ភ្នំពេញៈ មន្ត្រីជាន់ខ្ពស់ក្រសួងសុខាភិបាលបានឱ្យដឹងថា ក្នុងពិធីបុណ្យចូលឆ្នាំថ្មី ប្រពៃណីជាតិខ្មែររយៈពេល ៣ ថ្ងៃនេះមានមនុស្សក្មេងចាស់ ប្រុសស្រីជាច្រើន បាននាំគ្នាទៅចាក់វ៉ាក់សាំងកូវីដ ១៩ ជាបន្តបន្ទាប់តាមទីតាំងដែលអាជ្ញាធរបានរៀបចំ សម្រាប់អ្នកដើរកម្សាន្ត តាមវត្តអារាម និងរមណីយដ្ឋាននានា។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខណ្ឌទូទាំងប្រទេស បានប្រាប់ភ្នំពេញប៉ុស្តិ៍នៅថ្ងៃទី ១៧ ខែមេសា ថា ដំណើរការនៃការចាក់វ៉ាក់សាំងកូវីដ ១៩ ក្នុងពិធីបុណ្យចូលឆ្នាំខ្មែរ មានស្ថានភាពធម្មតា ដោយមានអ្នកមកចាក់វ៉ាក់សាំងជាបន្តបន្ទាប់។
លោកស្រីបានឱ្យដឹងថា៖ «ការចាក់វ៉ាក់សាំងមានស្ថានភាពធម្មតាទេ មានអ្នកចាក់ប្រុសស្រីចាស់ក្មេងមកចាក់បន្តបន្ទាប់ដែរ សម្រាប់អ្នកដែលមិនទាន់បានចាក់ ឬត្រូវចាក់ដូសជំរុញ (ទី ៣ និងទី ៤)។ យើងនឹងបន្តការងារនេះទៀត ដើម្បីពង្រឹងភាពស៊ាំបុគ្គល និងសហគមន៍»។
ទាក់ទងនឹងការចាក់វ៉ាក់សាំងកូវីដ-១៩នេះកាលពីថ្ងៃទី ១៦ ខែមេសា លោកនាយករដ្ឋមន្ត្រី ហ៊ុន សែន បានបន្តធ្វើការអំពាវនាវសុំឱ្យប្រជាពលរដ្ឋទៅទទួលការចាក់វ៉ាក់សាំងដូសជំរុញជាដូសទី ៣។ លោកថ្លែងថា៖ «មកដល់ពេលនេះ ដូសទី ៣ យើងទើបតែចាក់បានចំនួនជាង ៨ លាននាក់ ដូច្នេះនៅមនុស្សប្រមាណជា ៦ លាននាក់ទៀត មិនទាន់បានចាក់។ រីឯដូសទី ៤ គឺចាក់បានតែជាង ១ លាននាក់ប៉ុណ្ណោះ។ ដូចនេះសុំប្រជាពលរដ្ឋរបស់យើង កុំគិតថា ២ ម្ជុលដែលជាដូសមូលដ្ឋាននឹងគ្រប់គ្រាន់ឱ្យសោះ ត្រូវស្វះស្វែងរកដូសទី ៣ ហើយអ្នកដែលមានដូសទី ៣ ហើយត្រូវស្វះស្វែងរកដូសទី ៤»។
លោក ហ៊ុន សែនបញ្ជាក់ថា កម្ពុជាមានលទ្ធភាពផ្គត់ផ្គង់វ៉ាក់សាំងជូនប្រជាពលរដ្ឋរបស់ខ្លួនដោយឥតគិតថ្លៃ និងនៅគ្រប់ទីកន្លែងទាំងអស់។
លោកស្រី ឱ វណ្ណឌីន បានសរសេរលើបណ្តាញធ្វីធើរបស់លោកស្រីកាលពីថ្ងៃទី ១៤ ខែមេសាដោយបានប្រសិទ្ធពរជ័យ សិរីមង្គល វិបុលសុខ មហាប្រសើរ និងចម្រើនរុងរឿងជានិរន្តរ៍ក្នុងឱកាសបុណ្យចូលឆ្នាំខ្មែរ ឆ្នាំ ២០២២ នេះ ប្រកបដោយសុវត្ថិភាព។
លោកស្រី បញ្ជាក់ថា៖ «សង្ឃឹមថា មេរោគកូវីដ ១៩ នឹងមិនធ្វើដំណើរជាមួយអ្នកត្រឡប់ទៅផ្ទះវិញទេ។ សូមថែទាំចាស់ជរា និងមនុស្សជាទីស្រឡាញ់របស់អ្នក!»។
លោកស្រី លី អៃឡែន តំណាងអង្គការសុខភាពពិភពលោកប្រចាំកម្ពុជាក៏បានជូនពរប្រជាពលរដ្ឋកម្ពុជាក្នុងពិធីបុណ្យចូលឆ្នាំខ្មែរនេះផងដែរ ដោយលោកស្រីលើកឡើងថា បន្ទាប់ពីមានជំងឺរាតត្បាតជាសកលអស់រយៈពេលជាងពីរឆ្នាំកន្លងមកនេះទាំងអស់គ្នាដឹងយ៉ាងច្បាស់អំពីវិធានការរក្សាសុវត្ថិភាពដល់គ្នាទៅវិញទៅមក។
លោកស្រីបានឱ្យដឹងថា កិច្ចខិតខំប្រឹងប្រែងរបស់អ្នកទាំងអស់គ្នានៅក្នុងការទទួលបានការចាក់វ៉ាក់សាំងពេញលេញ និងការអនុវត្តវិធានការ ៣ កុំ ៣ ការពារ ដែលជាវិធានការការពារជំងឺកូវីដ ១៩ របស់ប្រទេសកម្ពុជាគឺពិតជាមានប្រសិទ្ធភាពហើយនេះគឺជាមូលហេតុដ៏ចម្បង ដែលគ្រប់គ្នាអាចប្រារព្ធពិធីបុណ្យចូលឆ្នាំខ្មែរក្នុងឆ្នាំនេះបាន។ ជាការពិតណាស់ ការរាតត្បាតជាសកលនៃជំងឺនេះ គឺមិនទាន់ចប់នៅឡើយនោះទេ ហើយវីរុសនេះនៅតែបន្តឆ្លង។ លោកស្រី លី អៃឡែន បានបញ្ជាក់ថា៖ «សមិទ្ធផលនៃការចាក់វ៉ាក់សាំងប្រឆាំងជំងឺកូវីដ ១៩ នេះ គឺពិតជាគួរឱ្យកត់សម្គាល់ និងគួរឱ្យកោតសរសើរបំផុត។ ឥឡូវនេះ ការចាក់ដូសជំរុញ គឺពិតជាពេលវេលាដ៏ត្រឹមត្រូវ និងកាន់តែមានសារៈសំខាន់សម្រាប់សមាជិកគ្រួសារដែលមានវ័យចំណាស់ និងអ្នកដែលមានជំងឺប្រចាំកាយ»។
យោងតាមរបាយការណ៍របស់ក្រសួងសុខាភិបាលឱ្យដឹងថា កំណើនអត្រាចាក់វ៉ាក់សាំងកូវីដ ១៩ នៅកម្ពុជា គិតត្រឹមថ្ងៃទី ១៦ ខែមេសា អត្រាចាក់វ៉ាក់សាំងធៀបនឹងចំនួនប្រជាជនសរុប ១៦ លាន នាក់ បានចំនួន ៩២,៨៤% ហើយ ដែលក្នុងនោះប្រជាជនអាយុពី ១៨ ឆ្នាំឡើង មាន ១០២,៧៤% ធៀបជាមួយចំនួនប្រជាជនគោលដៅ ១០ លាននាក់។
ចំពោះកុមារ-យុវវ័យអាយុពី ១២ ឆ្នាំ ទៅក្រោម ១៨ ឆ្នាំ មាន ១០០,១៩% ធៀបជាមួយចំនួនប្រជាជនគោលដៅ ១ ៨២៧ ៣៤៨ នាក់។ កុមារអាយុពី ៦ ឆ្នាំ ដល់ក្រោម ១២ ឆ្នាំ មាន ១០៧,៨៩% ធៀបជាមួយនឹងប្រជាជនគោលដៅ ១ ៨៩៧ ៣៨២ នាក់។ ចំណែកអត្រាចាក់វ៉ាក់សាំងលើកុមារអាយុ ៥ ឆ្នាំ មាន ១២៤,៧៦% ធៀបជាមួយនឹងប្រជាជនគោលដៅ ៣០៤ ៣១៧ នាក់ និងកុមារអាយុ ៣ ឆ្នាំ ដល់ ក្រោម ៥ ឆ្នាំ មាន ៥២,៧៤% ធៀបជាមួយនឹងប្រជាជនគោលដៅ ៦១០ ៧៣០ នាក់៕