.jpg)
កិច្ចប្រជុំស្ដីពីការបណ្ដុះបណ្ដាលមន្ត្រីនៅមណ្ឌលគិរីពីថ្ងៃទី ១៨ មេសា។ រូបថត មន្ទីរព័ត៌មានខេត្ត
មណ្ឌលគិរីៈ មន្ត្រីជំនាញមកពីខេត្តចំនួន ៦ ទទួលបានការបណ្តុះបណ្តាលស្តីពីប្រព័ន្ធគាំពារសង្គម ដើម្បីពង្រឹងចំណេះដឹងជាមូលដ្ឋានលើប្រព័ន្ធគាំពារសង្គមទាំងក្នុងក្របខ័ណ្ឌសកល ក្របខ័ណ្ឌតំបន់ និងក្របខ័ណ្ឌជាតិ សម្រាប់បម្រើសេវាដល់ពលរដ្ឋឱ្យបានល្អប្រសើរ។
ពិធីបើកវគ្គបណ្តុះបណ្តាលនេះស្ថិតក្រោមវត្តមានលោក ឈួរ សុបញ្ញា ប្រធាននាយកដ្ឋានសុខុមាលភាពសង្គមនៃក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកស្រី វិន ស៊ីធួន អភិបាលរង ខេត្តមណ្ឌលគិរី កាលថ្ងៃទី ១៨ ខែមេសា នៅសាលប្រជុំសាលាខេត្តមណ្ឌលគិរី ដោយមានការចូលរួមពីមន្ទីរអង្គភាពជំនាញពាក់ព័ន្ធមកពីខេត្តចំនួន ៦ រួមមាន ខេត្តកណ្តាល ព្រៃវែងត្បូងឃ្មុំ ក្រចេះ រតនគិរី និងខេត្តមណ្ឌលគិរី ជាង ៤០ នាក់ ។
លោក ឈួរ សុបញ្ញា បានថ្លែងក្នុងពិធីនោះថា វគ្គបណ្តុះបណ្តាលនេះដើម្បីពង្រឹង និងផ្តល់នូវចំណេះដឹងជាមូលដ្ឋានលើប្រព័ន្ធគាំពារសង្គម ទាំងក្នុងក្របខ័ណ្ឌសកល ក្របខ័ណ្ឌតំបន់ និងក្របខ័ណ្ឌជាតិដល់មន្ត្រីរដ្ឋបាលថ្នាក់ក្រោមជាតិ។
លោកបានលើកឡើងថាដើម្បីឱ្យការអនុវត្តកម្មវិធីប្រព័ន្ធគាំពារសង្គមបានជោគជ័យ និងមានប្រសិទ្ធភាព ក្នុងការដោះស្រាយបញ្ហាជូនប្រជាជនឱ្យបានល្អនិងទាន់ពេល គឺសមត្ថភាពមន្ត្រីនៅគ្រប់លំដាប់ថ្នាក់ដែលជាតួអង្គប្រតិបត្តិករជាកត្តាសត្យានុម័តមួយដែលទាមទារឱ្យមានគុណភាព ភាពច្បាស់លាស់ ប្រាកដនិយម ទន់ភ្លន់ បត់បែន និងធ្វើបច្ចុប្បន្នភាពជាប្រចាំ។
លោកបន្តថា៖ «កត្តាជោគជ័យនៃការអនុវត្តកម្មវិធីនីមួយៗផ្តើមចេញពីភាពប្រាកដនិយម ការទទួលខុសត្រូវ និងឆន្ទៈពិតប្រាកដស្របតាមតួនាទី និងភារកិច្ចរៀងៗខ្លួនក្នុងនាមជាមន្ត្រីប្រតិបត្តិករជួរមុខស្របតាមមាគ៌ាគោលនយោបាយរបស់រាជរដ្ឋាភិបាល»។
តាមរយៈវគ្គបណ្តុះបណ្តាលរយៈពេល ២ ថ្ងៃ (ថ្ងៃទី ១៨-១៩ មេសា) លោក សុបញ្ញា បានស្នើឱ្យសិក្ខាកាមយកចិត្តទុកដាក់សិក្សាដោយទាញយកឱ្យបាននូវខ្លឹមសារជាសារវ័ន្តសម្រាប់យកជាពុទ្ធិបន្ថែមថ្មី និងអាចយកទៅអនុវត្តបន្តបាន។
ជាមួយនេះលោកស្នើសិក្ខាកាមត្រូវចូលរួមឱ្យបានទៀងទាត់ និងស្នើឱ្យគ្រូឧទ្ទេសលើកយកបទពិសោធល្អៗបន្ថែមទៀត ដើម្បីផ្សារភ្ជាប់នឹងទ្រឹស្តីក្នុងការសិក្សានិងបានឱ្យសិក្ខាកាមក៏ដូចជាវគ្គបណ្តុះបណ្តាលទាំងមូលអនុវត្តឱ្យបាននូវវិធានការ ៣ កុំ និង ៣ ការពារផងដែរ។
លោកថា៖ «ខ្ញុំសង្ឃឹមយ៉ាងមុតមាំថា ក្នុងរយៈពេល ២ ថ្ងៃនេះលោក លោកស្រី នឹងទទួលបានចំណេះដឹង និងជំនាញថ្មីៗល្អជាច្រើនបន្ថែមទៀតលើប្រព័ន្ធ គាំពារសង្គម ពិសេសផ្សារភ្ជាប់ជាមួយនឹងទ្រឹស្ដី និងការអនុវត្តរបស់លោក លោកស្រីជាសិក្ខាកាមក្នុងពេលកន្លងមកនៅលើក្របខ័ណ្ឌផ្នែកខ្លះនៃប្រព័ន្ធគាំពារសង្គម»។
លោកស្រី វិន ស៊ីធួន អភិបាលរងខេត្តមណ្ឌលគិរីបានគាំទ្រចំពោះការរៀបចំវគ្គបណ្តុះបណ្តាលមន្ត្រីនៅថ្នាក់ក្រោមជាតិនេះ ដែលជាការរួមចំណែកលើកកម្ពស់សមត្ថភាពមន្ត្រីលើប្រព័ន្ធគាំពារសង្គម ដើម្បីចូលរួមអភិវឌ្ឍខេត្តមណ្ឌលគិរីឱ្យកាន់តែរីកចម្រើន។
លោកស្រីបានថ្លែងអំណរគុណដល់ថ្នាក់ដឹកនាំក្រសួងសង្គមកិច្ច អង្គការដៃគូ និងមន្ទីរជំនាញ ដែលបានសហការគ្នារៀបចំវគ្គបណ្តុះបណ្តាលនេះឡើងដើម្បីពង្រឹងនូវសមត្ថភាពបង្កើន និងផ្តល់ចំណេះដឹងដល់មន្ត្រីនៅរដ្ឋបាលថ្នាក់ក្រោមជាតិ ដើម្បីឱ្យទទួលបានចំណេះដឹងគ្រប់គ្រាន់ និងចូលរួមអនុវត្តការងារឱ្យមានប្រសិទ្ធភាព និងទទួលខុសត្រូវខ្ពស់។
លោកស្រី ស៊ីធួន ថ្លែងថា៖ «សិក្ខាកាមទាំងអស់ត្រូវខិតខំយកចិត្តទុកដាក់ប្រឹងប្រែងរៀនសូត្រ ដើម្បីទទួលបានចំណេះដឹង និងជំនាញបណ្តុះបណ្តាលថ្មីៗបន្ថែមទៀត ក្នុងការយកទៅបម្រើការងារនៅតាមមូលដ្ឋានរៀងៗខ្លួនឱ្យមានប្រសិទ្ធភាពខ្ពស់»។
ក្រសួងសង្គមកិច្ច និងក្រសួងស្ថាប័នពាក់ព័ន្ធកាលពីថ្ងៃទី ៤ ខែមេសាថ្មីៗនេះបានប្រកាសដាក់ឱ្យប្រើជាផ្លូវការនូវ «ផែនការយុទ្ធសាស្ត្រស្តីពីកម្លាំងសេវាសង្គមនៅកម្ពុជា ២០២២-២០៣១ និងផ្សព្វផ្សាយឯកសារទឡ្ហីករណ៍ស្ដីពីការវិនិយោគលើកម្លាំងសេវាសង្គម និងសេចក្តីណែនាំស្ដីពីតួនាទី និងភារកិច្ចសម្រាប់មន្ត្រីទទួលបន្ទុកជាបុគ្គលិកសង្គមកិច្ចក្រុង ស្រុក ខណ្ឌ»។
លោក វង សូត រដ្ឋមន្ត្រីក្រសួងសង្គមកិច្ចធ្លាប់បានថ្លែងពេលប្រកាសដាក់ឱ្យប្រើប្រាស់ផែនការយុទ្ធសាស្ត្រនេះថា ផែនការនេះជាឯកសារដ៏មានសារៈសំខាន់ក្នុងការពង្រឹងសមត្ថភាព និងបង្កើនចំនួនកម្លាំងសេវាសង្គមកិច្ចយ៉ាងហោចណាស់មានអ្នកអាជីពសង្គមកិច្ច ឬអ្នកអាជីពសង្គមកិច្ចរង ២ នាក់ក្នុង ១ ឃុំ-សង្កាត់ ដើម្បីលើកកម្ពស់កម្លាំងសេវាសង្គម៕
