.jpg)
ជនសង្ស័យដែលវាយសម្លាប់ជនរងគ្រោះនៅខេត្តកណ្តាលពីថ្ងៃទី ១៥ មេសា។ រូប FB
កណ្តាលៈ នគរបាលស្រុកមុខកំពូលនៅថ្ងៃទី ១៨ មេសា កំពុងបន្តស្វែងរកចាប់ខ្លួនជនសង្ស័យម្នាក់ពាក់ព័ន្ធនឹងការវាយនឹងឈើជ្រុងសម្លាប់យុវជនម្នាក់នៅភូមិអំពិលទឹក ឃុំសំបួរមាស ស្រុកមុខកំពូល ខេត្តកណ្តាល កាលពីថ្ងៃទី ១៥ មេសា។
លោក ឯក លន់ អធិការនគរបាលស្រុកមុខកំពូលឱ្យដឹងនៅថ្ងៃទី ១៨ មេសាថា ជនសង្ស័យ ឈ្មោះ ហ៊ាង ម៉េងហាប់ ភេទប្រុស អាយុ ២២ ឆ្នាំ រីឯជនរងគ្រោះ ឈ្មោះ បូរ រតនា ភេទប្រុស អាយុ ២០ ឆ្នាំ រស់នៅភូមិអន្លង់ស្លែង ឃុំសំបួរមាស ស្រុកមុខកំពូល ខេត្តកណ្តាល។ ករណីនេះសមត្ថកិច្ចរបស់លោកកំពុងបន្តស្វែងរកចាប់ខ្លួនជនសង្ស័យហើយ។
លោកថ្លែងថា៖ «រឿងឃាតកម្មសម្លាប់មនុស្សនេះ សមត្ថកិច្ចរបស់យើងកំពុងដុតដៃដុតជើងខ្លាំងណាស់ ដើម្បីស្វែងរកចាប់ខ្លួនជនសង្ស័យចាត់ការតាមផ្លូវច្បាប់។ បើតាមខ្ញុំសាកសួរព័ត៌មានទៅដឹងថាជនរងគ្រោះជាមនុស្សស្លូតទេ»។
លោក ចាន់ ជា អាយុ ៥៧ ឆ្នាំ ត្រូវជាជីតាបង្កើតរបស់យុវជនរងគ្រោះបានរៀបរាប់នៅថ្ងៃទី ១៨ មេសាថា ចៅប្រុសរបស់គាត់បានឈប់រៀនត្រឹមថ្នាក់វិទ្យាល័យជាង ២ ឆ្នាំមកហើយ គឺចាប់តាំងពីជំងឺកូវីដឆ្លងរាតត្បាតខ្លាំងមកម្ល៉េះ។ នៅដើមឆ្នាំ ២០២២ នេះចៅរបស់គាត់បានទៅនៅក្រុងបាវិត ខេត្តស្វាយរៀង ដើម្បីជួយម្តាយមីងដឹកសាច់ជ្រូកលក់មួយរយៈ។ នៅមុនថ្ងៃបុណ្យចូលឆ្នាំខ្មែរនេះ ចៅប្រុសរបស់គាត់បានមកលេងផ្ទះនៅភូមិអន្លង់ស្លែង ឃុំសំបួរមាស ស្រុកមុខកំពូល។
លោកបន្តថា លុះនៅរសៀលថ្ងៃទី ១៥ មេសា ដែលជាថ្ងៃបុណ្យចូលឆ្នាំខ្មែរទី ២ ជនរងគ្រោះ និងមិត្តភក្តិប្រមាណជាង ១០ នាក់ទៀតបាននាំគ្នាទៅមើលគេប្រគល់រង្វាន់កីឡាបាល់ទាត់នៅភូមិអំពិលទឹក ឃុំសំបួរមាស។ នៅទីនោះក៏មានមនុស្សរាប់រយនាក់បានចូលរួមមើលពិធីប្រគល់រង្វាន់នោះ។ ពេលដែលចៅរបស់គាត់កំពុងឱបកគ្នាជាមួយមិត្តៗរបស់គេ ស្រាប់តែជនសង្ស័យឈ្មោះ ហ៊ាង ម៉េងហាប់ បានវាយចៅរបស់គាត់នឹងឈើជ្រុងពីក្រោយចំសៀតផ្កាខាងឆ្វេងដួលផ្កាប់មុខនឹងដីដាច់ខ្យល់ស្លាប់ភ្លាមតែម្តង រីឯដំបងឈើជ្រុងនោះក៏បាក់ដែរ។
លោកប្រាប់ថា៖ «ចៅប្រុសរបស់ខ្ញុំស្លូតណាស់នៅមួយភូមិអន្លង់ស្លែងនេះ នរណាក៏ថា ចៅខ្ញុំស្លូតដែរ។ វាមិនចេះកោងកាចកុំថាឡើយមនុស្សចាស់ សូម្បីតែក្មេងៗក៏វាមិនកោងកាចដែរ។ គ្នាទើបមកលេងផ្ទះបាន ១ ថ្ងៃ ក៏កើតគ្រោះអកុសលបែបនេះទៅ»។
លោកឱ្យដឹងថារវាងជនសង្ស័យ និងចៅប្រុសរបស់គាត់ មិនដែលស្គាល់គ្នាទេ ព្រោះថាភូមិដែលជនសង្ស័យរស់នៅ និងភូមិចៅគាត់រស់នៅឆ្ងាយពីគ្នាជិត ១០ គីឡូម៉ែត្រឯណោះ។ ម្យ៉ាងទៀតចៅរបស់គាត់ក៏មិនដែលមានជម្លោះ ឬមានគំនុំជាមួយជនសង្ស័យដែរ។ ហេតុដូច្នេះ ទាំងឪពុកម្តាយ ទាំងគាត់ ដែលជាជីតារបស់ជនរងគ្រោះនៅតែមិនអស់ចិត្តពីការវាយសម្លាប់នេះ។
លោកនិយាយថា លោកបានឮអ្នកភូមិថា ជនសង្ស័យមិនសូវបានរស់នៅក្នុងស្រុកកំណើតទេ ដោយចេះតែផ្លាស់ទីកន្លែងរស់នៅម្តងទៅរស់នៅខេត្តស្ទឹងត្រែង ម្តងមកនៅខេត្តកំពង់ចាម។ នៅទីនោះ ជនសង្ស័យបានបង្កជម្លោះវាយគេឱ្យរបួស ហើយគេចខ្លួនមករស់នៅភូមិអំពិលទឹក ឃុំសំបួរមាសវិញ។ យ៉ាងណា ពាក់ព័ន្ធបទល្មើសនេះ លោកថាទុកឱ្យសមត្ថកិច្ចនគរបាលចាត់ការទៅតាមច្បាប់ទៅ៕
