កណ្តាលៈ មនុស្ស២នាក់លង់ទឹកស្លាប់ ពេលចុះជិះទូកលេង ហើយទូកបានលិច នៅចំណុចស្រះទឹកមួយកន្លែង ស្ថិតនៅភូមិដុល ឃុំសន្លុង ស្រុកខ្សាច់កណ្តាល ខេត្តកណ្តាល កាលពីវេលាម៉ោង១៥ និង៣០នាទី ថ្ងៃទី១៦ ខែមេសា ឆ្នាំ២០២២។
លោកវរសេនីយ៍ទោ អ៊ុន យ៉ុង អធិការរងទទួលការងារនគរបាលយុត្តិធម៌ នៃអធិការដ្ឋាននគរបាលស្រុកខ្សាច់កណ្តាល ប្រាប់ភ្នំពេញប៉ុស្តិ៍នៅថ្ងៃទី១៧ មេសា ថា នៅថ្ងៃទី១៦ មេសា វេលាម៉ោង១២ថ្ងៃត្រង់ ជនរងគ្រោះទាំង២នាក់ រួមជាមួយឪពុកម្ដាយ បានជិះម៉ូតូចេញពីភ្នំពេញទៅលេងផ្ទះសាច់ញាតិ ឈ្មោះវ៉ៃ វុទ្ធី ភេទប្រុស នៅភូមិឃុំ ព្រែកតាមាក់ ក្នុងថ្ងៃចូលឆ្នាំទី៣។
លោកបន្តថា លុះដល់វេលាម៉ោង១៣ និង២០នាទី ថ្ងៃដដែល ជនរងគ្រោះព្រមទាំងបងប្អូនជាជីដូនមួយជាច្រើនាក់ បានជិះម៉ូតូចេញពីផ្ទះឈ្មោះវ៉ៃ វុទ្ធី ទៅលេងនៅក្រុមហ៊ុន 7NG ក្នុងភូមិព្រៃចាស់ ឃុំវិហារសួគ៌ រហូតដល់វេលាម៉ោង១៤ និង៣០នាទី ទើបជនរងគ្រោះ និងបងប្អូនទាំងអស់បានបន្តទៅលេងផ្ទះឪពុកធំ ដែលជាអ្នកយាមចម្ការស្វាយមួយកន្លែង ស្ថិតនៅភូមិដុល ឃុំសន្លុង ស្រុកខ្សាច់កណ្តាល ខេត្តកណ្តាល។ លោកអធិការរងបញ្ជាក់ថា ពេលទៅដល់ ជនរងគ្រោះ និងបងប្អូនទាំងអស់ បានជិះទូកឈើលេងក្នុងទឹកស្រះក្នុងចម្ការស្វាយនោះ រហូតដល់វេលាម៉ោង១៥ និង៣០នាទី ទូកក៏លិចតែម្តង។
លោកថ្លែងថា៖«ការជិះទូកលេងរបស់ពួកគាត់ហ្នឹងមិនមែនតែ២ឬ៣នាក់ទេ គឺគ្នាគាត់៦-៧នាក់ឯណោះ ហើយពេលកំពុងជិះហ្នឹងគាត់គ្រលែងទូកហ្នឹងទៅ។ គ្រលែងចុះគ្រលែងឡើងទូកវាលិច ដល់ពេលលិច អ្នកដែលចេះហែល គេហែលរួចមកច្រាំង ហើយ២នាក់ហ្នឹងគាត់អត់ចេះហែលបានស្លាប់ក្នុងទឹកហ្នឹងទៅ»។
លោកអ៊ុន យ៉ុង ប្រាប់ទៀតថា អ្នកផ្សេងទៀតដែលចេះហែលទឹក បានហែលទឹកមកច្រាំង ហើយស្រែកឆោឡោឱ្យគេជួយ និងរាយការណ៍ជូនសមត្ថកិច្ចនគរបាលប៉ុស្តិ៍សន្លុង និងបានជួលអួនឱ្យគេអូសជួយរាវរកជនរងគ្រោះក្នុងស្រះទឹកនោះ រហូតដល់ម៉ោង១៩ និង៣០នាទី ទើបរកសាកសពជនរងគ្រោះទាំង២នាក់ឃើញ។ បន្ទាប់មកសមត្ថកិច្ចជំនាញស្រុក សហការជាមួយកម្លាំងប៉ុស្តិ៍ ក្រុមប្រឹក្សាឃុំ មេភូមិ គ្រូពេទ្យ និងក្រុមគ្រួសារសពធ្វើការពិនិត្យសាកសពយ៉ាងហ្មត់ចត់ ឃើញថា សាកសពមានស្នាម ពោះប៉ោង មានទឹកហូរចេញតាមមាត់និងច្រមុះ ផ្នែកក្បាល ដងខ្លួន អវយវៈពុំមានស្លាកស្នាមអ្វីគួរឱ្យកត់សម្គាល់នោះទេ។
លោកបញ្ជាក់ថា៖«តាមជំនាញ និងយោបល់គ្រូពេទ្យ ជនរងគ្រោះស្លាប់ដោយសារលង់ទឹក និងបានប្រគល់សពជូនគ្រួសារធ្វើបុណ្យតាមប្រពៃណី»។
របាយការណ៍របស់សមត្ថកិច្ចនគរបាលស្រុកខ្សាច់កណ្តាល បានឱ្យដឹងថា ជនរងគ្រោះទាំង២នាក់ មានឈ្មោះវ៉ៃ សុវណ្ណ ភេទប្រុស អាយុ១៩ឆ្នាំ ជនជាតិខ្មែរ មុខរបរនិស្សិត មានទីលំនៅផ្ទះ១៦១ ក្រុម៧ ផ្លូវលំ សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ និងឈ្មោះវ៉ៃ សុលាភ ភេទប្រុស អាយុ១២ឆ្នាំ ជនជាតិខ្មែរ មុខរបរសិស្ស មានទីលំនៅផ្ទះ១៦១ ក្រុម៧ ផ្លូវលំ សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ អ្នកទាំង២ត្រូវជាបងប្អូនបង្កើតនឹងគ្នា។ ឪពុកឈ្មោះ វ៉ៃ សាវី អាយុ៥០ឆ្នាំ ជនជាតិខ្មែរ មុខរបរ ជាងដែក និង ម្តាយឈ្មោះ ហាក់ គឹមស្រ៊ាង អាយុ៤៩ឆ្នាំ ជនជាតិខ្មែរ មុខរបរមេផ្ទះ៕