ្ងៃទី១៧មេសា ថា ការស្លាប់របស់នារីរងគ្រោះឈ្មោះឡ.គ.ឡ អាយុ១៧ឆ្នាំ សមត្ថកិច្ចជំនាញបានធ្វើកោសល្យវិច័យបង្ហាញថាជាករណីរំលោភសម្លាប់ហើយសមត្ថកិច្ចកំពុងបើកការស៊ើបអង្កេតលើករណីនេះ។នារីរងគ្រោះរស់នៅសង្កាត់អូរស្មាច់ ក្រុងសំរោង ខេត្ត ឧត្តរមានជ័យ។
លោកថ្លែងថា៖«រឿងនេះទាំងនគរបាលព្រហ្មទណ្ឌខេត្ត ទាំងនគរបាលក្រុងសំរោងនិងកម្លាំងនគរបាលប៉ុស្តិ៍ខ្ញុំកំពុងដុតដៃដុតជើងខ្លាំងណាស់។នៅថ្ងៃនេះ(ថ្ងៃទី១៧ មេសា)នគរបាលជំនាញកំពុងកោះហៅសាក្សីសាកសួរដើម្បីប្រមូលព័ត៌មាន»។
លោកបានរៀបរាប់តាមម្តាយនារីរងគ្រោះថា នារីរងគ្រោះបានឈប់រៀនយូរឆ្នាំមកហើយ ហើយមានរបរជាកម្មករសំណង់។នៅយប់មុនពេលកើតហេតុថ្ងៃទី ១៥ មេសា នៅក្នុងភូមិដែលនាងរស់នៅមានពិធីរាំធុងបាសក្នុងថ្ងៃទី២ នៃបុណ្យចូលឆ្នាំថ្មីប្រពៃណីខ្មែរ ហើយនារីរងគ្រោះនិងមិត្តភក្តិរបស់នាងបាននាំគ្នាទៅរាំលេងកម្សាន្តដែរ។ ប៉ុន្តែក្រោយពីចប់ពិធីរាំនោះ មិត្តៗរបស់ជនរងគ្រោះមិនបានឃើញនាងត្រឡប់ទៅផ្ទះវិញជាមួយពួកគេទេ ហើយនៅយប់នោះម្តាយរបស់នាងក៏បាត់កូនមិនឃើញត្រឡប់ទៅផ្ទះទៀតវិញដែរ។
លោកបន្តថា លុះរហូតដល់វេលាម៉ោងជិត៣ រសៀលថ្ងៃទី១៦ មេសា មានប្រជាពលរដ្ឋម្នាក់បានប្រទះឃើញសាកសពរបស់នាងដេកស្លាប់ទាំងអាក្រាតកាយនៅក្នុងទឹកអូររាក់ៗស្ថិតនៅផ្លូវលំលេខ១០ដែលជាផ្លូវទាល់ក្នុងភូមិចម្ការចេក សង្កាត់អូរស្មាច់ ក្រុងសំរោង ហើយក៏បានរាយការណ៍ប្រាប់នគរបាលប៉ុស្តិ៍សង្កាត់អូរស្មាច់។ ក្រោយទទួលបានដំណឹងនេះលោកបានរាយការណ៍បន្តទៅលោក ហម ភិរម្យ អធិការនគរបាលក្រុងសំរោងខណៈលោកដែលជានាយនគរបាលប៉ុស្តិ៍សង្កាត់អូរស្មាច់ក៏ជូនដំណឹងនេះទៅសាច់ញាតិនារីរងគ្រោះផងដែរ។
លោកបន្តទៀតថា នៅថ្ងៃទី១៦មេសាដដែលនោះ នគរបាលបច្ចេកទេសវិទ្យាសាស្ត្រកោសល្យវិច័យខេត្តឧត្តរមានជ័យរួមជាមួយគ្រូពេទ្យបានចុះដល់ទីតាំងជនរងគ្រោះស្លាប់និងបានធ្វើកោសល្យវិច័យលើសាកសព។ជាលទ្ធផលបង្ហាញថានារីរងគ្រោះត្រូវបានគេចាប់រំលោភហើយវាយសម្លាប់នឹងវត្ថុរឹង។
លោកថា៖«បើតាមខ្ញុំចូលរួមសហការពិនិត្យសាកសពឃើញមានស្នាមឆ្នូតក្រចកមុតលើខ្លួនប្រហែល១០ក្រចកហើយនៅលើត្របកភ្នែកខាងឆ្វេងរបកស្បែកនិងប៉ោងក្បាលខាងក្រោយ។តាមពេទ្យគាត់ពិនិត្យឃើញថានាងត្រូវបានគេរំលោភ»។
លោកបញ្ជាក់ថា ក្រោយពីសមត្ថកិច្ចជំនាញនិងគ្រូពេទ្យពិនិត្យ និងធ្វើកោសល្យវិច័យចប់សព្វគ្រប់មក សមត្ថកិច្ចបានប្រគល់សាកសពនារីរងគ្រោះឱ្យសាច់ញាតិយកទៅធ្វើបុណ្យតាមប្រពៃណី។ចំណែកឯសមត្ថកិច្ចក៏កំពុងបន្តប្រមូលព័ត៌មានដោយអញ្ជើញសាក្សីពាក់ព័ន្ធមកបំភ្លឺនៅប៉ុស្តិ៍នគរបាលសង្កាត់អូរស្មាច់ដើម្បីបានជាមូលដ្ឋានក្នុងការស្រាវជ្រាវបន្តទៀត៕
វីដេអូ៖
