ភ្នំពេញៈ នាយកដ្ឋាននគរបាលចរាចរណ៍ និងសណ្តាប់សាធារណៈនៃអគ្គស្នងការដ្ឋាននគរបាលជាតិបានឱ្យដឹងថា គ្រោះថ្នាក់ចរាចរណ៍កើតឡើងចំនួន ៤៧ លើកទូទាំងប្រទេសក្នុងរយៈពេល ៣ ថ្ងៃនៃពិបុណ្យចូលឆ្នាំថ្មីប្រពៃណីជាតិខ្មែរឆ្នាំ ២០២២ នេះបណ្តាលឱ្យមនុស្សជិត ៣០ នាក់បានស្លាប់ និងមានអ្នករងរបួសធ្ងន់-ស្រាលជិត ១០០ នាក់ផងដែរ។ របាយការណ៍របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈក្នុងរយៈពេល ៣ ថ្ងៃនៃពិធីបុណ្យចូលឆ្នាំខ្មែរចាប់ពីថ្ងៃទី ១៤ ដល់ទី ១៦ ខែមេសា បានលើកឡើងថា យ៉ាងហោចណាស់មានមនុស្សចំនួន ២៧ នាក់ត្រូវបានស្លាប់ និងចំនួន ៨០ នាក់ផ្សេងទៀតត្រូវបានរងរបួសធ្ងន់ និងស្រាលដោយគ្រោះថ្នាក់ចរាចរណ៍ ក្នុងពិធីបុណ្យនេះ។
នាយកដ្ឋាននគរបាលចរាចរណ៍ និងសណ្តាប់សាធារណៈបានឱ្យដឹងថា ៖ «មូលហេតុនៃគ្រោះថ្នាក់ចរាចរណ៍នេះបណ្តាលមកពីការបើកបរហួសល្បឿន, ការប្រជែងក្នុងស្ថានភាពគ្រោះថ្នាក់ និងបើកបរក្នុងស្ថានភាពស្រវឹង ជាដើម»។
ប្រភពដដែលបានបញ្ជាក់ថា ក្នុងថ្ងៃទី ១ នៃពិធីបុណ្យចូលឆ្នាំត្រូវនឹងថ្ងៃទី ១៤ ខែមេសា ២០២២ គ្រោះថ្នាក់ចរាចរណ៍កើតឡើងចំនួន ៨ លើកបណ្តាលឱ្យមនុស្សស្លាប់ចំនួន ៣ នាក់ និងរងរបួសធ្ងន់ចំនួន ១២ នាក់ និង របួសស្រាលចំនួន ៣ នាក់។ ចំណែកថ្ងៃទី ២ ដែលត្រូវនឹងថ្ងៃទី ១៥ ខែមេសា គ្រោះថ្នាក់ចរាចរណ៍កើតឡើងចំនួន ២៥ លើក បណ្តាលឱ្យមនុស្សស្លាប់ចំនួន ១៦ នាក់ និងរងរបួសធ្ងន់ ចំនួន ២៧ នាក់ និងរបួសស្រាល ចំនួន ៧ នាក់។
រីឯពិធីបុណ្យចូលឆ្នាំថ្ងៃទី ៣ ដែលត្រូវនឹងថ្ងៃទី ១៦ ខែមេសា គ្រោះថ្នាក់ចរាចរណ៍កើតឡើងចំនួន ១៤ លើក ដែលបានបណ្តាលឱ្យមនុស្សចំនួន ៨ នាក់ស្លាប់ និងមានអ្នករងរបួសធ្ងន់ចំនួន ២០ នាក់ និងរបួសស្រាល ១១ នាក់ផងដែរ។
នាយកដ្ឋាននគរបាលចរាចរណ៍ និងសណ្តាប់សាធារណៈបានបន្ថែមទៀតថា ករណីគ្រោះថ្នាក់ចរាចរណ៍ទាំងនេះបានកើតឡើងស្ទើរតែគ្រប់រាជធានី-ខេត្ត ក្នុងនោះមានដូចជា រាជធានីភ្នំពេញ ខេត្តបាត់ដំបង បន្ទាយមានជ័យ តាកែវ កណ្តាល ស្វាយរៀង កំពង់ចាម ពោធិ៍សាត់ ព្រះសីហនុ និងបណ្តាខេត្តមួយចំនួនទៀត ជាដើម។
នាពិធីអភិសេករូបសំណាក «ព្រះថោងនាងនាគ» នៅខេត្តព្រះសីហនុកាលពីថ្ងៃទី ១៦ ខែមេសា ដែលជាថ្ងៃទី ៣ នៃពិធីបុណ្យចូលឆ្នាំថ្មីប្រពៃណីជាតិខ្មែរ លោកនាយករដ្ឋមន្ដ្រី ហ៊ុន សែន បានអំពាវនាវដល់ប្រជាពលរដ្ឋគ្រប់គ្នាគោរពច្បាប់ចរាចរណ៍ពេលធ្វើដំណើរក្នុងពេលទៅលេងកម្សាន្តនាឱកាសចូលឆ្នាំប្រពៃណីជាតិខ្មែរនេះ ដើម្បីកុំឱ្យការសប្បាយក្លាយទៅជាទុក្ខ ពីព្រោះប៉ុន្មានថ្ងៃកន្លងទៅនេះ ជំងឺកូវីដ ១៩ មិនបណ្ដាលឱ្យមានអ្នកស្លាប់ទេ ប៉ុន្ដែគ្រោះថ្នាក់ចរាចរណ៍បណ្ដាលឱ្យមានអ្នកស្លាប់ជារៀងរាល់ថ្ងៃ។
លោកនាយករដ្ឋមន្ដ្រី ហ៊ុន សែន បានណែនាំបែបនេះក្នុងពេលលោក និងភរិយា បានអញ្ជើញជាអធិបតីនៅក្នុងពិធីអភិសេករូបសំណាក «ព្រះថោងនាងនាគ» នៅខេត្តព្រះសីហនុ កាលពីព្រឹក ថ្ងៃទី ១៦ ខែមេសា ឆ្នាំ ២០២២ ដែលជាថ្ងៃទី ៣ នៃពិធីបុណ្យចូលឆ្នាំថ្មីប្រពៃណីជាតិខ្មែរ។
លោកបានថ្លែងថា៖ «ខ្ញុំសូមអំពាវនាវ គឺសូមគោរពច្បាប់ចរាចរណ៍គ្រប់ៗគ្នាកុំឱ្យការសប្បាយក្លាយទៅជាទុក្ខ ដែលក្នុងប៉ុន្មានថ្ងៃកន្លងទៅនេះ ជំងឺកូវីដ ១៩ មិនបណ្ដាលឱ្យមានអ្នកស្លាប់ទេ កូវីដ ១៩ មានឆ្លងក្រោម ២០ ករណី ប៉ុន្ដែអ្នករងគ្រោះដោយសារគ្រោះថ្នាក់ចរាចរណ៍មានស្លាប់រាល់ថ្ងៃ និងរបួសរាល់ថ្ងៃ នោះហើយជាចំណុចដែលយើងត្រូវយកចិត្ដទុកដាក់ទាំងអស់គ្នា»។
រាជរដ្ឋាភិបាលកម្ពុជាបានសម្រេចផ្អាកការប្រារព្ធពិធីបុណ្យចូលឆ្នាំប្រពៃណីខ្មែរអស់រយៈពេល ២ ឆ្នាំមកហើយ គឺឆ្នាំ ២០២០ និង ២០២១ ដោយសារមេរោគកូវីដ ១៩ បានរីករាលដាល និងមានការឆ្លង និងស្លាប់ច្រើនផងដែរ ប៉ុន្តែសម្រាប់ឆ្នាំ ២០២២ នេះ កម្ពុជាបានបើកឱ្យប្រារព្ធពិធីនេះ និងមានការដើរកម្សាន្តផងដែរ។ មុនពិធីបុណ្យចូលឆ្នាំមកដល់ លោក ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានអំពាវនាវដល់អ្នកប្រើប្រាស់ផ្លូវទាំងអស់ និងក្រុមហ៊ុនដឹកជញ្ជូនទាំងអស់ត្រូវយកចិត្តទុកដាក់បើកបរដោយការទទួលខុសត្រូវ និងតម្កល់ឆន្ទៈគោរពអនុវត្តច្បាប់ឱ្យបានខ្ជាប់ខ្ជួន។
លោកបានលើកឡើងឱ្យដឹងដែរថា ករណីគ្រោះថ្នាក់ចរាចរណ៍ អ្នកស្លាប់ និងរបួសនៅតែមានការកើនឡើង ដែលមូលហេតុចម្បងបង្កឱ្យមានគ្រោះថ្នាក់គឺការបើកបរលើសល្បឿនកំណត់ មិនគោរពសិទ្ធិអាទិភាព ការវ៉ាជែង មិនប្រកាន់ស្តាំ បើកបរក្រោមឥទ្ធិពលគ្រឿងស្រវឹង មិនពាក់មួកសុវត្ថិភាព មិនពាក់ខ្សែក្រវាត់សុវត្ថិភាព និងខ្វះការប្រុងប្រយ័ត្ន ឬខ្វះការយោគយល់អធ្យាស្រ័យគ្នាផងដែរ៕
វីដេអូ៖