ភ្នំពេញៈ ក្នុងរយៈពេល ១៤ ថ្ងៃ គិតចាប់ពីថ្ងៃទី ១ រហូតដល់ថ្ងៃទី ១៤ ខែមេសា ឆ្នាំ ២០២២ សមត្ថកិច្ចនគរបាលចរាចរណ៍ផ្លូវគោកបានផាកពិន័យយានយន្តល្មើសរុបចំនួនជាង ៧ ពាន់គ្រឿង ក្នុងនោះមានម៉ូតូចំនួន ៥ ៦៦៣ គ្រឿង នៅទូទាំងប្រទេស។ នេះបើតាមរបាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ។
យោងតាមរបាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈនៅថ្ងៃទី ១៤ ខែមេសា បានឱ្យដឹងថា ក្នុងរយៈពេល ១៤ ថ្ងៃនៃខែមេសា សមត្ថកិច្ចនគរបាលចរាចរណ៍ផ្លូវគោកបានផាកពិន័យយានយន្តចំនួនជាង ៧ ពាន់គ្រឿង ក្នុងនោះមានម៉ូតូចំនួន ៥ ៦៦៣ គ្រឿង។ របាយការណ៍ដដែលបានឱ្យដឹងទៀតថា រយៈពេលនេះការអនុវត្តតាមអនុក្រឹត្យ ការផាកពិន័យយានយន្តល្មើសបានដំណើរការទៅយ៉ាងល្អប្រសើរដោយទទួលបានការគាំទ្រជាពិសេសអ្នកប្រើប្រាស់ផ្លូវទាំងអស់បានចូលរួមគោរពច្បាប់ចរាចរណ៍យ៉ាងល្អប្រសើរ។
របាយការណ៍សរសេរថា «ក្នុងរយៈពេល ១៤ ថ្ងៃ (ថ្ងៃទី ១-១៤ ខែមេសា) ការរឹតបន្ដឹងការអនុវត្តច្បាប់ស្ដីពីចរាចរណ៍ផ្លូវគោក យានយន្តចូលគោលដៅមានចំនួន ៤៨ ៥០៥ គ្រឿង ក្នុងនោះរកឃើញយានយន្តល្មើសសរុបចំនួន ៧ ០១៤ គ្រឿង ម៉ូតូមានចំនួន ៥ ៦៦៣ គ្រឿង ត្រូវបានផាកពិន័យតាមអនុក្រឹត្យលេខ ៣៩ អនក្រ.បក នៅទូទាំងប្រទេស»។
តាមរយៈរបាយការណ៍ដដែលបញ្ជាក់ថា ដោយឡែកនៅថ្ងៃទី ១៤ ខែមេសា នៅតាមគោលដៅសរុប ៨៩ មានយានយន្តចូលចំនួន ១ ០១៩ គ្រឿងក្នុងនោះមានម៉ូតូ ៧៥៤ គ្រឿងហើយបានរកឃើញយានយន្តល្មើសសរុបចំនួន ១៥៥ គ្រឿង ក្នុងនោះមានម៉ូតូចំនួន ១៤៤ គ្រឿង ត្រូវបានផាកពិន័យតាមអនុក្រឹត្យលេខ ៣៩. អនក្រ.បក នៅទូទាំងប្រទេស។
លោក មាស ចាន់ឌី មន្ត្រីអង្គការទ្រទ្រង់សុវត្ថិភាពកម្ពុជាថ្លែងនៅថ្ងៃទី ១៧ ខែមេសាថា ការរឹតបន្តឹងច្បាប់ចរាចរណ៍ផ្លូវគោកជារឿងចាំបាច់ ដើម្បីកាត់បន្ថយគ្រោះថ្នាក់ចរាចរាណ៍ និងឱ្យពលរដ្ឋចូលរួមគោរពច្បាប់ចរាចរណ៍។ លោកថា កាលណាមន្ត្រីនគរបាលចរាចរណ៍រឹតបន្តឹងកាន់តែខ្លាំងនោះនឹងធ្វើឱ្យអ្នកប្រើប្រាស់ផ្លូវ និងអ្នកបើកបរទាំងឡាយកាន់តែមានការចូលរួមគោរពច្បាប់កាន់តែច្រើន។ លោកបន្តថា ជាការកត់សម្គាល់ក្នុងពេលបច្ចុប្បន្ននេះ មនុស្សភាគច្រើនបានយល់ដឹងអំពីច្បាប់ និងមានការគោរពច្បាប់ចរាចរណ៍បានល្អប្រសើរបើប្រៀបធៀបនឹង ៥ ឆ្នាំមុន។
លោកថ្លែងថា៖ «ខ្ញុំគិតថា វាមិនសំខាន់លើចំនួនផាកបានច្រើន បានតិច ឬចំនួនយានយន្តប៉ុន្មានម៉ឺនគ្រឿងអីនោះទេ សំខាន់លើថាតើសណ្តាប់ធ្នាប់កាន់តែល្អប្រសើរឬយ៉ាងណា? សម្រាប់ទស្សនៈរបស់ខ្ញុំ ខ្ញុំឃើញថា អ្នកបើកបរមួយចំនួនធំគឺគាត់យកចិត្តទុកដាក់គោរពច្បាប់ចរាចរណ៍មែនទែន លើកលែងតែមួយចំនួនតូចទេនៅល្មើស»។
លោក មាស ចាន់ឌី បានបញ្ជាក់ផងដែរថា ការផាកពិន័យដែលមានចំនួនទឹកប្រាក់ច្រើនគឺជាមូលហេតុមួយ ដើម្បីឱ្យពលរដ្ឋភ្ញាក់រឭកក្នុងការចូលរួមគោរពច្បាប់ចរាចរណ៍ផងដែរ។
លោកថ្លែងថា៖ «ការផាកពិន័យចំនួនច្រើនដូច្នេះវាអាចប៉ះពាល់ថវិកាដែលអ្នកធ្វើដំណើរមាន ហេតុនេះគាត់ត្រូវតែគោរពច្បាប់ ត្រូវតែខ្លាច ធ្វើម៉េចកុំឱ្យប៉ូលិសផាកបាន ព្រោះបើប៉ូលិសផាកគឺអស់លុយច្រើន ដូច្នេះគាត់ចាំបាច់ ទោះជាចង់ ឬមិនចង់ត្រូវតែបង្ខំចិត្តគោរពច្បាប់ចរាចរណ៍ឱ្យបានច្រើនតាមដែលអាចធ្វើបាន»។
លោក មាស ចាន់ឌី បានលើកឡើងទៀតថា ចំនួនគ្រោះថ្នាក់ចរាចរណ៍មិនមានការកើនឡើងធ្ងន់ធ្ងរពេកទេ បើប្រៀបធៀបចំនួនប្រជាជនជាមួយនឹងចំនួនកំណើនយានយន្ត ធៀបនឹងផ្លូវថ្នល់ដែលកម្ពុជាធ្វើបាន ប៉ុន្តែយ៉ាងណាក៏ដោយ ការងារនេះគឺនៅតែទាមទារឱ្យមានការចូលរួមពីប្រជាពលរដ្ឋជារឿងសំខាន់ថែមទៀត។
លោកថ្លែងថា៖ «ខ្ញុំសូមឱ្យស្ថាប័នដែលពាក់ព័ន្ធចរាចរណ៍ទាំងអស់ខិតខំធ្វើការពិនិត្យឡើងវិញកែលម្អប្រសិទ្ធភាពនៃការរឹតបន្តឹងច្បាប់ប្រសិទ្ធភាពនៃការអប់រំផ្សព្វផ្សាយឡើងវិញឱ្យបានល្អ ព្រោះដើម្បីទាញការចូលរួមរបស់ប្រជាពលរដ្ឋលុះត្រាតែយើងធ្វើឱ្យមានប្រសិទ្ធភាពជាប់ជានិច្ច កុំធ្វើឈប់ ធ្វើឈប់»។
ជុំវិញការរឹតបន្តឹងច្បាប់ចរាចរណ៍ផ្លូវគោកនេះ លោក ឆាយ គឹមខឿន អ្នកនាំពាក្យនៃអគ្គស្នងការដ្ឋាននគរបាលជាតិធ្លាប់បានប្រាប់ភ្នំពេញប៉ុស្តិ៍ថា ការរឹតបន្តឹងច្បាប់ចរាចរណ៍ផ្លូវគោកគឺសមត្ថកិច្ចមិនមានការបន្ធូរបន្ថយឡើយ សូម្បីតែនៅក្នុងអំឡុងពេលនៃពិធីបុណ្យចូលឆ្នាំថ្មីប្រពៃណីជាតិខ្មែរក៏ដោយ៕